عذرا ً للغياب الطويل عن هذا المنبر الكريم. السلام عليكم
ـــــــــــــــــــ
ياعلي رسيت مراكبنــــه
وكَيّشْ بشط هواك الجود
أرض خير وسلام أنته
وعِلم راسخ من الله مرصود
عرفناك من نقره آيات الذكر
أيمان وطهاره وخوّه للمحمود

دكَينه بابك بلهفة عشكَ
وتدري ليك القلب مشدود
الأمل بيرغ أخضر رفعناه
بيه البيعه والعهد معكَود
ميات وهوايه السنين مرت
تكثر أبابك وتصيح الحشود
لو بينه واحد كدر همّه
دمعه عل الكَبر وياخذ المريود

نتعلم من سيرتك كلشي
وشنهي البيك ماموجود
الف باب من العلم عندك
وكل الف بألف عند يزود
حطهن بيك زين الخلايق
من أختارك وصيّه وسمعت شهود
الصبر منك تعلمناه بفضل
يرد ليك الفضل ويرجع ردود
يبو الحسنين من نشكي ألمنه
ونبجي من الظلم بحيل مهدود
ندري فضلك عند الله جبير
يكفي بس انته بالكعبه مولود
يكفي هارون من موسى الوصف
سماك النبي ونعرف المقصود
نتوسل بيك عند الله من ندعيه
وحاشى الله بالوجه بابه مسدود

موالاتك فرض وحبك عباده
مبغضك والله من الجنه مطرود
حبنا للنبي ربطنا بيك
يازوج الطاهره ونور الوجود
ياوالد السبطين وحوراء الجنان
وعباس أبو الموقف المشهود
يانهج البلاغه البيه نذود
إحنه من أسمك نكسب شرف
فوك الخلق بيك نتفاخر ونسود

ياعلي شما ذبحتنه سيوف الحقد
نبقى عل الولايه وعنها مانعود
هنياله المات وأسمك على شفافه
ياجسر السراط هناك ممدود