تويت
علي الاكبر عليه السلام يطلب من امه الدعاء في المعركه
____________________________
أندعي لي * أندعي لي * يمّه لو طال النزال
أندعي لي * أندعي لي * بهذه ساحات القتال
&&&&&&&&
يمّه للميدان رايح للعقيدة اليوم أذود
انصر بسيفي الديانة وللبغي أوضع حدود
لأجل أبوي حسين أقدم نصرتي وبعزمي زود
واقتحم كل العساكر واهزم إكبار الجنود
بيدي صارم * وانه عازم * بالملاحم * أبكر بله أصبح مثال
***********
يمه لحظات السعادة انغمر بيها الگلب
ويكثرإيمان المجاهد ويتخطه أعله الصعب
يشعر اب أحساس رائع لو تقدم للحرب
ويأمل أينول الشهادة وما يحس بكل تعب
كل مجاهد * أبنفسه عاهد * يبقى خالد * ويحرز أبدوره النضال
***********
يمه موهيين وداعچ لاچن الموقف حسم
ابرز أبنفسي وأجاهد للمبادئ والقيم
انصر الدين الإقامة جدي ما بين الأمم
حتى لو افقد حياتي بل حرب لا ما أهم
جدي ناده * بالشهادة * وللعبادة * افعل الشيء المحال
***********
يمه انه ادري أبوداعي گلبچ أيعيش أبحزن
وادري ابحالچ ييمه ما يكف أمن الشجن
ادري فكرچ باقي يمي وكل فكر عندچ سكن
وأنتي مذهولة ألفراقي مثل المضيع وطن
والنواظر * ميها ماطر * والعساكر * حشدت كل الرجال
***********
يمه لو ما أرد وأشوفچ أنتي يم جسمي تعاي
گعدي يم راسي واهتفي يا ألاهي القربة هاي
حنّي من دمي جبينچ وصوغي دمعچ ليّه ماي
بلچن اروي من دموعچ مهجتي يمّه وحشاي
يمه صبرچ * عاليمرّچ * عظم اجرچ * بيّه وبّاقي العيال
***********
الجواب من ليلى عليها السلام الذي تخاطب بهِ ولدها
____________________________
ادعي ابگلب ما لوم * يوليدي يا مظلوم
وابچي بدموع ادموم * يوليدي يا مظلوم
**********************
يمّه گلبي كلّه يمك وانته رايح للنزال
حالي أمدهور يالاكبر وانظر السوح القتال
يمّه ساعة وعيي افگده من اصد حشد الرجال
وساعة من دمعاتي أوعه وانتحب يبني تعال
وأتمنى أموت اليوم * وأتمنى أموت اليوم * يوليدي يا مظلوم
**************************
انته للميدان رايح وانه دمعاتي تلوح
يمّه وشما تخطي خطوة روحي من عندي تروح
يمّه ما احمل أشوفك طايح ومملي جروح
وفوگك تدوس الگوم * وفوگك تدوس الگوم * يوليدي يا مظلوم
*******************
انته تشعر بالسعادة وانه اعيشن بالحزن
وانته تدري بحالي يبني حين اخلصنه بشجن
انه فكري كله يمك يالخذك مني الزمن
دهري عيلّه أيحوم * دهري عليّه أيحوم * يوليدي يا مظلوم
*******************
انته يوليدي يالاكبر أصبحت يم الرسول
وانه عيني بدمعي تمطر مدري بعدك شنهي اگول
يالرحت مني وعفتني بهذا حالي وها لذهول
لا صحوه أو لا نوم * لا صحوه أو لا نوم * يوليدي يا مظلوم
*******************
يبني تطلب مني أجيلك لو طحت بين الأعادي
وتطلب ابذرعاني أشيلك ودمك أيحني الأيادي
يبني شنهو إلي يطفّي ناري التشب بفؤادي
بعدك جرت أسموم * بعدك جرعت أسموم * يوليدي يا مظلوم
*******************
الشاعر ابو ايمان المجراوي سنة 1998
تعليق