تويت
رسالة الزهراء عليها السلام الى المهدي عجل الله فرجه /ابو ايمان المجراوي
يا محيي الشريعة *** رسالة من الوديعة
حچتها بحر الصواب *** كتبها الضلع عالباب
رسالة من الوديعة
*******************
مضمون الرسايل بين الأحباب تحيات وتهاني
سلام وتهنئا يا المهدي واشواگ مرسومه وأماني
مودّة وتنكتب من عمق الگلوب وبأجمل معاني
والمرسل يتاني أيرد له الجواب ويعد بالثواني
من طبع الرسالة *** تتضمن مقاله
وتطالب بالجواب *** كتبها الضلع عالباب
رسالة من الوديعة
*******************
على الباب أنكتب يالمهدي مكتوب ساعات ألمنيه
معنون يا بو صالح والختم بي واضح للبرية
غده المسمار يكتب والورق باب وبدم الزچيه
وغدة عين الوديعة بسيل الدموع تشرحها القضية
إلك تكتب يمهدي *** أشوفك يبني ودي
من دمعي الجفن ذاب *** كتبها الضلع عالباب
رسالة من الوديعة
*******************
يا مهدي الحوادث صارت أهواي من سافر نبينه
ومصاب ألجزء يسلمنه لمصاب تسليم الرهينة
رهاين صرنه يبني وچن الإسلام عدوانه صفينه
يتلايم جرح ونشاهد أجروح تتهافت علينه
وباسم الديانة *** خانوها الأمانة
وصفينه يبني أجناب *** كتبها الضلع عالباب
رسالة من الوديعة
*******************
انه أمك يمهدي واشرح ألصار من لوعة مصابي
وترجمها بدمع يحرگ بالعيون أهاتي وعذابي
رسالة وبيها أخصك يبن الأطهار هاك اسمع عتابي
ظلموني يمهدي وفاضت الروح وانه بعز شبابي
حرمه وما رعوها *** والدار احرگوها
لأكن شنهي الأسباب *** كتبها الضلع عالباب
رسالة من الوديعة
*******************
إذا شاء الله يبني وشرف الكون بالطلعة البهية
يم گبري تجي وتدلي الناس يالمهدي عليه
تقراها الرسالة بعالي الصوت وصيتي يالبقيه
تگول ألزهره أمي مو فرد يوم طاحت عالوطيه
يبني اشرح قضيتي *** الك هاذي وصيتي
ويم گبري انصب أمصاب *** كتبها الضلع عالباب
رسالة من الوديعة
*******************
يا قائم محمد عيني تربيك وستنظر ظهورك
من يوم الغفيت بلحدي لليوم أترجه حضورك
يبني سنين مرت وانه بي شوگ اشتم من عطورك
وأملي عيوني منّك حين اصد بيه يزهي بعيني نورك
بصبر وطويها الأيام *** وآمل جرحي يلتام
واگولن يرجع الغاب *** كتبها الضلع عالباب
رسالة من الوديعة
*******************
سيف الله بيمينك والعزم بيه من تعلن قيامك
عدل توحيد حق وعزه وإيمان خط الله نظامك
ربّك نصبك وأنطاك تسديد وأعله العلية هامك
والفاتح عليك ينص الكتاب من تشهر حسامك
يا مهدي ألبريه *** ترجاك الزچيه
اليومك تحسب أحساب *** كتبها الضلع عالباب
رسالة من الوديعة
*******************