الى ذكرى أمي السابعه عشر من السنين المغتربه
والى ذكرى شاهد قبرها الذي حطمته الجرافات في زمن الاوغاد(عمار)
ــــــــــــــــــــــــــــــــــــــــــــــــــ ــــــــــ
أنت ضيف اعله العمر
كلما تضوي بدروبي شمعه
ضيف انت أعله القلب
كلما تضوي بعيني دمعه
آنه أدري.. بالوحشه
صعب بيها العين تغفـه
ييمه الصوج مو بيه
ييمه الزمن دولبني سبحه
الوداع يصير بمفارق.. المحبين
وأنت وياي.. لطريقي نجمه
أهتدي بليلي من طيفج
يسامر الليل بوجنات صبحه
شكثرها الهموم.. وشكّد الأحزان
ييمه تنزاح لو طاريج يمرهه
سنين السبعطش ... مرن
سوالف بساعات.. فرحه
كل الناس تزور القبور
وتشعل شموع وتنتحب لحظه
الا آنه أنزار منك ييمه
لأن تدرين قبري غربه
وحشتي ما بيها منكر ولانكير
بس الضيم من وقت حطلي قبره
شفتي واحد طلع من لحده؟؟
لو قدر يصرخ.. وينسمع نحبه
هذا آنه..لايفارقني السقم
وخلاني سجين اباب لحده.
_______________________________