2- احس بيج !
احس بيج بطواف الليل والالم يسكن بجرحة
وجسمي من الالم ينام وعيوني تبقى مفتحة
عيوني ماتريد تنام تريد حاظنة الدمعة
واخذ منج دلال الام من تحن لابنها بكل رجعة
احس بذكرج الليل طويل .. جنة ليل الشتة يطول شرحة
واذا كلبي بيه الدم بارد .. ليش يزيد نبضة
ردتج الي مو لغيري تصيرين .. ليش المال يسوي الفرقة
انتي الروح وياي .. ليش بطبع التاج يعلى ماينصة
انتي بجيتي هواي .. واني بجيت دمعة تعادل كل حزن بيج وفرحة
تريديني انساج بسيطة اسوي كلبي صخرة
بس شسوي لدمي لما يقبل يبدل حبرة
امري لله من حبيت كلولي جرب الحب بلكي الشعر يحلة
وطحت بالحب واول مرض اشوف الدوة موجود والمريض مايشفة

3- يافرحة لاتعوفيني !
يافرحة لاتعوفيني .. اخر مرة من اسنين بحلم زرتيني
الحلم يخلص واعيدة .. واخاف ما الكاه من افتح عيوني
لاتخلني بالفرحة معلك .. ومن هذا حلمي تاخذيني
صرت لعبة وحبل بيدج .. وبكيفج تجريني
شلون طردتي الحزن بهداي .. واني الحزن عشة صار بيتي
خليني بيج فرحان .. ولاتصيرين بسمة لغيري
يافرحة لاتعوفيني .. ماكو بعيني حلم ثاني يرويني
خليني بعينج دمعة .. وبهل الفرحة ذبيني ولاتمنعيني
استوني شفت دنيا .. لو ما هاي الدنيا .. وهي سبب حزني
يافرحة لاتخوفيني بضحكة ملتها الجهال .. والشايب بيها يدري
يافرحة احبج واخاف عليج .. ومن خوفي صار الحزن سدي
اخاف عليج .. اريد دموعج دوم تلعب بصوبي وتظل عدي
اني الفرحة صدك زارتني بحلم .. بس مابقت دموع مني
اني سدي صار من طين .. وخربة الماي ودمر كل ثوب الي عدي

4- امي من تبجي !
امي من تبجي بصلاة الليل وتدعو لابنها يعود
تبجي بصوت ناصي وتتهامس بدموعها السود
عيونها المليانة تدمع .. ويجاوبها الصبر الفرج بعيد
بكثرة دموعها كلبها يحقد .. حقد على ابن اليهود
ترفع ايدها وتدعي .. ورة كل دعوة كلبها مهبود
ذنبك صليت بالجمعة .. والجمعة فرحة لكل معبود
تكلة بحبسك حزن .. يموت صدرك ليث الاسود
انتة مو أول ابن ولا اخر ابن بنفسة يجود
انتة ابني .. من شوفتك لاتحرمني وتبعدك القيود
انتة حزني بكل عيد .. كلي يمتى ترجع وتعود
ومنهو ينصرنا غير الواحد الصمد الغير مولود

5- اه .. يمة
اه.. يمة بطلعتج الي .. احلى نظرة
عيونج وسعة تتحمل كبر كل دمعة
اه.. ياتعبج البيه استراحينة .. وما ينوصف شكثر تعبة
شوصف حزن ماتقدرة هدوم سودة
والله محنى صرنا للعذال ضحكة ! .. وين رحنة
وين صارت امنة .. نسيتوها بسنة وحدة
طفت شمعة مالها مثل شمعة ! وين رحنة
هرعت ايامنا من عدنا .. وفرت الدمعة
نسيتوا حزنا .. نسيتوا احلى ذكرة
كلنا نموت ونتلاكة عد ربنا .. وبالحق الله يرضينة
خلينة نحس بالاخرة مادامت الدنيا تكبر بينة
اه ياوكتنة الاخذ ساعات ومنة نعد ثوانينة
مرة نكول وبس ووراها نعد توبات ذنوبنة
يلفنا التراب ومايقبل منة اي توبة

رغم ان كل ماكتبته لايعتبر شعرا أو قصائد لأنعدام الصورة الشعريه والوزن والقافية فيه ولكن
ان الفطرة التي كتبتها فيها كانت رائعه
وكذلك احاسيس المرهفة الصادقة التي لمستها فيما كتبت كانت بديعه
موفق ان شاء الله

شكر وتقدير اخي( حليم السيد حافظ ) لردك والذي كان في شطرة الاول صائباً ومحقاً وانشاء الله انتبه في المستقبل واتعلم ذلك .. اما في الشطر الثاني لا اعرف تجاملني ام صحيح عموماً لي قلب حزين واحاول دائماً اخفي مافي داخلي ولكن لا اقدر فاعبر عن ذلك في رسوماتي الحزينة واحيانا اكتب وياخي كما يقولون( العافية بالتداريج ) .. واني ارسم منذ الصغر واعبر بكتاباتي كذلك ولكني لا انمي مواهبي وكذلك هواياتي الاخرى .. فارجو ان يسع صدرك لتلك اخطائي ولاتسميها شعراً وانما جراح نابعة من شخص انصبت عليه الاحزان .. فيكتب لايعرف الوزن والقوافي والتحلية وانما يكتب مايصادف .. وبيني وبينك اذا ادعى احد الاعضاء ان هذا ليس شعراً فما عليك .. الا ان تدافع !! ؟

6- وفاة ابن خالي نتيجة حادث مؤسف اثناء عودتة من الخدمة العسكرية فهو شاب خريج معهد معلمين / قسم لغة عربية مقبل على زواج .. وكان يحمل قلب و طيبة لا توصف .

*** بعدنا لصورتك نذكر ***
بعدنا لصورتك نذكر وللحزن تتناثر دموعك
يالتحب وباخوك تحب وللتعب ماتشتكي ضلوعك
بحزنك ماتهتم وكلبك يسرة ضحكة رسولك
يلي بوصفك تدمع عيوني لان تستاهل عيونك
اذا الك مانبجي منهو يتلكة دموعك
نريد نبجي لحزنك ياحنين يلما ينسمع صوتك
من خابرت كنالك تعال واحنة منتظرين جيتك
كلت ما اندل ولو جاي تدليك ريحت عمتك ودموعك
خابروا واملنا انتة تخبرنا بجيتك
خابروا كالو حسين مات ومات وياك سرك
يا أبن الخال رحت وماشفنا شتريد دموعك
بعدنا ماناسين جيتك منهو الذبح دربك
منهو الوكف بدربك كتل جيتك وربط حلمك
منهو الاخذ كلبك وموت كلب اخوك وامك
وامك تنطر حلتك وما لكت غير دمك
قبل ماتروح مانمت بالليل جنك تدري بموتك
نفسك ضاكت بيك وحظن امك مشتهي لطولك
والشباك بفتحة نسد عليك وما اطة الهوا لروحك
منو بحلمك زعلك واخذ النوم من عيونك
يالدمعك صفى بعيد ودموعك يابسة ظلت بخدك
منهو غيرك لدمعها شال غير دمعك منهو يرضى امك
شعفت من ذكرى الك صورة وملابس ظلت بيتك
شعفت صورة ماتحجي وملابس تباوع للبطولك
كنالك مر بينا أهناء مادرينة تتعثر بدربك
ومادرينة لوجعك شلون صار وفرغ حظن امك
الحديد كسر ظهرك وثلم ثلمة من اخوك وامك
احنة ردناك تجي ودربك مارضى لجيتك
رحت انتة وعفت ظهر اخوك مكسور بيك
وتابوت بسهولة يروح ومايلمس ضلعة ضلعك
يكلك المن رحت ياحسين وعفت حلمي وحلمك
اني اباوع للدنيا بيك والناس هسة تباوع لكبرك
قبل ماتروح شنو جان بفكرك والفرحة الظميتها بكلبك
خلصت من التدريب وفرحان لبغداد صار نقلك
يافرحة لما تمت وانتة جاي للبيت انتهى عمرك
عفت اخواتك شموع ذبلانة وثوبهم اسود صار بجيتك
وهنة يباوعن لخدك شلون صار بصف عمتك وعمك
لا ما ننساك بالكلب موجود مومثل دربك العاف دمك
ولا خلى الدمع بحظن امك .. ولاخلى الدمع بحظن امك

( العاشرا ليلاً - الاربعاء 20/3/2002 ) وقت الحادث

قصيده جميله لكنها خاليه من الوزن
الافكار جميله ولكن
راجع نفسك اخي والتوفيق من الله

شكر وتقدير على الرد والصراحة ( حليم السيد حافظ , كاميران عبد علي ) وسوف اعمل بما قلت لاحقاً ولكن لامانع من اتعلم الشعر الشعبي مادام املك مشاعر واحاسيس حزينة بداخلي واني سوف اجل ذلك لوقت لاحق واني قادر على تحقيق ذلك مادامت لدي الرغبة والقدرة وانا طلبت مساعدتك يا اخي حليم وان تدافع عني وان تترك الاوزان والقوافي وتفكر في تلك المشاعر .. وبعدها يرجع الشعر الشعبي لنصابة ووفق الوزن والقافية الصحيحة .. وسوف اكمل احزاني .. وعن الشعر ان اردتم ابعدوة ولكنها تبقى احزاني ! ولايمكن تغير الاحداث وانسبها لتاريخ مغاير واحليها بوزن وتسيرها القوافي وتغير معناها الضرورة الشعرية ويصبح حزني ! حزن ثاني .. وتخرج الكلمة بعيدة عن القلب ياخذها شريان خاطف .. ويبقى به الدم ميت , يفسد وحتى لايفيد انسان ثاني .. ( هذا قالة لساني ) .
شكر وتقدير على الرد والمتابعة ( حليم السيد حافظ و كاميران عبد علي ) وسوف اعمل بما قلتم انشاء الله في الامد القريب لانشغالي بامور اخرى وانه يتطلب مني ساعات لتعلم قواعد الشعر الشعبي .. ومرة اخرى اشكركم على المرور الطيب .. وتقبلو مني في هذة الفترة اخطائي وان لايكون حملي ثقيل عليكم .. ( هذا ما قالة عقلي )
اما( القلب يكتب تلك الكلمات المعبر عنها باحزان المحاسب ) وياتي يوم ويكون لها وزن وقافية ولا احد يصارح !

يقول :
اضحك يلما تمل الضحك .. اضحك
باجر تعرف الآلم وضيم الجرح .. اضحك
لاتنسى ثياب الحزن .. باجر الدمع اول حزنك
لاتظل تشم ريحة امك .. بعد ماظل ثوب عدك
انتة تظل بدارك غريب .. ولا يلفي بيه ولفك
انته تظل وحيد .. ويظل خوفك يأكل بظلك
نولد طفلك بموت امك .. وين فرحك من حزنك
ضحكت وطاحت دموع .. شلون تخفي البكلبك
اول حزن تشهدة دموعك وتذبة عيونك
تبجي جذب .. شلون كلبك خان ضلوعك
جسمك يرتجف .. ياحقارة عيونك ..لتنام بغير ثوبك
ابجي ماينسمع صوتك .. هربت دموعك وبقت بس رموشك
باجر تشتكي مني .. وتمل حزني .. وتسد كل دروبك
وين تلكة بعد حظن يلم كل جروحك .. وينشف دموعك
لاتضحك .. بداخلك حزن خافيه برودك
اني اعرفك .. من ابجيك محد يسد عيونك .. ويسكت دموعك
ويجيب :
خليك انتة بالحزن .. جسمي مل ثوبك
ثوبك ميت عد الناس.. وما تفيد جروحك
خليك بالماضي وبذكر السنيين .. ودموعك ماتفوتهة عيونك
خليك انته وحيد .. دموعك تلون جروحك وروحك
خليك انته حزين .. الحزن مالي كل دروبك
ثوبك مانسيتة لبستة .. ولكيت الحزن مأكل من ثوبك
اتركني لحظة اني اتعبت وياك
تعبي عيش انظر للبشر .. وفكري وياك
ابجي عليك عيوني ماتريد تنساك
عيوني لو عمت .. دموعي تظل بذكراك
تريد تاخذ عيوني .. شلون اذكر حلمي وياك
تريد تموتني .. واني روحي عايشة بدنياك
اعلك الك بكل ليلة شمعة .. وابد مانساك
لا والله مانساك .. انتة روحي .. وكل رسومي الحزينة ...
بيها التلوين مافاد .. والتفسير ينهاك!

احسنتم بارك الله فيكم
تحياتي