في ناس طيبين مره بس الواحد ما يفهمهم الا متأخر ... وفي ناس شرانيين مره بس ما يبان عليهم ... في ناس تعجب بيهم من اول مره ... وفي ناس ما تطيقهم من اول مره ... في ناس تقول في نفسك الحمد لله اني اتعرفت عليهم ... وفي ناس تندم انك اتعرفت عليهم ... .... في ناس تتمنى انك ما تشوفهم بس تضطر انك تشوفهم كل يوم ... وفي ناس تتمنى انك تشوفهم بس ما تشوفهم ... في ناس لما تقرب منهم تكرههم ... وفي ناس لما تبعد عنهم تكتشف انك تحبهم ... في ناس شكلهم مره مرتب بس من جوه فاضيين ... وفي ناس شكلهم مره مبهدل بس من جوه مليانيين ... في ناس تحس انك منته متطمن لهم ... وفي ناس تحس بالاطمئنان لهم ... في ناس يكدبوا وكدبهم مره واضح ... وفي ناس يكدبوا بس يحبكوا الكدبه كويس ... في ناس دائماً يحبوا يبينوا ان الحياة ملطشه معاهم ... ولو جيت بعد مية سنه برضو تلاقيهم بيشتكوا نفس الشكوى ... في ناس السر عندهم في صندوق ومفتاحه معاك ... وفي ناس اصحك تعطيهم سرك ... في ناس محد فاهم غيرهم( ابو العريف يعني) ... وفي ناس فاهميين كل حاجه بس ما يحبوا يبينوا ... في ناس لما يتكلموا معاك يمسكوا يدك ما اعرف ليش ... في ناس لما يتكلموا بس يأشروا بيدهم الين يجيبولك الخيله في عيونك .... في ناس مستحيل يتغيروا ... وفي ناس قابليين للتغيير على طول ... وفي ناس اليوم يكونوا معاك كويسين وآخر حلاوه وبكره تقابلهم تلاقيهم مقلوبين عليك ... في ناس لو جيتهم بعد اسبوع حتلاقيهم محلك سرك وبعد سنه محلك سر وبعد عشره سنوات برضو محلك سر ... في ناس اذا اتزاعلت مع اصحابهم يزاعلوك ليش ما ادري ... والمشكله انك لو اتصالحت مع اصحابهم يصالحوك ... في ناس المزح على كيفهم يعني هما يمزحوا لكن انت لما تمزح معاهم يزعلوا .... في ناس يبغوك تقبل عيوبهم لكن هما ما يقبلوا عيوبك .... في ناس اقتله لكن لا تمس البرستيج حقه ... وفي ناس آخر حاجه يفكروا فيها البرستيج ... في ناس تلاقيهم يتكلموا بمثاليه لكن هما ما هم كدا ابداً ... وفي ناس تلاقيهم دائماً على طبيعتهم ... في ناس التكلف والتصنع قاتلهم ... وفي ناس كلهم عفويه وتلاقيهم على سجيتهم دائماً ... في ناس اللي ما يعرفهم يزعل منهم ... وفي ناس اللي يعرفهم ابداً ما يزعل منهم ... في ناس يعرفوا يقولوا نكته ... وفي ناس احسلهم لا يقولوا نكته ... وفي ناس ما يعرفوا يقولوا نكته بس عندهم قفشات تجنن ... في ناس يستفيدوا ويتعلموا من الناس ... وفي ناس لو داروا العالم كله برضو ما يعرفوا ولا شئ ... في ناس ما يعرفوا يلبسوا ومسويين فيها انهم انيقين ... وفي ناس عندهم اناقه خاصه بيهم من فين جابوها الله اعلم( عك في عك) ... في ناس يحطوا عطور غريبه والمشكله انها دائماً تكون مركزه ... يعني لو كان عندك حساسيه ابعد عنهم ... في ناس الصديق عندهم واحد من العيله يعني زي الاخو ... وفي ناس الصديق عندهم حق وقته وبس ، يعني مو صديق ... في ناس عندهم اصحاب كتييير بس ما عندهم اصدقاء ... في ناس اهلهم اهم حاجه في حياتهم(يستاهلوا الاهل) ... وفي ناس اهلهم مالهم أي كرت عندهم ... في ناس المسينجر عندهم للصفوه ... وفي ناس تلاقي كل من هب ودب ضايفينه عندهم في المسينجر ... في ناس تضطر غير آسف انك تحط عليهم بلوك ... وفي ناس تنكسر ايدك قبل ما تفكر انك تحط عليهم بلوك ... في ناس كسلانين مره في الايميلات ... وفي ناس ماشاء الله عليهم يعشقوا حاجه اسمها ايميلات .. في ناس يعرفوا يعبروا عن نفسهم ... وفي ناس ربنا حرمهم من دي النعمه ... في ناس لما يركبوا السياره معاك يا يركبوا قدام يا يبطلوا في المشوار من اصله ... وفي ناس يحبوا يركبوا في السياره جنب الطاقه ... في ناس يسوقوا سياره من زمان بس برضهم غشم ... وفي ناس لهم فتره بسيطه في السواقه بس فنانين ...
انتظروا المزيد ... واللي يعرف ناس ... وناس ... ياريت يكتب عنهم .