مولد الامام الحسين (عليه السلام)



للشاعر الحسيني الحاج زهير المخزومي

حفلة فـرح واعياد نـهدي وتحيه

هـاي الـولاده اليوم احـلي هديه

* * * * *

يـاهله بـهالميلاد واحلى علامه

من بيت حامي الجار بيت الامامه

نـورك سطع شعبان واسفر ظلامه

هالفرح باسم حسين روح الزچيه

* * * * *

من ياحجر هالنور انواره شعت

تتبادل الافراح هـالامه طلعت

گـالوا لبوالسجاد اسرار لمعت

من الزهره هذا النور غطه البريه

* * * * *

من حجر امه النور فاطمه الزهره

اهل السما بهالنور عقدت السهره

بمولد ابو السجاد خـامس العتره

فـرحانـه امك بيك هالفاطميه

* * * * *

صحت بفرح ياعين اهلا وسهلا

بـهالمولد الاسرار اي والله يحلن

يعيون حور العين قُـرّن اتكحلن

مولد حسين اليوم والثاني اخيه

* * * * *

غنّي يـحور العين وانشوده ردّي

بمولد ابـو السجاد للزهره ودّي

ولحيـدر الكرار أهـات عندّي

دمعـاتي بالافراح صارت شجيه

* * * * *

وَدّي يحـور العين منّي قصيده

منظومه بالاحزان لبن الصميده

مطرز بدمع العين مطلع نشيده

ليش النجف محزون والغاضريه

* * * * *

كل عام بالـميلاد عـدنه زياره

للغري چنه انروح نوصل ادياره

ياوسف هذا العام مهدومه داره

ابدال الفرح دمعات نهدي لغريه

* * * * *

من مثل هذا اليوم تزهي الـمدينه

تتشعشع الانـوار مـثل السفينه

يـاحيف هذا اليوم ظلمه وحزينه

من الاهل والجيران وحشه وخليه

* * * * *

تبچي المدينه حيف دمعه اعلى اهلها

مـابعـد بيها نـاس طشّوا شملها

انشلّت اديـن اشرار تحمـد فعلها

ضربت ضريح حسين والحيد ابـيّه