تويت
أنتي دمعه وجانت أبعين السماء
يارقـــيه ومن نزلتي أبكربـلاء
وللحشر ما تنكطع ــــــ دمعتج صارت نبع
يارقيه يارقيه
ـــــــــــــــــــــــــــ
أنتي دمـعه أتصورت قــبل الوجـود** ومن جفن أدم جرت فوك الخدود
أرسمتي وحده احسين مابين الحشود ** وعالنهرعـــباس مكطوع الزنود
واكــــفه زينب رســمتي أبلا خباء
ويمهى تبجي أطفال مذعوره ونساء
لأن عشتي هالوضع ـــــ دمعتج صارت نبع
يارقيه يارقيه
ـــــــــــــــــــــــــــــــ
انتي دمعه ابكل جفن مؤمن غيور** أتفجرت أنهار مابين القبور
وللقيامه دمعتج تبقى تفور ** تنزل أعله احسـين كــل ليله تزور
اتريد تسكي الطاح مسلوب الرداء
وهم تغسله اتريد من فيض الدماء
لكل شهكه بالدمع ــــــــ دمعتج صارت نبع
يارقيه يارقيه
ـــــــــــــــــــــــــــــ
اعليج حتى الدمع ظل يجري دمع **وصار طوفان وبعد ما ينكطع
وبي ســفينة نـــوح ظلت ترتفع **وصلت الكربله اتريد المنصرع
ونـتـقلتي مـــــن عيــون الأنبياء
وصرتي عنوان المأسي والبكاء
تروي عن المنصرع ـــــــــ دمعتج صارت نبع
يارقيه يارقيه
ــــــــــــــــــــــــــــــ
ويه الحسين أنذبحتي أبمصرعه** ويه دم نحره أنمزجتي ومدمعه
دمعتج ماتقــبل اهيه اتودعـــه ** وعشتي مابين الخيم والمشرعه
و دمـعتج يم الخيم رســـمت طفل
ضامي يشرب من دموعه التنهمل
وعالنحر واعله الضلع ـــــ دمعتج صارت نبع
يارقيه يارقيه
ـــــــــــــــــــــــــــــ
عالمنابر وحنه نبجي أعله الذبيح ** أنشوفج أمن اعيونه دمـــعه وتطيح
وصوت نسمع يجي من عند الضريح ** انه ابوج احسين بالعبره يصيح
ابكد دموعج سالت ادموعي عليج
يارقيه نامي بالطــيف انه اجيج
ادري كلبج منفجع ــــــــــ دمعتج صارت نبع
يارقيه يارقيه
ــــــــــــــــــــــــــــــ
أذن حكنه أشما نذكرج يارقيه ** انعيش أحنه ويـــاج يوم الغاضريه
انشوفج امن الخوف دمعاتج جريه ** ولازمه بجفوف زينب وسبيه
وين ابوي احسين صوتج يرتفع
وزينب اتصبرج ويسـيل الدمع
أشما نذكرج ننصدع ــــــ دمعتج صارت نبع
يارقيه يارقيه
ـــــــــــــــــــــــــــــــــ
ــــــــــــــ
ـــــ
ــ
ـ
جبار البطاط