تويت
وصلت للعظم ..
بسم الله الرحمن الرحيم
الاخوة الافاضل والاخوات الفاضلاتالسلام عليكم ورحمة الله وبركاته
عظم الله لنا ولكم الاجر بمناسبة مرور عام على الفاجعة الاليمة لتفجير قبة الامامين العسكريين عليها السلام، ولا ندري هل نعزي الامام الحجة عجل الله فرجه الشريف ام نعزي أنفسنا بهذا المصاب الجلل.
لكم مني هذا المشاركة للشاعر المبدع حمزة حسين بهذه المناسبة العظيمة :-
وصلت للعظم ويا الإرهابيين * وتمادوا وآنا ساكت عالتمادي
لأن ندري المشاكل تخدم إسرائيل * لذلك ما ردت أعلن جهادي
وأدري الطائفية يريدها الموساد * حتى يثبت أمريكا ببلادي
وآنا ويا المصايب ما بديت اليوم * ولا توه الحزن وياي الحزن بادي
عرفت آنا الحزن لمن سمعت حسين * ألا من ناصر واقف ينادي
وآنا الثوب الأسود ما نزعته بيوم * حتى بهالمصيبة ألبس سوادي
العرش أعلن حداد عليك يامولاي * قبل لا آنا أعلنلك حدادي
لأن ردت عليي نفس السلالات * وابن ملجم رجع نفسه المرادي
إجه يطبر علي بس ما لقاه موجود * طلع حقده كله بعلي الهادي
***
جيتم تطلبونا بثار الوليد * وثار مرحب وابن الود العامري
وهذا عار أجدادكم يالمجرمين * ما تغسلونه بذبح كل جعفري
لأن بالتاريخ ثابت بالدليل * لازم تذبحون حتى الطبري
وأمس في سامرا هدمتوا قبور * نعم هدمتوا البناء الظاهري
لچن هاي قلوبنا تهدموها بإيش * وبيها ألف قبة انبنت للعسكري
***
وأمس في سامرا من شفت الضريح * وركزت بيه حيل من شفته انهدم
شفت بعيوني رمح وسط الضريح * وشفت راس حسين عالقبة انرسم
إنتوا أهل البيت مو قبة وتطيح * إنتوا نور من الضماير والذمم
لمن سورة أخرى نزلت على الرسول * انتوا دليتوا الحروف إعلى القلم
ويا عراق وإنته يا شامخ يا عراق * لأن شايل كربلا بيدك علم
وأمس كتبوا لا على اسم الظالمين * اللا قامت لاسمك وكتبت نعم
***
لأن شايل هويتك يا علي الكرار * يعتبروني شيعي وذبحي واجب
السيف الشطر راسك على المحراب * بيه ردوا يذبحونا النواصب
ملة بلاية رحمة وكلنا مطلوبين * ومنهم يا علي شفت العجايب
المفخخ من يفجر ما يميز بين * هاي هنانة طفلة وهذا شايب
ولهذا تلاحظ من يفجرون * تلقى عقال واقع عالقصايب
وتلقى هنا كتب وهنانة دستة أقلام * وجنطة على الرصيف ويمها طالب
حاضر بالمقابر سجله الموت * بس المدرسة مسجلته غايب
واحنا إعلى المصايب مو جديدين * تدور وجوهنا تشوف المصايب
يعرفنا الحزن عرفة معاميل * وعلى قصصنا شكثر لوعات كاتب
تربينا وكبرنا بحضن عاشور * وفطمتنا المواكب عالمواكب
طفلنا ببطن أمه يشيب من الظيم * ومن تجيبه أمه تجيبه شايب
وعلينا الموت يركض هاي الأيام * مثل ركض السياسي على مناصب
وإذا هذا الوطن قررنا نبنيه * لازم مو فقط نبني المعايب
لازم قبل لا نبني الحياطين * نبني قلوبنا صارت خرايب
ولمن يرغب بالاستماع او تحميل هذه القصيدة بصوت الشاعر:-
http://www.alanwartvbox.com/style_images/def/save.gif للتحميل
http://www.alanwartvbox.com/style_images/def/lesson.gif للإستماع
http://www.alanwartvbox.com/download-13-0.html للتحميل
http://www.alanwartvbox.com/ram/13.m3u للإستماع
تحياتي القلبية
حسين الشاعر
تعليق