تويت
هاي ايتامك حضرت يحسين /ابو ايمان المجراوي
هاي أيتامك حضرت يحسين . تنشد عن گبرك صاير وين
شاهد حالتها . نشّف دمعتها
تنشد عن گبرك صاير وين
*********************
اجت يا بويه تلهج باسمك الأيتام
وعليك التفت بدمعة حزن وآلام
عگب ذاك المسير ورحلت الأيام
اجت تشكيلك بلوعة مرار الشام
حضرت بدموع ألون والاه . من ذالك الهم ألما تنساه
هاجت لوعتها . نشّف دمعتها
تنشد عن گبرك صاير وين
*********************
إلك محتاره يا حاله وحدث تشرح
ويا قصه التسولفها الفكر يسرح
من ركضتها صوبك وانته بالمذبح
لوسوط الشمر والفاضه التجرح
تشكيلك حالتها الأيتام . والقصّه العاشت بيها أيام
وصوره الشافتها . نشّف دمعتها
تنشد عن گبرك صاير وين
*********************
يا لحظة حزن تشكيلك ويا حال
عن حرگة خيمها اتسولف الأطفال
لو درب السبي والمدمع الهمال
وهّي أتشاهد يشيله راسك العسال
محتاره ويا حال ألتشكيه . عن غربته ودرب التمشيه
لو عن حيرتها . نشّف دمعتها
تنشد عن گبرك صاير وين
*********************
على گبرك هوّت وتعانق التربان
ودموع الفراق أعله الوجه نهران
إلك مشتاگه حضرت والصبر نيران
وآلام ألمسيره أمذبّلّه الأبدان
متروعه ومذهولة الأطفال . تطلع من حال اتطب أبحال
ذابت مهجتها . نشّف دمعتها
تنشد عن گبرك صاير وين
*********************
اجت بتراب كبرك تحتمي يحسين
تدوّر عل الأمان وتشتكي من البين
اجت والدمعه دم تتسابگ منا لعين
يتامى إزغار خويه وتلتفت صوبين
ساعه الگبرك تركض وتنوح . وساعه ألعمها العباس أتروح
صعبه أمصيبتها . نشّف دمعتها
تنشد عن گبرك صاير وين
*********************
الخادم أبو إيمان المجراوي