تويت
للوطن الحبيب
مابين الالم والعوز والجوع ... الف هنياله كلمن يحفظ ايده
بوجه شارعنه شفنه الموت مطبوع ... وانياب الرصاص احفرت جيده
و صاروخ ابمچان الورد مزروع ... اشكثر يكتل بشر هاي التفيده
ابصوانينه بعد ما ضلت اشموع ... ولا فرحة طفل مصباح عيده
قتل تفجير جثه أو راس مگطوع ... مامش غيرهه ابحلگ الجريده
البلبل عاف عشه ابين الفروع ... يخاف القاذفه تخطه او تصيده
عدنه امن القتل انواع مو نوع ... وانت اختار يانوع التريده
نسينه احنه الخميس او علم مرفوع ... او نسينه اطفالنه الحفظت نشيده
(عش هكذا في علو) صفت ممنوع ... او غدت چلماتهه كلش بعيده
شنو ذنب الطفل مو بعده راضوع ... بين احضان امه ايصب وريده
ابصدرنه المحترگ ما ظلت اضلوع ... حمت واثرت باطرافه الحديده
اثوابك من ثلج ياطائفي اتموع ... و عدنه اثواب ما تعتگ جديده
**************************************