PDA

عرض الاصدار الكامل : كلمات عراقية و معانيها


آزاد اسكندر
14-12-2004, 02:06 PM
بسم الله الرحمن الرحيم

هذه بعض من الكلمات العامية العراقية. نرجوا من الأخوة العراقيين المشاركة بهذا الباب

أعدها الارشيف العراقي في الدنمارك



القبانچی : الشخص الذي يوزن البضاعة

الاطرقچي : بائع السجاد والبساط

مغازچي : بائع الكراسي والمناضد المرايا واللوازم المنزلية

العبايچي : بائع العبي وينسجها

علوچي : يبيع الحبوب والطحين

العربنچي : صاحب العربة

قلمچي : تاجر التبغ . وكان لايطلق على تاجر التبغ (تاجر) بل قلنش

الفروچي : خياط العبي (الفرو)

القندرچي : الشخص الذي يصنع الأحذية

جرخچي : حارس ليلي

الحمامچي : صاحب الحمام

شابندر : رئيس التجار

گولچي : حارس المرمى ,علما ان اكثر تسميات لعبة كرة القدم هي انگليزية والسبب لأن البريطانيين هم من اتى بهذه اللعبة عند احتلالهم العراق

خشب جاوى : جاوى اسم البهارات التي كانت تأتي من مدينة جاوه في اندنوسيا وآخذت التسمية على الخشب القوي الممتاز

لولة او نبوبة : خشبة صغيرة كان يلف عليها خيوط الحرير ,وفي بعض مناطق العراق يطلق على الحنفية (لولة)

النونة :دائرة صغيرة سوداء التي ترسم بين الحاجبين

صوم زكريا : وهو اول يوم احد من شهر شعبان ,ومن تقاليد العائلة العراقية ان تشعل الشموع في صينية كبيرة فيها الحلويات والاغذية وتوضع عدة آباريق فخار فيها اوراق الياس

مواكب العزاء في يوم عاشوراء : يقال انها جاءت موروثة عن البويهيين حين دخلوا بغداد في القرن الرابع الهجري ويقال انها اقدم من ذلك

الكليدار : رئيس سدنة الروضة المقدسة كمرقد الروضة الحيدرية والروضة الحسينية والعباسية

الگيم : (القيم) رئيس سدنة المراقد المقدسة كالقاسم وغيره من الاولياء الصالحين

الآوسطة : كلمة تحوير لكلمة استاذ ,تطلق على كل عامل ماهر في الصنعة او رئيس لعمالها

النزل : مستأجر البيت

چیچان : يعني الشيشان الذين جاءوا الى العراق ايام الاحتلال العثماني

شقندحي : الشخص الفكه المحب للنكتة

القمري : الآنة الهندية وهي تساوي 4 فلوس , وما زال الناس يستخدمون (مايساوي ولا قمري) يعني لايساوي شئ

البابوج , الكلاش : نعال جلد

الأيچات : الخيول المعمرة في سباق الخيول (الريسز)

قصر : هو البيت الكبير ذو الواجهة الفخمة والذي يطل على النهر مباشرة

سكاير المزبن : سميت لوجود الزبانة في قاعدة السكارة

مزين : حلاق ,وان اول من ادخل كلمة حلاق على محل عمله هو الحلاق مكي الأشتري في بغداد (العشرينات)

صوچ . کلمة تركية معناها الذنب أو الجناية

يمعود, معود. أي طويل العمر الذي تعود عليه السنون تلو السنون وهو في أحسن حال

عالكيف. حسب المرام

الطوبچي. جندي المدفعية . طوب معناها مدفع(كلمة تركية) چي. ضمير يدل على النسب لشئ مثل (عربان چي) اي صاحب العربانة

التوثية .عصا غليظة تتخذ من شجرة التوت

جام. كلمة عربية فصيحة ,الزجاج والأقداح

محروگ الصفحة. هي شتيمة يطلقها الشامت على الميت, وتعني أن الميت قد أدخل جهنم لسوء عمله وأن جانبا منه قد أحترق فيها

فد. فرد واحد

چفيان. كلمة مشتقى من كفى.كأن يقال مثلا ,كفى الله شر فلان

ملا. كلمة أعجمية , تعني الشيخ أو الأستاذ

چلت. كلت من الكلالة أو الكلال أعيت

الگاع. القاع الأرض

جيب.أصل الكلمة فعل آمرمن جاء يجئ. فيقال هات الشئ, أو جئ به.ثم حرفت

أم الرياجيل.أي المرأة المزواج المطلاق

الآنة.(العانة) عملة هندية تسير على نظام الأربعات, فهي أربع بيزات, والقران أربع آنات, والربية أربع قرانات

السيان. طين أسود كريه الرائحة لوجود غاز الكبريت فيه, تخلفه مياه المجاري, والمياه الآسنة

البزاز. بائع القماش. البز(الثياب) مهنة البزاز,البزازة(عربية)

عزه العزاك. أي أصابك من الحزن والنكبات مايستحق التعزية وتطيب الخاطر عليه

عمامة آخوندية. هي عمامة كبيرة الجليلة القدر التي يلبسها كبار العلماء والفقهاء

الوادم. الأوادم بلهجة اهل الريف في العراق جمع آدمي

الطلي. هوالخروف الفتي, وهو أكبر من الحمل وأصغر من الكبش

خلي. فصيحة, بمعنى ,دع أو أترك

الداعي. أي الشخص المتكلم اي الداعي لكم بالدعوات الصالحة

روزخون. روز, معناها يوم. خون, معناها قارئ (اعجمية)

السردار. السر, كلمة أعجمية, معناها رأس . دار, معناها القوم,رئيس القوم

درد. كلمة فارسية تعني الألم والوجع (الشبعان مايدري بدرد الجوعان)

الشربت. هو الشراب المحلى بالسكر ونحوه

چمالة. جزء صغير زيادة عما يستحق,يكمل به الجزء الذي آخذه

عرقچين.عرق معناها معروف, والچين,كلمه تركية معناها ,ماص . فيكون المعنى,ماص العرق

السراي (الصيراي). كلمة تركية(مبنى المحافظة)

خوش. أصلها خوب وهي كلمة فارسية بمعنى جيد أو طيب

ولك ,ولچ. ويلك , ويلكي

يزمط. فصيحة اي يبالغ في أطراء نفسه وأظهار قوته

بلشه. ورطة (عاميه)

بعد عيني. ياعدل عيني

خرگه. فصيحة ,خرقة

أبو الحصين. (الثعلب) الحصيني

أبو سرحان.(الذئب)

أبو خميس.(الأسد)

أم سبعة وسبعين. هي(أم أربعة وأربعين) وقد سميت هكذا على عدد الأرجل التي في جسمها

أقتبست هذه الكلمات من كتاب(قصص الأمثال العامية) للدكتور محمد صادق زلزلة

فرهود . كان الجنود العثمانيون لاتدفع لهم مرتباتهم بأنتظام ولهذا كانوا قبل حلول الأعياد يهجمون على اسواق بغداد فينهبونها, وكان الناس قد أعتاوا على ذلك فسموه ب(فرهود)

وهي مصطلح فارسي ,فره(الكثرة) هود (الدكاكين)

طابو. بناية العقارات. كلمة تركية

زنگين .غني

موسم الصيهود.موسم الحر

كيمية. أي يدر أرباح

كليچة. كلمة ايرانية.نوع من انواع الكيك

بنفسج
14-12-2004, 05:39 PM
سيد اسكندر : هذه كلمات اغلبها منشأ تركي .. :) سوف ازيد عليها كلمه علمنا اياها شخص عراقي : اشدعوه يابا

sh dawa yaba

وهي عتب بس ع الخفيف كما شرحها لنا .

الكليدار وهو القيم علي الصحن الحيدري ( خصوصا وليس اي مقام آخر ) ربما من أصل تركي وتعني القيم علي الايوان.

بالنسبه لجيجان فهي نلفظها نفس الشي بالانجليزي واتذكر ان احد شعراء مجلس السيد الخوئي رحمة الله عليه بلندن كان شاعر شعبي عراقي اسمه : عباس جيجان ..وكانوا يسالون كيف اتقن العربيه هكذا ..الان منك عزيزي فهمت أنه ربما من أصل روسي ( تشيتشاني)

اشكرك كثيرا وانشالله ما تشوف عزا العزاك :) وكل ايامك كيميه

الدرب الى الله
15-12-2004, 12:46 AM
اللهم صل على محمد وآل محمد

ما شاء الله
طلع اصلنا اتراك

اخي من وين جبت هالكلمات :)
صراحة اكثر من نصهم مو عارفتهم ولا عارفة انطقهم
عموماً يعطيكم العافية

بس صدق اللهجة العراقية حليوة

شكراً ونسألكم الدعاء

شمعة في مهب الريح
15-12-2004, 01:59 AM
ازاد اسكندر شكرا على الكلمات العراقية والله ذكرتنى بالعراق اشتاقيتلها هواى

على فكرة شلون تعرف مصدر كل كلمة انو ايرانى ام تركي وبعدين كلمة

روزخون شوكت تستفيدوها بالعراقي شنو معناتها (قاريء يومى؟؟!!)

ولمرة الثانية تسلم على الموضوع

سيناء الرافدين
15-12-2004, 05:09 AM
والله موضوعك حلوووووووووو كثيرانا لم اعرف الكثير منهن فهن كلمات

قديمة ولكنها تستخدم في داخل العراق لم اكن اعرفهن. لكنك نسيت ان

تضع كلمة الشكرجي, وهوابو الحلويات ولكن عندي سؤال ليش يحطون جي

بالاخير؟

بنفسج
15-12-2004, 05:50 AM
جي هو من الضمائر بالتركي وتنسب للضمير العاقل

شكر تعني سكر

جي : عامل السكر

سيناء الرافدين
15-12-2004, 08:05 AM
شكرا لك على الرد اخت بنفسج وللمعلومة ايضا

سندس حبيب
15-12-2004, 09:01 AM
مشكورين على هذي المعلومات
بعض الكلمات نستعملها والحقيقة لانعرف معناها ومن اين اصلها .

كلاوجي ( او كلاوات): يعني يضحك على ذقن الناس ويخدعهم .


تحياتي

آزاد اسكندر
15-12-2004, 12:52 PM
الاخوة و الاخوات الاعزاء
تحية من أعماق القلب لكم جميعا

الاخت الكريمة بنفسج
شكراً جزيلا على اهتمامك و مساهمتك الجميلة، كما أشكرك على المعلومة بخصوص كلمة "جيجان"، لك مني وافر الاحترام و التقدير :)
_______________________________
الاخت الكريمة الدرب الى الله
مرحبا بك و مية هلا (هاي بالعراقي) :)

الحقيقة ان اللهجة العراقية تأثرت كثيراً باللغتين التركية و الفارسية، حتى صح أن نقول أنها خليط من العربي و التركي و الفارسي، و هذا التأثر نتيجة أسباب كثيرة في مقدمتها الاستعمار العثماني و الفارسي للعراق طيلة قرون عديدة، و لكن يبقى العراقي عراقي.

تحياتي لك و تقبلي محبتي و احترامي.

___________________________________________
الصديق العزيز شمعة في مهب الريح
مرحباً بك أخاً كريماً

بالنسبة لمعرفة أصل الكلمة فانه سهل للغاية، حيث يكون لكل كلمة عراقية أصل أما عربي أو فارسي أو تركي و أحيانا يكون انكليزي أيضاً.
و يستطيع أي انسان لديه إلمام بتلك اللغات أن يرجعها الى أصلها الذي يكون متداول و منتشر بين متكلمي اللغة الاصلية.

شكراً جزيلاً أخي الفاضل، تقبل احترامي مع حبي و تقديري.

_____________________________________________

الاخ الكريم sinaa
تحية و تقدير

أشكرك شكراً جزيلا على المشاركة و الاهتمام، و شكراً على الكلمة الجميلة التي قمت بإضافتها.

مع حبي و تقديري.

______________________________________________

الاخت الكريمة سندس حبيب
هلا و مرحبا

شكراً جزيلاً على المشاركة، سبقتيني في ذكر كلمة "كلاوجي" كنت أريد إدراجها :)

تحياتي لك و احترامي و تقديري و شكراً جزيلاً
___________________________________________

آزاد اسكندر
15-12-2004, 12:55 PM
الى الاصدقاء الاعزاء جميعاً

أرجو منكم المساهمة في إدراج ما تعرفون من كلمات عراقية و معانيها لتعم الفائدة (أنا عن نفسي مستمتع جداً بالسالفة) :)
بالمناسبة،سالفة يعني قصة أو حكاية.

و الله بالخير عليكم جميعاً

آزاد اسكندر
15-12-2004, 12:58 PM
طسة: معناها مطب في الشارع أو ماشابه.

الطشت أو الانجانة: معناها الاناء الكبير الذي يستخدم لغسيل الملابس عادة و لأغراض أخرى.

تحياتي و ترقبوا المزيد :)

بنفسج
15-12-2004, 03:05 PM
شكرا لك على الرد اخت بنفسج وللمعلومة ايضا

هلا :) ( اهلين فيك بلهجتنا )

_____________________________

هذه حصيلة اليوم

عزا طويريج : منطقه صحراويه بالقرب من كربلا اعتاد اهلها الخروج بعاشوراء الي الحرم الحسيني جموعا زاحفين أو حاسرين الرأس وهم مهرولين وعادة يكونون من القبائل العربيه الاصيلة النسب التي سكنت المنطقه . ينشدون شعرا شعبيا حزينا بالمناسبة الاليمه.

___________________

تمن محمر : رز أحمر بالدبس أكله جنوبيه من البصره ..في سابع يوم من ولادة الطفل يقومون يتحمير الرز بالدبس وهي أكله لذيذه وبالمناسبه سأطلب من جارنا العراقي أن يصنعها :) فهو صاحب المعلومه .
وقد صدرت هذه الاكله الي جيران العراق الخليجيين بالكويت عن طريق المصاهره والسفر .

____________________

ليلة الحنه : العروس وقبل زفافها يقومون بالاحتفال بها مع اهلها ومعارفها بصنع الحناء واشعال صواني الشموع ووضع اغصان الياس وانشاد اغاني شعبيه بهذه المناسبه وهو احتفال نسائي فقط.

توارثوها من الكلدان والاشوريين والهنود الذين سكنوا المناطق الجنوبيه من العراق. وصدرت الي ايران وتركيا

آزاد اسكندر
15-12-2004, 03:11 PM
الاخت العزيزة بنفسج

مشكووووورة على الكلمات الجميلة، أنا شخصياً عمري ما جربت التمن المحمر

ممكن ترسلين لأخوج فد جدرية لأن شهيتيني للأكل كلششش :)

شرح المفردات:
التمن: يعني الرز.
جدرية: يعني جدر الطبخ.
كلش: يعني جداً أو كثيراً.

تحياتي للصديقة العزيزة بنفسج :)

بنفسج
15-12-2004, 03:53 PM
الاخت العزيزة بنفسج

مشكووووورة على الكلمات الجميلة، أنا شخصياً عمري ما جربت التمن المحمر

ممكن ترسلين لأخوج فد جدرية لأن شهيتيني للأكل كلششش :)

شرح المفردات:
التمن: يعني الرز.
جدرية: يعني جدر الطبخ.
كلش: يعني جداً أو كثيراً.

تحياتي للصديقة العزيزة بنفسج :)


العفو انتا مشكور آغاتي العزيز آزاد اسكندر


انشالله نعزمك ع خوش جدرية تمن محمر :) ببيت خوش وادم وما يطلع زميلنا محروك الصفحه :)
يا رب لا يفشلنا( وباللبناني يجرسنا ) ويطلع أبو خميس أصلي مش ابو سرحان وتصير بلشه !!

آزاد اسكندر
15-12-2004, 03:58 PM
خلص لعد آني راح أجوع نفسي من هسه. :)

هسه: يعني الآن.
لعد: يعني إذاً.
راح: بمعنى سوف.

بنفسج
15-12-2004, 03:59 PM
اليك صديقنا العزيزي أزاد اسكندر حصيله أخري :

سياح : كريب ع الطريقه العراقيه ينتشر بالجنوب ( العماره ) وهو خليط من الماء والعجين وهي رقائق تشبه الكريب او الكلاج هشه ورقيقه للغايه من اقراص العجين تؤكل مع القيمر ( قشطه )

هيج : لفظه فارسية تعني لا شئ

أ يا با a ya pa: تعبير أعجاب بالشئ

آزاد اسكندر
15-12-2004, 04:06 PM
ههههه

أيا با على هل الاكل، يمعودة هلمرة دخلنا عل ريوج ،بعد شيخلصنا
تره و الله هسه أرجع للعراق اتغده و أجي :)

بلله من يمج شوية راشي رحمات على ذاك الجد الطاهر :)

ريوج ryog يعني وجبة الافطار.
هلمرة: هذه المرة.
تره: تعبير لتوعد شخص أو التوعد بشئ.
يمج ymech: يعني جانبج و للمذكر تصير يمك

بنفسج
15-12-2004, 04:17 PM
لا يا معود :) : ترجع العراق وتصير بلشه براسي أنا !

_______________

الامثال

وأنا أخوك يا حمود : تضرب لدي
القبائل العراقيه العربيه ويقصد بها اثارة غيرة الافراد لنصرة شخص منهم

عركه مركه ما كو ..زبنه مبنه ماكو

يضرب لمن ينشد المعارك ولديه فضول لمعرفة اسرار ومشاكل البيوت

عركه : عراك

مركه : مرك لفظه فارسيه يعني قتله باللبناني :) او موت

ماكو : الا يوجد؟

زبنه : كلمة عربيه تعني مكان لاختبئ فيه
مبنه : مبني او بناء

الشرح: الا توجد معركه او قتله بين الناس؟
وبعد أن تحصل مشاكل له كثيره من فضوله فلسان حاله يقول

الا يوجد مكان اختبئ فيه من الناس


________________________

ابن عنتكه : bully فتوه كان مشعور بعراكه مع العثمانيين بالعراق مع عصابته وتطلق علي كل شخص مفتول العضلات او من يظهر قوته علي الضعفاء ايضا

متل بو عنتر لدينا يعني :)

آزاد اسكندر
15-12-2004, 10:46 PM
مشكورة أختي بنفسج على هذه الامثال الجميلة، ننتظر منك المزيد :)
بس اني اذا رحت و نخطفت الفدية عليج :)

و هذه مجموعة من المعاني:

ضايج: يعني زعلان أو مكتئب

خاشوقة: يعني ملعقة

جطل: يعني شوكة تناول الطعام

ماعون: يعني صحن

طوبة: يعني كرة و يطلق أيضاً على لعبة كرة القدم اسم "طوبة"

بلم: قارب صغير

مشحوف: نوع خاص من القوارب الصغيرة يمتاز بالطول و يكثر استخدامه في منطقة الاهوار

جفجير: هو الملعقة الكبيرة التي يسكب بها الطعام

قيمه: هي أكلة يصنعها العراقيين في عاشوراء يشتهر بها أهل النجف بشكل خاص

صفرية او صفرة: سفرة الطعام التي تفرش على الارض

الزهراء2000
16-12-2004, 03:06 AM
كنت مفكرة انوا اللغة الانكليزية صعبة

بس لقيت انها مش اصعب من اللهجة العراقية :)

موضوع جميلللللللللل

سيناء الرافدين
16-12-2004, 03:11 AM
كلمات غريبة عليا خصوصا كلمات اهل الجنوب على الرغم من اني عراقية

واحلى شي جملة ايااا باااااااااااه ولمن رحت للعراق تعلمتلي كم

كلمة منهم مثل

جمبر chamber يعني الدكان الصغير مثل الكشك وكلمة بسطية يعني بسطة بالشامي

Moayad
16-12-2004, 05:47 AM
شكرا آزاد .. وردة

عزه العزاك: اليوم بالتحديد سمعتها:)

ومفردات ..
بَنكة: فارسية = مروحة
ميز : فارسية = منضدة
جرباية : سرير (فارسية: جوار- باية أي ذات أربعة أرجل)
كرويتة : أريكة
مندر : فراش السرير
جودلية : بساط rug
صوندة : أنبوب الماء ( فرنسية أو انكليزية Sonde)
بيجة بال- ch: شرفة المنزل أو سياج السطح.

وللمعلومات فهناك قاموس اللهجة العراقية الى اللغة الانكليزية أعده بريطانيان في اربيعانات او خمسينات القرن الماضي وموجود في الأسواق ويمكن شراؤه على الانترنت.

بنفسج
16-12-2004, 06:13 AM
:) لا دير بالك من أبو سرحان يخطفوك ..تريق عنا سياح ولا هالبهدله !!

عزيزي أسكندر ومؤيد : اللهجه جميله للغايه وأتعلمها لان مفرداتها قريبه كلش هوايا من التركيه ..آياباا :)

أحب أن اضيف التالي

خاشوقه = قاشوق وتعني ملعقه بالتركي والهاء للتانيث

قيمه : هي أكله كربلائيه وتطبخ أيام العزاء بمحرم وصفر وقد أكلتها قبل سنوات - خوش جدريه :) - من مركز السيد الخوئي رحمة الله عليه

جورابايه = جهار بايه وتعني الاعمده الاربعه بالفارسي

جونيه : شوال الخيش وتوجد مناطق بلبنان لها نفس الالفاظ

_____________________________

الملابس

داري : اللفظه تعني الفارسيه القحه وهي لغة الروس والهزاره الافغان
لكن ايضا تطلق علي مقامات شعريه ونوع من غطاء الرأس للمرأه مزين وجميل

المتيل mtayal : ثوب نسائي جميل ترص فيه حبات الستراس او الذهب يلبس بالاعراس والمناسبات وحفلات الاستقبال
واذكر أن عائلة القزويني وعدوني أذا اتقنت العربيه بهديه ..ولما صار كلامي خوش :) أهدوني اياه وكان ثمينا بقيمته حتي لآنه من ارث السيد الجليل .

السدراه أو الفيصليه : غطاء للراس للرجل دخل علي العراق من الحضارات الهنديه والتركيه والفارسيه سمي بالفيصليه نسبة الي الملك فيصل الاول وهو مثلث الشكل ويعطي هيبه وربما منه جاءت لفظة : سردار
وتعني المهيب ورئيس القوم

العباءه النجفيه : عباءه ذات حياكه جيده تشتهر بها منطقة النجف وتتميز برقة قماشها فهي صيفيه ويستخدمون خيوط الذهب بالتطريز
ويطلق عليها بشت وهذه كلمه فارسيه تعني الظهر

وتخاط ايضا منها عباءات للنسوه للمقتدرات منهن

ترجيه tartcheyah : تعني قرط الاذن للفتاة ربما من اصل تركي ايضا


بالنسبة للبريطانيي فأحب أن اضيف بأن
هناك جاليه بريطانيه بالسلك الديبلوماسي يتقنون العراقيه أحسن هوايا مني ومن ياللي متلي بسبب تولدهم هناك والبريطانيين لا تعصي عليهم لا لهجه ولا لغه فبالهم طويل ولهم قدره وتمكن عجيبان بالتعلم
جماعة بو سرحان هدول :)

..خوش والله :)

بذمتك سيد أزاد: أنا خوش بنيه والا شلون هههههه

وبالمره آزاد تعني الحريه باللغات الفارسيه - التركيه - الكرديه

بنفسج
16-12-2004, 08:13 AM
أغاتي العزيز أزاد شلونك؟ وشلون كيفك


الفاظ تحبب


_____

يا بابا خذني وياك..ساعه ما اقدر بلياك :تضرب للمقرب والحبيب ..نطلب منه ان ياخذنا اينما ذهب فلا نستطيع فراقه ولو ساعه
بلياك : بلا اياك



يا بعد هلي وطوايفي : الدعاء بالسلامه وطولة العمر فلا ينتهي عمره الحبيب الا بعد انتهاء حياة كل الاهل والطائفه :) ويقصد بها العشيره لدي العراقيين ..وليس طائفة الدين


هلا أو هلو زاير : الزاير لفظه تطلق علي من زار المقامات والاضرحه المقدسه لدي الطائفه الشيعيه .

محبه تشلبيه : محبه جميله باللغه التركيه تشلبي تعني جميل


لفظه تطلق للمزح والضحك بين المقربين ..

اشبيك اليوم ؟ ماكل باجه ما تتحاجه :) : ماذا بك اليوم
هل اكلت باتشه ( مقادم الخواريف باللبناني او كوارع بالمصري ) فلا احد يستطيع ان يكلمك لانها اكله دسمه تحتاج للراحه !!!




_______________


وبمناسبة الرئيس الحالي للعراق الياور فنقول

ياور : رتبة عسكريه تركيه تعني العسكري او ضابط الجيش

شلبي او تشلبي : كلمه تركيه تعني الجميل

الباجه جي patcha tchi : من التركيه باشه جي اي الباشوات والاعيان

آزاد اسكندر
16-12-2004, 11:33 AM
الاخت كريمة الزهراء 2000

كل الهلا عزيزتي، الحقيقة اللهجة العراقية برأيي (بدون أي تعصب و عنصرية)
أحلى لهجة عربية، لأن الواحد يحس الكلمات الها وزن :) .
هذا رأيي طبعا مع كل المحبة لكل اللهجات.
شكراً جزيلاً للمشاركة.
____________________________________________
الاخت العزيزة سيناء

هلا بيج خيتي
مشكورة حيييييل (حيل=كلش=هواية=كثيراً)، مشكورة على كلمة الجمبر، ذكرتيني بأيام الحصار و جنابر (جنابر=جمع جمبر) الجكاير :)
طبعا أصل هذه الكلمة انكليزي كما هو واضح
بانتظار المزيد منك و شكراً لك مع خالص الود :)

آزاد اسكندر
16-12-2004, 11:36 AM
الاخ الكريم مؤيد

مشكور على هل مشاركة الحلوة، كلمات جميلة و عراقية قح، ذكرتني بأيام زمان
أنتظر منك المزيد من الكلمات العراقية الجميلة.
كل المحبة و التقدير لك أخوية العزيز. :)
سؤال:هل يوجد قاموي عراقي-عربي؟

آزاد اسكندر
16-12-2004, 11:50 AM
الاخت العزيزة بنفسج

خلاص يلله اني هسه كاعد و بعدني ما متريج، بس على هل حجي (حجي=كلام) ينرادلنا فد جاي (جاي=شاي) عراقي أصيل :)

بالنسبة لكلمة جرباية بمعنى السرير،فإن كلمة جوار=جهار=أربعة و لكن أعتقد كلمة جوار التي أوردها الاخ مؤيد أصح :) .

أما عن المتيل فهذي الحقيقة معلومة جديدة عليه بالمرة فشكراً لكِ، و لكن سردار ليست مأخوذة من السدارة و لكن هي كلمة فارسية و كردية تعني رئيس القوم (سر=رئيس ، دار=القوم).
و كلمة ياور معناها بالتركي فيما أعلم المرافق الشخصي (Body Gard).

بس الصدق غير بنفسج مو بس خوش بنية، بنفسج سباعية :)

سباعية: كلمة تشجيع تقال للبنات الصغيرات ،وهي عبارة عن تأنيث كلمة سبع بمعنى أسد.

بس احنا نشوف الريوج شلونه و بعدين نحكم الحكم النهائي :) .

تحياتي لك أختي الكريمة بنفسج :)

آزاد اسكندر
16-12-2004, 11:58 AM
جحنتي: هذه صفة تطلق على الرجل الضخم مديد القامة.

شقاوة أو شقي: هو الرجل الفتوة الذي يجمع الاتاوات من الناس نظير حمايتهم.

خاوة: الاتاوة.

بردة: هي الستارة في المنزل.

كنتور: خزانة الملابس، اصلها انكليزي.

درنفيس أو درنفيز: المفك.

جاكوج: المطرقة.

قنفة: الاريكة.

زولية: السجاد المنزلي (الموكيت).

دربونة: هي الطريق الضيق بين البيوت و عادة تكون في المناطق الشعبية.

بيتونة: منور المنزل.

بزونة: القطة.

عتوي: يعني الهر، عند أهل البصرة خصوصاً.

الشط: النهر.

بس عجبتني بنفسج كلش من قالت معنى آزاد :)، و بالمناسبة كلمة بيشمركة بالكردي معناها الرجل الذي يحمل روحه على كفه، و هي تطلق المقاتلين الكرد.

و ترقبوا المزيد في الحلقات القادمة... :)

Moayad
16-12-2004, 07:23 PM
آزادي العزيز
ما أدري اذا كان هناك قاموس عراقي- عربي .. على اية حال موضوعك هذا هو بداية قاموس .. وهناك ايضا كتب عن الأمثال العراقية يمكن اضافتها للقاموس لمن أراد أن يحاول بجد :)

فيمالا !

الشمس المهدوية
16-12-2004, 07:57 PM
حياك الله و بياك اخونا الفاضل آزاد ...

سبقتني و الله لاني كنت اعد موضوع مقارب لموضوعك و لكن ماكو فرق ان شاء الله كلنا اهل و لو اني شاركت بموضوع اخر و لقد حذف بعد الهجمة الوهابية الارهابية بس انتوا الخير و البركة ,,,,,

بعض الكلمات العراقية تكون صعبة لان و كما تعرفون بأن اهل الجنوب كلامهم يختلف عن البغادلة ( اهل بغداد ) و اهل الموصل ايضا عندهم مصطلحات شامية هواية ,,,,

و الله مرات اقرأ الشعر الشعبي العراقي و هو معظمه جنوبي ما افتهم منه شي على الرغم من اني جنوبية هههههههههه

لان الجنوبي القح صعب هواي و حتى لو فسرتها لغير العراقي يكون للكلمة معنى مدغم اكثر وضوحا للعراقي من غير العراقي .

و هو كما ذكرتم بأن اللهجة العراقية هي خليط اما من المستعمر عثماني انكليزي او بسبب دول الجوار التي لا بد ان نتأثر بهم و هذا طبيعي لان كل دول العالم هي متأثرة او مؤثرة ببعضها البعض .

المهم حياكم الله جميعا و هلا و مرحبا بهلي و ناسي ,,,,



اختكم
براثا

بنفسج
17-12-2004, 06:34 AM
عزيزي اسكندر : انا قلت ربما :) بالنسبه لكلمة سداره

ايا با علي معني آزاد :) كلش حلو هوايا ..

_____________

الريوق جاهز وتفضل عدنا يابا ولا بلشة الخطف والرجعه للعراق :) بيت زميلنا العراقي علي بدريسدن ع الشط :) ما يضيع العنوان
وأخليه يعملك تشاي مخدر أصلي تكرم عيونك

بالمناسبه يسلم كتير علي الجميع ويقول : مو خوش باب فتحته :)
مزح ..

يا الله نريد واسطتك وتخلي الياور ينطينا الجنسيه العراقيه :) حتي ننتخب

دام أني أحجي كلش زين وسباعيه( هاي مرتو لابو خميس !!) ولا تنسي أني عرفت اسمك

وبينا وبين اياد علاوي ( جماله :) ) نسب من ناحية الام فخواله من بيروت ودارس طب واحجي لهجته .بعد شتردون اكثر :) ههههه


بس نريد معني فمالاو تبع زميلنا العزيز مؤيد !! آي هوو نسي يترجمها يابا احنا ناس نرطن :) ما نفهم حجي العربي كلش زين




تفسير الكلمات
آي هو : تعبير عن السخط بشكل ضاحك

رطن : الذي يتكلم بلسان غير مفهوم

أو من اصول أجنبيه غير عربيه

الزهراء2000
17-12-2004, 07:28 AM
الحقيقة انها لغة جميلة

وها انا بدأت بممارسة بعض التعابير

موضوع جمييييييييييييييييييييل

تحية الى اهلنا العراقيين

بنفسج
17-12-2004, 07:34 AM
القسم الديني والاهازيج الحماسيه

_____________

و الزهرا الزتشيه : يختص بالزهراء الزكيه

وأبو محمد الدجيلي : شقيق الامام المهدي القائم سلام الله عليهما ويقع يناحيه نهر الدجيل ..كان عالم جليل تقي ..خرج للبلده سبع ( أبو خميس يعني :) ) فارهب الناس وقتل منهم مقتله عظيمه ولجئوا اليه لحل هذه المشكله..فتصدي للأسد وخلص الناس منه ..مقامه موجود مبارك الي هذا اليوم

هاي حوبتي : حوب من القرآن الكريم : واتقوا الله أنه كان حوبا كبيرا

يقصد به العقاب الالهي لصاحب النوايا السيئه .

حلف الامام العباس : ياتي المتنازعين فرادا او مع شيوخ كل عشيره منهم الي مقام الامام العباس عليه السلام ومعهم شيخ دين مفوض من المرجع ان كانت المشكله كبيره هوايا وقديمه كارث دم وماشابه
فيحلفان بالتبرأه وايقاف القتل ويكتب بالحرم الطاهر ويشهد الشهود الامام العباس علي التزام كل طرف..وقد نقل الينا ثقاة طريقة هذا الحلف وشهد نزاع عشائريا لم يوقفه الا هذا القسم.
بالمناسبه احد افراد اسرة القوزيني التي ارتبط فيهم نقل الينا حادثه كان هو طرفا فيها قديما جدا وايام مرجعية السيد الحكيم رحمة الله عليه ..حيث شهد العراق حمام دم بين عشيرتين لم تستطع الحكومه وقفه ( العشيرتين شيعه اكيد مش سنه ) فارسل ابنه الاكبر الشهيد مهدي الحكيم اليهم ..والقي بعمامته بين العشيرتين ..يقول القزويني : فورا ارجعوا الاسلحه واوقف المشكله

وانا لاحظت ( هاي بنفسج تحجي مش القزويني :) ) ان العشائر الشيعيه( فقط) العراقيه لديهم نخوه والتزام ديني عجيب..الله يحفظهم


الفصل العشائري : نفس اسباب حلف الامام العباس وفيه يفصل بين العشيرتين بمبلغ مالي ( ديه ) او تزويج فتيات من القبيله المتهمه الي من تطالب بالثار وتسمي ( فصليه )

بالمناسبه وقبل مده ..شهد الجنوب العراقي فصل عشائري بين جندي دانماركي قتل بقرة لعائله من احدي العشائر وجاءت القوات البريطانيه ( مو قلت لكم هدول ابو سرحان :) ايابا ع تفكيرهن ) وفصلت ودفعت الديه كامله :) خوش تفكير

دخيلك يا ربي :اي اني دخلت بحماك فاستر علي يا الهي ..احيانا تقول للتعوذ من امر خطير الا يصيبنا


ابو صالح ..ادركني سيدي : نداء حمايه للامام المهدي سلام الله عليه
والعشائر العربيه تكنيه ابو صالح المهدي ..لانه رجل وعبد صالح يملآ الارض بالصلاح والعدل .

يا ابا الحسن ..دخيلك : ما في كلام ..هاي نداء كلش قوي يخص الامام علي سلام الله عليه وفيه اثر عجيب

------------------------

الهوسه : اهزوجه شعبيه يقوم بها الرجال فقط ومن ملاحظتي فهي تتم بطريقتين
1- اما الهروله المتناغمه الي الامام

2- اما باللف حول علم ديني او عشائري بشكل دائره

يصاحبها اهازيج وابيات شعريه شعبيه تقال بالحال !! ايابا هاي شلون شاطرين العراقيين بالشعر :) مسكوا الخشب

واصلها كلداني واشوري ولا يقوم بها سوا العراقيين فقط



يا قاع ترابج كافوري : اهزوجه او هوسه كما يسمونها العراقيين ايام ثورة العشرين ..لما تحررت العراق من حكم البريطانيين فالارض او القاع اصبحت مطهره منهم او مقبره لجثثهم


منصوره يا حوزة حيدر : اطلقت ايام الانتفاضه الشعبانيه الي هذا اليوم وهي تندد بكل من يريد قسم الحوزه الي اراء او ايتاء السوء لها


________________________________

الفاظ اخري

الدرواشه : الدراويش الصوفيين

التهليله : حلقة الذكر للصوفيين العراقيين

الملوي : الصوفي العراقي الذي ينغم التهليله بدورانه الكوني

تكيه : لفظ تركي وتعني المقام الديني او الضريح واحيانا مكان استراحة وتجمع الدراويش

________________________

أجدد طلبي باعطائي حق الانتخاب بالعراق :) وأريد واسطتك عزيزنا آزادي .. مو عزمناك وتريقتك خوش ريوق

بعدين شايف كيف انا بفهم واحجي عراقي كلش زين :)


....بعدين الياور نسيب كردستان حسب ما اعرف يعني انشالله واسطتك مضمونه

بنفسج
17-12-2004, 07:39 AM
عزيزنا مؤيد : شو رأيك؟
أعمل أني قاموس حجي عراقي ؟
رأيك اصلح للمهمه ويطلع قاموس أبو خميس :)
والا قاموس أبو سرحان ؟ محروك الصفحه

بنفسج
17-12-2004, 08:06 AM
العداده : وهي المرأه التي تقرأ القرأن وتنشد الشعر الحسيني بالعزاء وتهلل بالخير بمناسبات الزواج والافراح والمواليد

هناك معلومه تهم بالاخص عزيزنا مؤيد :) : ان من عادات العشائر العراقيه وقت الزحف الي الاعداء ان يوكلوا مهمة استثارة الغيره والنخوه الي امرأه جليلة القدر من أرقي الاصول العربيه وتجيد الخطب

يوكلوا اليها مهمة الصدح بالتجمع وبذل الروح ..وقد قامت السيده زينب بهذا الدور ونسوه عراقيات ايام ثورة العشرين والشهيده بنت الهدي الصدريه

يقال أنها ستكرر ايام ظهور الامام المهدي للفت انظار الشيعه الي القائم الحقيقي ..فياله من دور - ان صحت هذه المعلومه - وبارك الله بهذه المرأه ان هي موجوده الان وحفظها من كل سوء

___________________

نواب : لفظ تطلق علي حاكم اقليم الشمال الهندي ( محرفه من نائب )
ايام الحكم البريطاني للهند

ايام ثورة العشرين كان عقاب الثائرين هو التسفير الي الهند ( سفر برلك باللبناني ) ولم يسلم منه حتي المرجع النائيني الذي كان عجوزا طاعنا بالثمانين .القزويني والاصفهاني وكل المراجع الشيعه ( فقط ) الذين قارعوا الاحتلال سفروا وهجروا الي هذه الديار الغريبه الموحشه
وبكشمير وحيدر أباد انتشر المذهب الشيعي بسبب التزواج .وكانوا حكام الاقاليم هناك...وعاد قسم منهم الي موطنه الام ..ومن اشهر عائلة نواب هو الشاعر العراقي : مظفر نواب


بمناسبة الحديث عن الهند : الامام الراحل الخميني هو ايضا من اصول هنديه ناحية الاب.

والي يومنا هذا فالبيوتات الكشميريه لا ترضي بمصاهرة اي شخص ويعتزون باصلهم العربي الشريف ..

آزاد اسكندر
17-12-2004, 12:30 PM
الاخ مؤيد العزيز
شكرا لتشجيعك ،ايدك ويانا و نسوي احسن قموس عراقي عربي و آني عليه الترجمة للكردي :)

فيمالا: يعني في أمان الله، كلمة توديع.

آزاد اسكندر
17-12-2004, 12:36 PM
الاخت العزيزة براثا
و عليكم السلام و رحمة الله

كل الهلا بيج أختاً كريمة، ندمج الموضوعين و يصير صدك قاموس :)، نريد مشاركتك ويانا خصوصا انتي من أهل الجنوب الحبيب يعني تقدرين تعطينا كلمات جميلة و أوافقك على صعوبة اللهجة الجنوبية خصوصاً للذين لم يخالطوا عشائر الجنوب كثيراً.

تحياتنا جميعا لك و مرااااحب :)

آزاد اسكندر
17-12-2004, 12:45 PM
الاخت الغالية بنفسج

تره اني و الله خطية يوميا افتح النت الصبح قبل الريوج و توصفيلي انتي هذا الريوج العراقي الزين بعد حتى دربي ما اشوفه :).
بالنسبة للجنسية العراقية احنا حاضرين للطيبين بس المهم يكون الاب عراقي، و بما انو نسيبنا صار الياور شغلتج مضمونة :)، بس لازم تقيمين بالعراق و اذا نخطفتي معلينا :)، لا صدق الجنسية ان شاء الله تكون سهلة للعراقيين على العهد الجديد.

يابة القاموس نسوي سوية :) حقوق الطبع محفوظة،بس اذا الواحد يتريج ريوج زين و ية جاي عراقي يكون الموضوع مختلف :).

مشكورة خيتي العزيزة على المعلومات الرائعة عن الامور الدينية فيها أشياء لم أكن أعلم عنها شئ.

فيمالا:في أمان الله.

آزاد اسكندر
17-12-2004, 12:50 PM
و هاي بعض الكلمات:

بنجرجي أو فيترجي: الشخص الذي يعمل في تصليح السيارات
جوه: يعني في الداخل.
بره:يعني في الخارج.
جراوية: هي الشماغ عندما يلف على رأس بشكل يشبه العمامة.
طاولي:لعبة الزهر
دومنه:الدومينو
ابو الدقايق أو أبو المكسرات: صفة طلق على الشخص الذي تكثر مشاكله و مصائبه

بنفسج
17-12-2004, 12:59 PM
خلاص انا وانت سويا ندخل العراق حتي ننخطف مع بعض والفديه تكون ارخص علي بابا بالدفع :)

انا علي طول معروف مصيري :) يمكن انتا ارحم مني شوي ههههه عندك واسطه يا معود

نشترك بالقاموس بعدين الفلوس ندفعها فديه للمحروكين صفحتهم :)

انا هسه اقدم طلب جنسيه اعتمد عليك اغاتي ازاد ونحجي مع علاوي جماله


الريوق علينا قيمر الحله وسياح .اياباااا وتشاي زنكين مخدر ع الفحم

خلاص ما نحجي عن الريوق خطيه عزيزنا ازادي جاع هوايا

لا يرفع علينا قضيه وتصير بلشه ! :)

آزاد اسكندر
17-12-2004, 01:08 PM
توكلي على الله خلص الجنسية عليه، آني أروح لعمو علاوي و اتوسط يمه :)، و بالنسبة للفدية تره أخوج ما عنده و لا قمري أبدا :)

الله، قيمر و كاهي و دبس ،اويلي يابة

:) ، يلله نسوي القاموس و نطبعه يمكم بلبنان ؛)

و سلامي للأخ أبو خميس و اهله الكرام

ابومهدي
17-12-2004, 01:11 PM
السلام عليكم

شكراً لك أخي اسكندر على هذا الموضوع الممتع

انا عندي فد كلمتين.. بس اخاف انه بعض الأعضاء سبقوني بيهن

دربونة

وكظه.. أكظه.. يكظه.الخ

شكراً للأخت بنفسج اللي شهتنا على الريوق

بس صدق انا مشتهي باقلا ودهن

تحياتي للجميع

بنفسج
17-12-2004, 01:18 PM
هلا بيك ابو مهدي :)

عاد اشرح النا حتي نبلش مرتن لوخ جارنا علي ياللي يهديكن جميعا هالمثل العراقي

يا بو بشت ..بيش بلشت :) هههههههههههه

الظاهر شوي ويقول النا : فمالاه :)


لا صدق انت ولا قمري وانا ولا يورو :) خو مو تقول بنت زنكين

لوخ : اخري

خو : تعبير من اللغات الفارسيه التركيه .. ملحق بالكلمات للتفسير

بيش : باي شئ

انت يا صاحب العباءه دخلت وبلشت باي مشكله ؟

بس بذمتك ورحمه علي ذاك الجد الطاهر :) : ما كظيت الكلمات

العراقيه كلش زين ؟ :) اريدك تمدحني قبل لا يخطفوني اولاد المشيوي :) ( تعبير اخو محروك الصفحه )

ابومهدي
17-12-2004, 01:27 PM
زين يابه

دربونة.. هي الزقاق الضيق في الحواري

مثل بيتنا القديم في كربلاء.. مازلت أتذكر كيف كان
ندخل في زقاق، ثم ندخل مرة أخرى في زقاق أصغر
حيث انه لا يكفي لشخصان، في منطقة باب الطاق


وكظه.. الظاهر هذي الكلمة لأهل الجنوب، مثل البصرة والعمارة

وهي كمشه.. يعني امسكه

والله العالم

شكراً لكم

الابرار
17-12-2004, 02:10 PM
السلام عليكم جميعا

موضوع اكثر من رائع

في كلمات عراقية اخرى مثل



جفجير..وهوملعقة كبيرة خاصةللاكل

روزخون. معناها قارئ (اعجمية)


صوچه هو ... کلمة تركية معناها الذنب أو الجناية,,او هو من اذنب


عرقچين..وهذه ايظا الچين كلمة تركية.وهو يلبس على الراس


بزونه ..يعني قطة

وردة محمدي.يعني وردة الجوري

كونية تمن..كيس رز

جوزدان..وهي محفظة صغيرة للنقود..



اختك الابرار

آزاد اسكندر
17-12-2004, 03:10 PM
كل الهلا بيك ابو مهدي
هلا بيك و بكل أهل كربلاء أهلنا و أحبابنا
مشكور عيوني على الكلمتين الجميلتين، نريد المزيد من الكلمات خصوصا الكربلائية

تحياتي لك مع خالص الود :)

آزاد اسكندر
17-12-2004, 03:13 PM
بنفسج أحرزج حزورة شنو يعني كلمة "طاوة"؟

أحزرج: يعني أقول لك أحجية
حزورة: يعني أحجية أو لغز

ها شنو يعني طاوة؟، تره هذا السؤال اختبار علمود الجنسية :)

علمود: يعني من أجل.

آزاد اسكندر
17-12-2004, 03:16 PM
الاخت الكريمة الابرار
حياج الله بين أخوتك و أخواتك، مشكورة على الكلمات، بس عندي سؤال كيف كتبت حرف ج Ch ؟

بانتظار المزيد من المشاركات

مع إعزازي و تقديري :)

آزاد اسكندر
17-12-2004, 03:24 PM
تحياتي للأخوة جميعاً، طبعا اللهجة العراقية فيها كلمات ينادي بها الاهل بعضهم بعضاً، مثل:

يابة أو بوية: نداء الاب، بمعنى أبي.

يمة أو يوم: نداء الام، بمعنى أمي.

خوية أو خيي: هو الاخ.

خيتي أو أخيتي : هي الاخت.

رجلي، أبو عيالي، ابو الجهال، الرجال، ابو البيت: كلها مفردات تقصد بها الزوجة زوجها.

مرتي ،أهلي، أم عيالي، ام الجهال، المره: كلها مفردات يقصد بها الزوج زوجته.

داية: كلمة كردية و تركية في الاصل تعني الام.

باجي: كلمة بغدادية تعني العمة.

جدو: هو الجد.

بيبي: هي الجده.

و أخيراً يوجد مثل عراقي يقول "ابن عمي شيال همي:

و تحياتي للجميع :)

بنفسج
17-12-2004, 04:11 PM
بنفسج أحرزج حزورة شنو يعني كلمة "طاوة"؟

أحزرج: يعني أقول لك أحجية
حزورة: يعني أحجية أو لغز

ها شنو يعني طاوة؟، تره هذا السؤال اختبار علمود الجنسية :)

علمود: يعني من أجل.




هسه عرفنا معاني السياح والتهليله وجماله الفصل وحلف العباس :)

عرفت المتيل والسداره و الكلمات ياللي ما يعرفها حتي العراقي جبناها وأنا بنت أبو خميس :) ..

وريقناكم تشاي مخدر وحتي فلوس الفديه تكفلنا بيها :)

جماله أكو اختبار جنسيه !!!! عزااااا هههههههههه

طاوه عيني من أدوات الطبخ وياللي يصنعون عليها خبز طاوه وهي شبيه بالمقلاة المسطحه

هسه أطالبك بالجنسيه ( علمود وعدك :) )

بنفسج
17-12-2004, 04:16 PM
عيني آزادي أحزرك أني هسه

يعني شنو قصايب ؟

علمود نقنع بابا يدفع النا فلوس الفديه اذا سافرنا العراق للريوق :)



شفت شلون انا كلش خوش بنيه هوايا :)

سيناء الرافدين
17-12-2004, 05:45 PM
وشخوش اني كل يوم اجيبلكم كلمة كلمتين

اليوم جايبتلكم كلمة استكان وهو كاسة الشاى بس صدق الكلمات اللى

تخليها بنفسج مانعرفها ولا حتى نستخدمها مثل السياح وغيرها عجيب

شلون تعرفين هاى الكلمات وانت تكولين انج مو عراقية

الكلمة الثانية اللى جبتها وهاى تعلمتها ايضا من العراق لمن تنزل

من السيارة او تريد توكف وصارتلى نكتة طبعا لمن رحت قتله لابو

السيارة على اليمين على مهلك وطبعا اخذتها هاى الجملة من اهل

الشام اشو ابو السيارة كام لف يمين وانى اكوله انى مو قتلك على

اليمين واقصد انه يوكف هو يقولى لا انتى قلتيلى على اليمين يعنى

يلف يمييين وهما يقولون( نازل يابة) عندما يريدون الوقوف :D:D


هاا وكلمة ثانية هم سمعتهم يقولونها وهي لمن تزور احد يعني توديلها هدية انى اقول راح اودي واجب لفلان

هما يقولون اودي فضل

اودي يعني اخذ معى واعطي لفلان من الناس

يلا هاي الكلمات كافية لليوم

آزاد اسكندر
17-12-2004, 06:39 PM
عيني بنفسج شنو هل شطارة، صايرة نار كبرة :)

الاجابة صحيحة و الجنسية خلص مضمونة بالجيب :)

بس حزورتج سهلة كلش لا تنسين تره آني عراقي أصلي،

قصايب يعني الضفائر للبنت أو المرأة، ها يابة شلوني ؟؟ :)

يلله هسه صارت الفدية على عمي أبو بنفسج ،

زين يا بنفيج السباعية شنو يعني "لالنكي" ؟؟

هاي اصعب شوية، يلله حتى نحصل الجواز فد مره :)

آزاد اسكندر
17-12-2004, 06:42 PM
الاخت الغالية sinaa

مرحبتين بيج و بكلماتج الجميلة عيوني، و الله سبقتيني بكلمة استكانة كنت أريد أكتبها هسه :)

كل الهلا بيج و ننتظر مشاركتج ويانا :)

بنفسج
17-12-2004, 07:08 PM
اكيد اعرف عراقي لاني سباعيه( عيلة بو خميس :) ) وعندي خوش فكر ايا با عليه
بعدين البركه باللي يمي يغشش :) هاي شلون بلشه ما اعرف منو داعي عليه عزا العزاك ههههههه

سؤالي سهل تا انجحك بس لالنكي هاي تركيه الظاهر يمكن فد لون حلو من لون الورد ( بس اذا خطأ الجواب مش ترجع بكلامك وما تنطينا الجنسيه )

شوي بس يغششنوني بعدين اردلك جواب
فيمالاه

بنفسج
17-12-2004, 07:31 PM
وشخوش اني كل يوم اجيبلكم كلمة كلمتين

اليوم جايبتلكم كلمة استكان وهو كاسة الشاى بس صدق الكلمات اللى

تخليها بنفسج مانعرفها ولا حتى نستخدمها مثل السياح وغيرها عجيب

شلون تعرفين هاى الكلمات وانت تكولين انج مو عراقية










مسكوا الخشب يابا :) اني لغة اجدادكم الاشوريين افتهمتها
تردون لهجتكم هسه ما اعرفها !! :)

درست بكلية لغات شرقيه سابقا (بس سنه فقط ) وطلعنا البابا ودخلنا طب..كنت هوايا شاطره
اذا تلاحظي بس تشرحوا لي الكلمه اول مره استخدمها علي طول وما اخجل او اهاب ردود الفعل .. واحاول افهم لماذا الكلمه تقال بهذه الطريقه وما اصلها ..اعجبتش كلش :)


وينك سيد قزويني : شوف شلون صرت نار كبره بعد ما طلعت عيونك سنين :) المسكين شاف ضيم هوايا وهوا يعلمني ..عزاا ههههههه

~*ريحانة*~
17-12-2004, 10:09 PM
اكيد اعرف عراقي لاني سباعيه( عيلة بو خميس :) ) وعندي خوش فكر ايا با عليه
بعدين البركه باللي يمي يغشش :) هاي شلون بلشه ما اعرف منو داعي عليه عزا العزاك ههههههه

سؤالي سهل تا انجحك بس لالنكي هاي تركيه الظاهر يمكن فد لون حلو من لون الورد ( بس اذا خطأ الجواب مش ترجع بكلامك وما تنطينا الجنسيه )

شوي بس يغششنوني بعدين اردلك جواب
فيمالاه

لالنكي اذا ما خاب الظن هو البرتقال اللي قشره خفيف :p نسيت اسمه بس من فصيلة البرتقال هو :D
بس لا بعد هالشرح الطويل يطلع الجواب خطأ:eek::D

الشمس المهدوية
17-12-2004, 11:09 PM
الفاضل الكريم آزاد ....

اخينا الكريم من عيوني ان شاء الله بس صحيح اني من الجنوب بس للاسف ولدت و تربيت في بغداد و اهلي ايضا ما يحچون جنوبي الا قليل و لكني احب الشعر الشعبي الاصيل و تعلمت منه الكثير .

تقبل تحيات
اختك الموالية .




وشخوش اني كل يوم اجيبلكم كلمة كلمتين

اليوم جايبتلكم كلمة استكان وهو كاسة الشاى بس صدق الكلمات اللى

تخليها بنفسج مانعرفها ولا حتى نستخدمها مثل السياح وغيرها عجيب

شلون تعرفين هاى الكلمات وانت تكولين انج مو عراقية

الكلمة الثانية اللى جبتها وهاى تعلمتها ايضا من العراق لمن تنزل

من السيارة او تريد توكف وصارتلى نكتة طبعا لمن رحت قتله لابو

السيارة على اليمين على مهلك وطبعا اخذتها هاى الجملة من اهل

الشام اشو ابو السيارة كام لف يمين وانى اكوله انى مو قتلك على

اليمين واقصد انه يوكف هو يقولى لا انتى قلتيلى على اليمين يعنى

يلف يمييين وهما يقولون( نازل يابة) عندما يريدون الوقوف :D:D


هاا وكلمة ثانية هم سمعتهم يقولونها وهي لمن تزور احد يعني توديلها هدية انى اقول راح اودي واجب لفلان

هما يقولون اودي فضل

اودي يعني اخذ معى واعطي لفلان من الناس

يلا هاي الكلمات كافية لليوم



الغالية sinaa ....

اولا عاش من شافچ حبيبتي ( اقصد شاف اطلالتچ على المنتدى ) ....

حبيبتي سألتي عن السياح ,,,,,

فأقول لك السياح : نوع من انواع الخبز الذي يستخدم في منطقة الجنوب و خاصة العمارة و هو يصنع من طحين التمن ( يعني طحين الرز ) و يطحن جيدا حتى يصبح ناعم جدا و يخلط مع القليل من الماء ليكون كالمادة المستحلبة .
و يصب مثل طريقة عمل الخبز في الشمال و الاخ آزاد اكيد يعرفها حيث يصب على الصاج الذي يسخن على الفحم و يكون اشهى من الذي يصب في الطاوة الساخنة ( او التاوة و هو لفظ اخر للطاوة اي المقلاة ) .
و يستخدم هذا النوع من الخبز صباحا كما ذكر مع الگيمر العراقي المعروف .

و هنالك خبز اخر مشهور ايضا في الجنوب هو الطابگ و هو شقيق السياح و لكن الفرق بينهما كالتالي :

السياح :

يصنع من طحين التمن و القليل من الماء فيكون خبزا رقيقا جدا و يؤكل صباحا مع الگيمر العراقي .

الطابگ :

ايضا يصنع من طحين التمن و الماء القليل و لكنه يكون اكثر سمكا من السياح ويؤكل مع السمك المشوي .

قبل كم يوم سوينا سياح بالبيت لان طحين التمن متوفر في الاسواق الغربية و الاوربية فمن السهولة عمله ,,,,
و اذا تردين اعلمچ شلون سوين الگيمر العراقي حتى يكون ريوگ عراقي معتبر هههههههههه .


عذرا على الاطالة ,,,,

و بارك الله بالجميع .




~*ريحانة*~ ....

ما شاء الله عليچ بعدچ شاطرة .

~*ريحانة*~
17-12-2004, 11:20 PM
~*ريحانة*~ ....

ما شاء الله عليچ بعدچ شاطرة .


السلام عليكم ورحمة الله
اهلا خيتي براثا .. من طيبج خية .. صدق الجواب صح ؟؟ :)

سيناء الرافدين
18-12-2004, 04:29 AM
شكرا لتشجيعك اخ ازاد وشكرا الج بنفسج لردج الطيب واشكر بدوري

عزيزتي براثا والمنتدى منور بوجودك والله انا عندي مشكلة كتابة لهذا

لا اشارك بالمنتدى ولهذا الموضوع بالذات ولانه اعجبني اقوم بالكوبي

بيست على صفحة المسنجر حتى اشارك لانه حتى بالنوت باد مايكتب

عربي واكولج خوش علمتينا اكلة او خبزة وعلمينا عل القيمر اني

اسوي بس هناك طرق عديدة خل اشوف طريقتج يمكن مالتج اضبط اصلا انى

اهنانة علموني شلون اسوي قيمر
والشكر مرة ثانية لصاحب الموضوع

بنفسج
18-12-2004, 06:52 AM
سينا لقيتها :) عزيزتي

لالنكي مندرين بالعراقي
يالله وين الجنسيه عزيزي ازاد ....صحيح غششني الزميل مؤيد بس ما عليه

اما كلمة هوايا فماخوذه من way better
حقوق الاكتشاف لعزيزنا مؤيد..اما الطبع والفشخره فالنا ههههههه

لا بعد سياح والمتيل والفصل وجماله هوايا الجنسيه يابا لازم ناخذها

سندس حبيب
18-12-2004, 08:50 AM
بنفسوجتي:)

ولج مكموعة :)شنو هاللسان الطويل :)
ولج منين هالحجي تعلمتي
انتي عراقية اكثر مني
انتي بالعة لسان بلبل خو موبالعة لسان بلبل:)

فنج اذا عرفتي اني شدااحجي :)
بعدين شبساع وصلتوا للصفحة الخامسة اني بس يوم واحد ماشفتكم وبهالسرعة وصلتوا للصفحة الخامسة
ماشالله عليكم عيني باردة عليكم بلية حسد


انشالله وره الانتخابات تشرفوني ابغداد واضيفكم على حسابي
البارحة اخ ازاد اني تريكت خوش كيمر ويه الدبس .. يلوك لحلكم .
كل جمعة عدنا سولة ابيتنه نتريك كيمر لان العائلة كلها تلتم .


من كلماتنا العراقية خصوصا احنة اهل بغداد
قوطية :: علبة صغيرة غالبا ماتكون من الصفيح
رازونة :: حافة الشباك
خاتونة او خانم : اعتقد هذي معروفة ماتحتاج للتفسير

زولية : السجادة


فميالا اغاتي

بنفسج
18-12-2004, 02:43 PM
هلو عيني سندس
شوي شوي علي عيني سندس ..هاي ولا اختبار أزاد للجنسيه :) هههههههههههه

تردون تسقطوني ..اني نسيبتكم من طرف عمو علاوي :)

انشاااااالله نزوركم ونروح زيارة للامام الكاظم ( زيارته يوم السبت اليس كذلك ) ونتريق عندكن قيمر الحله وسياح
آياااااااااااابا ;)..وغدونا بني دجله وخبز طاوه

سلامي الك وللعايله

احبكم كلش هوااااااااااااااااااايا

بنفسج
18-12-2004, 04:45 PM
كلمات سخط

أوي ربي : نفس معني oh my god

تقال لتقزز وللقرف من شئ ما

يلاعب النفس : يقزز النفس ويجعلها تستفرغ

نفس : اي المتكبر

يا بويا يا حبيب : توعد او سخط من شخص ما
ya buya ..ya heba yeb

سوده علي وجك : اي ليلطخ السواد وجهك


____________________________

صفات لشئ جميل

جمار : اصل النخله يؤكل ولونه ابيض ..يوصف به المراه البيضاء

خشف : من اللغه العربيه وهو اسم ابن الغزال

نبعة ريحان : نبتة الريحان تقال للممشوقة القوام الطويله

آزاد اسكندر
18-12-2004, 06:23 PM
العفو يابة بنفسج احنا طلعنا مو قدج انتي طلعتي دارسة لغات :)، بس تره الريوج لازم يدبر حتى نغض البصر عن التغشيش اللي مشتغل بينكم و بين جيرانكم :) .

لالنكي: هو "الافندي"، فاكهة من فصيلة الحمضيات، يشبه البرتقال بس صغير :)

بس لا تخافين الجنسية عليه خلص اني هسه أخابر عمو علاوي عل موبايل ماله
أو يجوز اسويله مس كول و أخليه هو يخابرني لأن ما عندي رصيد :)

آزاد اسكندر
18-12-2004, 06:35 PM
الاخت العزيزة ريحانه

اجابتج صحيحة ،عفييية

نورتينا بمشاركتج و ما طول هيجي شاطرة لازم تشاركين ويانا ،نريد نخلص القاموس قبل العيد :)
___________________________________

الاختين العزيزتين جدا جدا براثا و sinaa

عيني احنا يادوب طلعنا من سالفة الريوج العراقي اللي يومية مشهيتنا عليه بنفسج طلعتولنا هلمرة بأنواع الخبز :)

أيابااا ،هسه مال خبزه عراقية حارة و جاي و قيمر و للصبح :)

مشكورين على المشاركات الجميلة و بانتظار المزيد ،محبتي لكما و تقديري :)

آزاد اسكندر
18-12-2004, 06:45 PM
الاخت العزيزة سندس

مشكورة عيوني ،انيالج والله انتي ببغداد اللي نشتاقلها كل يوم رغم الظروف الصعبة، ذكرتيني بأيام الجمع ام الكيمر و الكاهي و الدبس أخخخخخ
:)

شرح مفردات مشاركة سندس:

مكموعة: هاي و الله أعرف معناها بس ما اعرف شلون اشرحها بالعربي :)

شبساع أو شبسرعة: كلمة تعجب يعني "ما هذه السرعة؟" :)

فنج: كلمة تحدي بمعنى "أتحداك أن تفعلي كذا".

مشكورة خيتي سندس :)

آزاد اسكندر
18-12-2004, 06:51 PM
بنفسج ذكرتيني بشغلتين (شغلتين=شيئين)، أول شغلة ذكرتيني بمفردة عراقية تقولها النساء عادة اذا حلت مصيبة و هي "سودة مصخمة" أو "سودة عليه" :)
و ثاني شغلة ذكرتيني بالجمار اللي جنة ناكلة ببغداد من باعة متجولين بالعرباين ،الله و الله أيام حلوة جانت

ها ،بشريني بابا حضر الفدية حتى نروح لبغداد ؟ :)

بنفسج
18-12-2004, 07:42 PM
بنفسج ذكرتيني بشغلتين (شغلتين=شيئين)، أول شغلة ذكرتيني بمفردة عراقية تقولها النساء عادة اذا حلت مصيبة و هي "سودة مصخمة" أو "سودة عليه" :)
و ثاني شغلة ذكرتيني بالجمار اللي جنة ناكلة ببغداد من باعة متجولين بالعرباين ،الله و الله أيام حلوة جانت

ها ،بشريني بابا حضر الفدية حتى نروح لبغداد ؟ :)

كاكه ازاد : :) مو قالت سندس بلعنا لسان بلبل !! بعدين اني عدي فد عرج رطينه بالاساس ..

بس لا تعتمد كلش علمود فدية البابا:) ..مو قلنا تعال دريسدن تريق ولا بلشة محروكين الصفحه علمود هذول مصيبتهم سوده مصخمه :) كلش اوي ربي

ذب علاوي عليا وانتا عليك الياور .ههههههههه


بس صدق مو عزيزنا مؤيد نار كبره :) ماشالله شلون جاب هوايا !!

____________
كاكه : سيد بالكردي
عدي : عندي

ذب : اترك

على ضفاف دجله
18-12-2004, 07:52 PM
اللهم صلي على محمد وآل محمد

الله على أيام قبل ..
ذكرتنه بموضوعنه القديم ديوانية عراقية..

حبينه ندرج مشاركة بموضوعكم حتى نفيد و نستفيد...
لان بصراحة اكو كلمات كلش صعبة وغالباً ما نستعملها خصوصاً احنه
اللي تركنه العراق الحبيب من سنة 1991
منعرف من العراق الا اسمه و جم معلومه الاهل علمونه ياها..

كل الشكر لشاعرنا الموهوب الذي يذكرنا في صفحته الخاصه بالعراق و بنهر دجلة..


كل الأمتنان لمن شارك بالموضوع و خصوصاً الأخت بنفسج
تشكري على هذه الكلمات التي تتحفينا بها..
أو بالأحرى الشكر لجارك العراقي فهو صاحب الكلمات على ما اظن..

تحياتي..
أختكم:على ضفاف دجله

بنفسج
18-12-2004, 08:02 PM
اللهم صلي على محمد وآل محمد

الله على أيام قبل ..
ذكرتنه بموضوعنه القديم ديوانية عراقية..

حبينه ندرج مشاركة بموضوعكم حتى نفيد و نستفيد...
لان بصراحة اكو كلمات كلش صعبة وغالباً ما نستعملها خصوصاً احنه
اللي تركنه العراق الحبيب من سنة 1991
منعرف من العراق الا اسمه و جم معلومه الاهل علمونه ياها..

كل الشكر لشاعرنا الموهوب الذي يذكرنا في صفحته الخاصه بالعراق و بنهر دجلة..


كل الأمتنان لمن شارك بالموضوع و خصوصاً الأخت بنفسج
تشكري على هذه الكلمات التي تتحفينا بها..
أو بالأحرى الشكر لجارك العراقي فهو صاحب الكلمات على ما اظن..

تحياتي..
أختكم:على ضفاف دجله


اشكرج هوايا عزيزتي تري اسمج كلش جميل

والله وبالله واسوي الكم فصليه عشائر :)


الكلمات الدينيه اني بحثت وكتبتها ما قريتي ازاد يقول عني سباعيه :) يعني اليا براءة الاختراع علمود القاموس المشترك بينا وبين ازاد واغاتي مؤيد( نريد ندفعها فديه علمود زيارة بغداد للمحروكين الصفحه الكلاوجيه :))

وبصفنا جار عراقي وزميل بالكليه غششنا وبلشناه من يومها تصخم وجه عزااااااا هاي منو داعي عليه؟ :) ما ادري

اقلج مشرفتنا : صدق والله اني بنت ابو خميس لو مو بنته هههههه
قلي لي حتي اعرف اروح يمكم ببغداد واستاهل فدية بابا( القمري ) لو اظل يمكم ؟

ابومهدي
18-12-2004, 10:38 PM
زين يا جماعة
انا اجيت متأخر

المعذرة

بس اليوم سمعت كلمة من أمي
وقلت لازم اقولها إلكم حتى نشوف شنو تاريخها

(طق عطية)

انا اتوقع حبيبي آزاد هو اللي راح يعلمنا عليها

وشماجان عدكم من معلومات.. رجاء نريد نعرفها

تحياتي

ابومهدي
18-12-2004, 10:43 PM
ها صدق نسيت اكو فد كلمة مالت نسوان

(سودة عباتي)

يعني المرية او الإمرأة إذا سمعت فد خبر مو زين هجي تقول

عموماً انا من سنين وأنا أبحث عن أصل هذه الكلمة
ولماذا قيلت..

وانا ارشح الأخت العزيزة بنفسج
والأخت الغالية سندس حبيب
لكي نعرف عن هذه الكلمة


سلام

عصر الظهور
18-12-2004, 11:22 PM
اللهم صل على محمد وآله الطاهرين سيما ناموس الدهر وإمام العصر الحجة بن الحسن المهدي عجل الله تعالى فرجه الشريف

الله يحفظ أحد السادة شفته بعيني و سمعته بإذني يم (بجوار) السيدة زينب (ع)رزقنا الله وأياكم الوصول يصيح بعالي صوته ( مو كل من يحچي عراقي عراقي)


المهم للي يريد يكتب عراقي هاي هيه الحروف السحرية بلكت تذكرونا وتدعوا لنا


براى نوشتن حرف ( پ ) بايد دگمه هاى ( Alt + 0129) را فشار بدهيم
براى نوشتن حرف ( چ ) بايد دگمه هاى ( Alt + 0141) را فشار بدهيم
براى نوشتن حرف ( ژ ) بايد دگمه هاى (Alt + 0142 ) را فشار بدهيم
براى نوشتن حرف ( گ ) بايد دگمه هاى ( Alt + 0144) را فشار بدهيم


هم عندي سؤال أريد اسئل عنه
فد يوم چنت مار بقسم الترحيب فيه وحده چانت تسأل عن طبخة يقولولها أم سعيد الخدري ياريت الي يعرفها يحچي لنا عنها ( وهل تقرب لأم علي لو ما تقرب ):rolleyes:
وما أدري أكو معاهد يدرسون لهجات : مثل اللهجة العراقية ؟
آني خابر أنه أكو معاهد تدرس لغات يعني الإنگليزية والاسبانيةو..



اللهم بحق محمد وآله الطاهرين فرج عن الشعب العراقي المظلوم وكل المظلومين والمستضعفين في العالم
اللهم صل على محمد وآل محمد وعجل فرج ناموس الدهر وإمام العصر الحجة بن الحسن المهدي
في داعة الله

الدرب الى الله
19-12-2004, 01:20 AM
اللهم صلي على محمد وآل محمد

الله على أيام قبل ..
ذكرتنه بموضوعنه القديم ديوانية عراقية..

حبينه ندرج مشاركة بموضوعكم حتى نفيد و نستفيد...
لان بصراحة اكو كلمات كلش صعبة وغالباً ما نستعملها خصوصاً احنه
اللي تركنه العراق الحبيب من سنة 1991
منعرف من العراق الا اسمه و جم معلومه الاهل علمونه ياها..

كل الشكر لشاعرنا الموهوب الذي يذكرنا في صفحته الخاصه بالعراق و بنهر دجلة..


كل الأمتنان لمن شارك بالموضوع و خصوصاً الأخت بنفسج
تشكري على هذه الكلمات التي تتحفينا بها..
أو بالأحرى الشكر لجارك العراقي فهو صاحب الكلمات على ما اظن..

تحياتي..
أختكم:على ضفاف دجله

بسم الله الرحمن الرحيم

صدگتي والله اخيتي دجلة

آني طلعت من العراق لما چان عمري تقريباً 7 سنين بس لهسة اتذكر منها هواية ذكرايات حلوة
اتذكر لما چنت اگعد بعتبة باب بيتنا واطالع الرايح والجاي
ولما چنت العب واتهاوش مع صاحباتي
ومن چنت اخور ببيوت خالاتي
ليل ونهار وية بنات خالاتي
واتذكر فد حچاية چانوا يگولولي اياها لمن چنت اتغدة عدهم
چانوا يگولولي: العزام نفسه ينراد له رفسة

يگصدون بيها الطردة طبعاً
وهسة كلما اتصل بيهم يگولون متى تجين نشوفچ

والله فد ايام حلوة ما تنسا

الله يعيدها ان شاء الله

الدرب الى الله
19-12-2004, 01:28 AM
ها صدق نسيت اكو فد كلمة مالت نسوان

(سودة عباتي)

يعني المرية او الإمرأة إذا سمعت فد خبر مو زين هجي تقول

عموماً انا من سنين وأنا أبحث عن أصل هذه الكلمة
ولماذا قيلت..

وانا ارشح الأخت العزيزة بنفسج
والأخت الغالية سندس حبيب
لكي نعرف عن هذه الكلمة


سلام

بسم الله الرحمن الرحيم

شلونك خوية ابو مهدي
ان شاء الله بخير

آني عمري ما سمعت هالكلمة
(سودة عباتي)

بس كلمة
(طرگاعة سودة)
هاي سامعتها واستعملها هواية لمن اتذكر صدام وانا متضايگة

طرگاعة سودة طاحت فوگ راسك يا صدام
أي والله


والكلمة الثانية
(طق عطية) هاي هم عمري ما سمعتها
بس الله يساعد عطية اذا أمك الله يحفظها متوليته طگ







:) تحياتي

~*ريحانة*~
19-12-2004, 02:55 AM
السلام عليكم
ابو مهدى
سودة عباتي ما قط سمعتها .. سمعت (سودة علي) ... تنفع لو لا :p
هم يقولوها النسوان اذا سمعن فد خبر مو حلو:p



شكري الموصول لصاحب الموضوع والمشاركين فيه
والسلام

الدرب الى الله
19-12-2004, 03:16 AM
بسم الله الرحمن الرحيم

نعم عيني ريحانة
صح آني بعد سمعت (سودة علي)
و(صخام يصخمني)

كلمات ماادري منين جايبينها

بنفسج
19-12-2004, 05:12 AM
للذين يسالون ان تشان في معاهد تعلم العراقي : بلي واحسنها في بريطانيا - المانيا - روسيا ..يابا هاي الدول واويه :) خوش فكر عليهم مو اي فكر ها
..بس همين الشخص لازم يكون مكموع ( يعني شقي ومفتح باللبن ) ها ترجمناها ازاد .حتي يعرف شلون يحجي كلش زين

____________

كلمات تدل علي الطوائف

صبه : الصابئه وهم اوائل المسيحيين اتباع النبي يحي عليه السلام

واني الي صداقه معاهم بالاخص عايلة الخميسي يابا شلون اوادم ويشتغلون بالذهب .

يزيديين : تشلمه كلش غلط ..والصح ايزيديين وهم عبدة الشيطان ويتواجدون بجبل سنجار

اذكر ان معلمنا الديني - طابت نفسه الزكيه - علمنا أن تهجير الايزيديين من العراق مش من مصلحة الوادم وان صار فتوقعوا مشاكل وحروب لان العراق لازم يظل مثل ما يقول عزيزنا مؤيد : موزاييك .هيج رب العالمين يريد لكل اقليم وبلد .ويمتدون قبائل من سوريا الي روسيا مرورا بايران وتركيا


مسيح العراق : وينقسمون الي 3 قبائل ما نطول عليكم :) ونذكرهم حتي ما تملون

يابا والزهره الزتشيه هاي معلوماتي واليوم ما غششنا ابد جارنا ..خو مو كل ساعه ناذيه :) فمالاه

رباه متى الفرج
19-12-2004, 05:13 AM
اللهم صل على محمد وآله وعجل فرج خاتمهم وقائمهم المستور عن عوالمهم ولعن اعدائهم وظالميهم


چنت اباوع الموضوع من ابعيد من نزلتوه .. بس اجت فد احچايه أدخُل بيها گلت خل اوضحها وفرد مره أعلق إعله چم شغله اعرفها ,وان شاء الله مااضايچكم


هم عندي سؤال أريد اسئل عنه
فد يوم چنت مار بقسم الترحيب فيه وحده چانت تسأل عن طبخة يقولولها أم سعيد الخدري ياريت الي يعرفها يحچي لنا عنها ( وهل تقرب لأم علي لو ما تقرب )

اسمها ام محمد الخدري واذا اتريد تعرف بس هل هيه طبخه لو لا ؟ من يمي اقلك مو طبخه . اني من گلتها ألشاهينه بذاك اليوم چنت امزح وياها . بس لو تريد تعرف اشقصتها اخبرك بس مو هسه اول انشوف الاخوان والاخوات اشدا يحجون عنها بلچن بيه طبخه عدهم بهالاسم واني ماعندي خُبر ..


اللهم صل على محمد وآله الطاهرين سيما ناموس الدهر وإمام العصر الحجة بن الحسن المهدي عجل الله تعالى فرجه الشريف

الله يحفظ أحد السادة شفته بعيني و سمعته بإذني يم (بجوار) السيدة زينب (ع)رزقنا الله وأياكم الوصول يصيح بعالي صوته ( مو كل من يحچي عراقي عراقي)

الله يسمع منك ويبلغنا واياكم الزيارة
وصدگت أبهاي.. بس ارد اكلك هم شغله .. اللي يحچي اعراقي وأهو مو اصله اعراقي ينعرف ترى اللكنه اليها دور هوايه مو من حفظ له چم چلمه ورددها أنكتب عليه انه اعراقي حتى لو نغمة صوته مالت ألهم الا فذ لحظه هيج اتلاقيه مايقدر يسترسل ابچلامه لو من يسترسل يرد لاصله .

~~


بس اليوم سمعت كلمة من أمي
وقلت لازم اقولها إلكم حتى نشوف شنو تاريخها

(طق عطية)

چايحتاج الوالده اتگلك طق عطيه
انت بعد أفتهم وخلك ابو الجود وغير تنطيهاوتگلها يمه هاي عطيه ماوراها جزيه
ويييييه الله يستر .. بلچن ماتكون مثل مااعرفها هههههه

~~

تمن محمر : رز أحمر بالدبس أكله جنوبيه من البصره ..في سابع يوم من ولادة الطفل يقومون يتحمير الرز بالدبس وهي أكله لذيذه وبالمناسبه سأطلب من جارنا العراقي أن يصنعها فهو صاحب المعلومه .
وقد صدرت هذه الاكله الي جيران العراق الخليجيين بالكويت عن طريق المصاهره والسفر .

هاي الطبخه ( لمحمر) هم يسونها بالسكر بس الأول يحمرونه تالي يحطون عليه التمن .. ولازم وياها سمچ خاص ماعرفه لاسمه بس هم لونه يجي مثل احمر على وردي ويكون مقلي .
بس اول مره اسمع انهم يسونها يوم سابع من ولادة الطفل .. احنه العاده عدنا يسونها بالاعراس .. وتكون أبيت المعرس عالغذا نفس اليوم اللي اتكون بيه بلليل دخلته اممممممم ماادري افتهمتو علي لو لا .هسه ماادري لويش ماينجاب طاريها خبري بيها من چنت أزغيره كلش.
بس الحمد الله الحمد الله على النعمه ماافكر ابد اضوقها

~~


هيج : لفظه فارسية تعني لا شئ
ذب : اترك


اللي اعرفه هيچ معناها مثل كذا. او هيك ( بالبناني )
ذب = ارمي
وعوف = اترك

~~


انا عندي مشكلة كتابة لهذا
لا اشارك بالمنتدى ولهذا الموضوع بالذات ولانه اعجبني اقوم بالكوبي
بيست على صفحة المسنجر حتى اشارك لانه حتى بالنوت باد مايكتب
عربي

خيه ماادري اني اعرف طريقه جربيها يمكن تنجح وياج .. يوم اتدشي على لوحة التحكم مالتج وتختارين لوحة المفاتيح اضيفي اللغه العربيه ويه اللغه الموجوده عندج حتى تقدري اتحولي الكيبورد مالج للغتين الانجليزيه والعربيه يمتى اتريدين ..



في حفظ الله ورعايته

بنفسج
19-12-2004, 05:24 AM
الاخ رباه متي الفرج

حتي تعرف ان الجنسيه نستحقها :) المحمر بالدبس بيوم السابع للمولود ما يعرف هالمعلومه الا البيوتات البصراويه الاصيله بالمنطقه والقديمه فقط بس اني هسه نشرتها علمود نتجنس .
مو قالت الك سندس اني مكموعه :)

وهيج فارسيه عيني وتعني =لاشئ اما هيج مالت عوف فهاي اختها :)


__________________

عيني ابو مهدي

طق عطيه : يركبوها حسب الجمله وتعني السخريه من موعد شخص او العمل اللي مو خوش

سوده عباتي : ارادت فتاة ان تقابل حبيبها وكانت هذه الجمله هي الشيفره حتي يتعرف عليها لان كل بنات المحله يلبسن عبي سوده فاذا قالتها هوا افتهم وعرف هاي اللي يحبها ..يابا شلون اذكيا :)

لكنها تضرب الان كمثال عند سماع الاخبار السوداء او السوده مصخمه

اشكر ثقتك عيني وفمالاه

بنفسج
19-12-2004, 05:37 AM
كلمات من البيئه ذات معاني ودلالات مختلفه

بيرق : العلم

محله : محل سكن البيوتات وتشمل عدة ازقه

لومي البصره : ليمون بو صفير مجفف يستخدم بالطبخ وتعلم اهالي البصره طريقته من الهنود التجار اللي سكنوا عدهم.

جنزبيل : زنجبيل ويسمونه بالعراق عرق حار

سكنجبيل : هاي ازاد اكيد تعرفها بس بطريقة الاتراك ..او الايرانيين وهو شراب الفقراء خطيه :) بلاكت طريقة العراقيين احلي طعم وهو خليط الخل

ماورد : ماء ورد او كل آب

جذله : غره او مقدم الشعر

مضروب التشلوه : اي الكلوه وتعني الكليه هاي تنقال للمصخم :)

متشدره : مكدره وحزينه

يلوج : يجود بنفسه

واتخطر ( اتذكر ) بيت شعري قاله المرحوم الوائلي بليلة وفاة علي الاكبر

يا شبان بالله لا تونون

تصدعون قلبي من تلوجون

وينك كاكه ازاد : خطيه هسه ارص التشلمات ولا شفنا لا جنسيه ولا بوعلي ولا مسحاته :) حتي تعرف اني صدق نار كبره والغش مو شغال كل وكت

سندس حبيب
19-12-2004, 09:24 AM
اخواني واخواتي الاعزاء

هناك كلمات ومفردات نتداولها نحن (البغادة) اهل بغداد تختلف عن بقية المحافظات
بالنسبة ام سعيد الخدري مااعرف شنو معناهاوعمري ماسامعتها
وبالنسبة لسودة عباتي يااخي ابو مهدي ماسامعته من گبل بس احنة نگول صخام الصخمني او سودة بوجي(يعني وجهي) .

بالمناسبة حرف الـ(ج) نلفظه بالتشديد يعني مثل ( جاي ) مو تشاي يابنفسوجتي يامكموعة
مكموعة من (القمع) يعني اقمع راسج مثل قمع الباميا مثل المصريين مو يقولون اقمع الباميا..
اسم الله عليج حياتي بنفسوجتي .. لاتزعلين مني اني اتشاقه وياج حياتي

اتشاقه يعني امزح
على العموم اي واحد يريد يسالني سوال اني اجاوبة باللهجة العراقية
وتدللون عيوني

فيمالا تاج راسي

بنفسج
19-12-2004, 02:22 PM
سندسي هيم بيتش ههههههههه هاي بعد مشاقه عراقيه:) ولتش انتي بعد مكموعه !! تعرفين مصري آيابا عليج

تش هي تلفظ ج المهمله وبالانجليزي tch

بعدين شوي شوي عليا حتي ما تضيع فرصة الجنسيه والانتخابات :)

فمالاه سندسي


__________
هيم بيتش : هام بيتك وتهدم
تقال للسخط او للتعجب من قوة وقدرة شخص

آزاد اسكندر
19-12-2004, 03:20 PM
اللهم صل على محمد و آل محمد

ماشاالله المشاركات مدا انلحك عليها :) ، كل الهلا اخواني الاعزاء جميعا بلا استثناء، لكم مني تحية من أعماق القلب.
_______________________________________
الاخت الغالية بنفسج
عيني وين صايرة هاي دريسدن ؟ ،والله لو اندل جان اجيت باجر من الغبشة، و إذا موضوع الجنسية على الياور شغلته سهله لأن الرجال نسيبنا و نحكمه :).
و ني اشهد اني تعلمت منج جم كلمة جديدة بس الله عليج لا تفشلينا و ما تفتهمين على جماعتنا من يحجون :)

_________________________________
الاخت الكريمة على ضفاف دجلة
كل الهلا بيج خيتي العزيزة ،نورتينا بحضورج و مشاركتج، مشكورة على التشجيع و انا اعتز بشهادتج كلش هواية.
و الله صارلي 4 سنين بالغربة قلبي انشلع، الله يساعد كل واحد متغرب.
تحياتي و شكرا جزيلا لك

آزاد اسكندر
19-12-2004, 03:20 PM
أغاتي العزيز أبو مهدي

حياك الله
الصراحة ذني الكلمتين ما سامعهن بحياتي :)، آسف لأن خيبت أملك بس هاذا الصدك
بس أتصور تفسير الاخوات العزيزات صحيح للكلمتين :)
لك داد ابو مهدي كثرلنا من هل كلمات الغريبة :)

_________________________________________________
الاخ الكريم عصر الظهور

100 هلا بيك عيوني، و الله ذكرتنا بزيارة السيدة زينب عليها السلام و الله زيارة ترد الروح ،اللهم صل على محمد و آل محمد

مشكور أغاتي عل الحروف :)، بانتظار المزيد،و تقبل حبي و تقديري

______________________________________________
الاخت الفاضلة الدرب الى الله

الله يعينج على الغربة و الله لا ينطيه اللي هجولنا و فرقنا بين البلاد،ان شاء الله نعود جميعا الى ديارنا و أهلنا، و ندعو الله تعالى أن نكون جميعا من السالكين الى الله.
مشكورة عيوني على المشاركة و نريدج ويانا :)

آزاد اسكندر
19-12-2004, 03:26 PM
الاخ الكريم رباه متى الفرج

كل الهلا بيك :) ،على كيفك ويانة يمعود تره احنا هواي بينا مغتربين و على كد ايدك :)

مرحبا بك اخا كريم و ما كو داعي للفرجة من بعيد انته ابو البيت و احنه ضيوف :)

آزاد اسكندر
19-12-2004, 03:28 PM
عيوني بنفسج ملج علاقة الجنسية تستاهليها و أصلا بالجيب مضمونة :) ،

آزاد اسكندر
19-12-2004, 03:30 PM
مراحب اختي سندس حبيب

و الله عندي سؤال مدوخني، منين أصل كلمة "قره غلي"؟

شكد فكرت بيها بس ماكو فايدة،

يابو بشت بيييييش بلشت ؟ :)

آزاد اسكندر
19-12-2004, 03:35 PM
حزورة احزرها لكم اصدقائي و اللي يجاوب أول يفوز بجائزة عراقية اصيلة .

شنو يعني "يتهجول" ؟

ملاحظة: لا يجوز الاستعانة بصديق (هاي الملاحظة الج بنفسج) :)

آزاد اسكندر
19-12-2004, 03:38 PM
و هاي جم كلمة جديدة:

جولة (chola) :يعني الارض اللي مابيها مدنية،صحراء مقفرة

أكو: يعني يوجد

ماكو: لا يوجد

طاح أو وقع: يعني سقط أرضا

طفر أو كمز: يعني قفز

مع حبي للجميع :)

نيزك
19-12-2004, 03:48 PM
موضوع حلو كلش ,,,


اشكر الاخ ازاد على الموضوع الجميل و اشكر جهود الاخت العزيزة بنفسج و لكن لي ملاحظة و لااريد ان اجامل على حساب اللهجة اختي فهنالك كلمات تلفظيها خطأ و مثل ما قال الاخ عصر الظهور
( مو كل من يحچي عراقي عراقي) لانه ينعرف بسهولة و الكثير يتفق معي بأن اللهجة العراقية من الصعب ان يتكلمها من هو غير عراقي او من لم يتربى بالعراق منذ الصغر .
بعض الاخوات العراقيات تساءلوا عن بعض الكلمات مثلا في الامثال الشعبية التي ذكرت فاقول هي قديمة جدا و لم تعد تستخدم الان .

و عندي ملاحظة اللهجة هي من مناطق مختلفة يعني جنوبي غربي و شمالي غير الكلمات الفارسية او التركية و الانكليزية و عندما يتكلم العراقي كل واحد يتكلم حسب منطقته مو خلط يعني البعض في مشاركاته يخلط البغدادي على الجنوبي على الغربي فتكون الجملة صعبة الفهم و مابيها موسيقة و هذا الامر ضروري الاتنباه له .

ابسط شي احنا ما نگول تشاي = نقول چاي ( ch ) ترى كله و لا الچاي لان احنا العراقيين نموت و نحيا على الچاي هههههههههه .

و احنا نگول نومي بصرة مو لومي = اهل بلاد الشام يگولون لومي .

يلاعب النفس = يلعب النفس هو الاصح

سوده علي وجك = الاصح هي ( سودة الله وجهك )

والزهره الزتشيه = و الزهرة الزچية بال ( ch ) و هذا القسم نقسم به عندما نكون جادين جدا جدا ... لمقام الزهراء و مكانتها .

هيم بيتش : ( هام بيتك وتهدم ) يمكن انت تقصدين اخت بنفسج

انهجم بيتچ : و هي تقال للشخص المتجبر فندعوا عليه بأن يهجم بيته




قلت يا اخت بنفسج جملة :

شفت شلون انا كلش خوش بنيه هوايا

طبعا هم ياخذون منج معلومات و ما يصححولج مثلا الجملة السابقة يا بنفسج اما تستخدمين كلش او هوايا ما يصير تستخدم اثنيناتها لازم واحدة منها لان الكلميتين تعني = الكثرة .

و قلت :

حتي يعرف شلون يحجي كلش زين

الاصح : حتى يعرف يحجي كلش زين ( او حتى يعرف شلون يحجي زين )


المفروض طالبينهم يصححون حتى انت هم تتعلمين اللفظ الصحيح عيوني بنفسج و تنجحين بأمتحان الجنسية ;)



و اخيرا اشكركم على المعلومات القيمة
و بانتظار تعلم المزيد .

بنفسج
19-12-2004, 05:54 PM
هلو عيني نيزك
عزيزي : اني ما جايه حتي آخذ الجنسيه صدق ..الموضوع حلو متل ما قلت والقصد منه: أن نتعلم ونورد ما نعرف مو هيج

والظاهر تحسب صدق أني اريد اجنس واريد واسطة ازاد لا يابا :) آهووووو وين راح تفكيرك

يابه ده نتشاقي خو لا تقلبها آخر صفحه مو خوش :)

صعب الحجي لو سهل المهم أني احاول ..صح لو لا؟

ذكرتني بكلام نبوي كلش حلو للرسول الاعظم ..لما بلال الحبشي دا يحاول يحتشي وياذن ويقلب السين شين لانه عجمي - يعني مو عربي مثلي موش انه ايراني -( ميخالف عيني بالكليه علمونا أن حرف الجيم المهمله ما موجوده ف تش هي ch ) والوادم ذاك الوكت يحسبون صدق بلال يريد ينافسهم فقللهم النبي ابو الزهره الزتشيه

ان شين بلال عند الله سينا

خو ما اجت علي بنفسج وصار عيب عليها تتعلم وتغلط

هيج لو لاله؟ ;)
شكرا للتصحيح

انشالله اتعلم منك واستفيد

بنفسج
19-12-2004, 06:03 PM
حزورة احزرها لكم اصدقائي و اللي يجاوب أول يفوز بجائزة عراقية اصيلة .

شنو يعني "يتهجول" ؟

ملاحظة: لا يجوز الاستعانة بصديق (هاي الملاحظة الج بنفسج) :)

يبوووووي انفضحنا سندس ههههه

والله والزهره يابا ما استعنا بصديق
يعني cast away
هاي شلون اترجمها قلت لك اني ارطن :) يعني يتهجر او ينتقل من مكان لآخر

بنفسج
19-12-2004, 06:13 PM
اللهم صل على محمد و آل محمد

الاخت الغالية بنفسج
عيني وين صايرة هاي دريسدن ؟ ،والله لو اندل جان اجيت باجر من الغبشة، و إذا موضوع الجنسية على الياور شغلته سهله لأن الرجال نسيبنا و نحكمه :).
و ني اشهد اني تعلمت منج جم كلمة جديدة بس الله عليج لا تفشلينا و ما تفتهمين على جماعتنا من يحجون :)




ههههه بهاي صدقت يابا انتو تحكمون الياور ;)

هاي بالمانيا قرب التشيك .تعال وجيب معاك سندس ودكتور مؤيد .بس تحمل البابا يمكن يستقبلك بفد توثيه هاي اللي تنعم الضلوع :)..
لا صدق انتا الروح والريه وكل الناس عاريه ...


انشالله ما افشلك ( اجرسك يالله تعلم لبناني خو مو بس اني اتعلم عراقي :) ) يعني محروكين الصفحه ميشيل عفلق وما ادري يا مشيوي يا مكموع احسن مني تجنسو ؟ اللي ما يفتهمون وين الله ذابهم؟!! أوووي ربي ...هاي شنو من شكولات يلاعبون النفس :)

__________
الريا : الرئه
كل الناس عاريه : اعير باقي الناس فلا اهميه لهم لدي سواك

شكولات : اشكال

بنفسج
19-12-2004, 06:21 PM
عيوني بنفسج ملج علاقة الجنسية تستاهليها و أصلا بالجيب مضمونة :) ،


كاكه ازاد : ال هسه ما شفنا ولا شي !! وينها الجنسيه ؟ وينه اللي قال ارد اخابر نسيبنا الياور :)

يا جيب عمي ؟ لا خبر لا جفيه لا حامض حلو لا شربت ..لا تقشمرني اغاتي

وبحتشي النسوان : لا تثرب علي راسي بصل

سويت مس كول عمو علاوي لو لاله ؟

تري راح تشهدلي انتا وسندس ومؤيد ...علبالك تهجولني من المانيا الي بغداد بس هيج جوتره ههههههههه


:)

بنفسج
19-12-2004, 06:25 PM
يعني cast away
هاي شلون اترجمها قلت لك اني ارطن :) يعني يتهجر او ينتقل من مكان لآخر قسرا ..خطيه



ها يابا آزاد: عدتلك الجواب علمود الجايزه :)

بنفسج
19-12-2004, 06:35 PM
كاكه آزاد : شوف شلون جبتلك تشم بيت شعر شعبي عراقي علمود انت همين شاعر :) لازم يابا تضاعف الي الجائزه :) بدل القمري يصيرون دبل قمري ثمن تاكسي دريسدن بغداد هجوله هههههههههه وبدل مترجم اهلي موش بالعين لسانات البلابل :)

احنا بعمود التيل شمصعدك النا
للراده ما ينطون ظلام اهلنا


الفتاة تخاطب من يخطبها ويرفضوا اهلها فتقول انا بمكان كلش بعيد وصعب يابه يا حبيب ان جيتلي تتكهرب وتنشوي فد مره :) هاش شلون خاطرت وجيت اليا؟

ظلام اهلي لانهم ما ينطوني للي يطلبني للزواج

بذمتك يابا ورحمه علي ذاك الجد الطاهر : كظيت خوش كضه لو مو خوش كظه :)

بنفسج
19-12-2004, 06:46 PM
هسه اني احزرك كاكه آزاد :)

الرمان والليمون( النارنك ) يرمزون لاي شي بالعراق ؟

بس ما في جنسيه يابه الالمان كلش مشعولين الصفحه المكامز ما يفيد معاهم :) ..هوايا نفس ..بلكت البابا يشلع جم ضرس من ياوراتهم ذاك الوقت نحجي وياه علمود اذا جاوبت صح نتوسط الك انتا نسيبنا صوب عمو علاوي

بنفسج
19-12-2004, 07:47 PM
أغاتي أزاد

شوف هذا المثل عن عمك بو خميس بس شلون جاي بمكانه :) آيابااااااااا


مكان الاسد يتمرغل الواوي

اي مكان بو خميس يجي الواوي من عابت يريد يبين نفسه قدام الوادم :) حتي لو علي الاثر والتراب بس المهم نفسه تقنع انه صار مكانه

يطلق المثل علي من يحاول النيل من أبو خميس هاي صار صاحبي خلاص :) غائبا كان أم حاضرا

ما ترهم كلشششششش;)

المرضيه
19-12-2004, 08:54 PM
:confused:انا ما فهمت شي

عصر الظهور
20-12-2004, 02:29 AM
يا عِمادَ مَنْ لا عِمادَ لَهُ يا سَنَدَ مَنْ لا سَنَدَ لَهُ يا ذُخْرَ مَنْ لا ذُخْرَ لَهُ يا حِرْزَ مَنْ لا حِرْزَ لَهُ يا غِياثَ مَنْ لا غِياثَ لَهُ يا فَخْرَ مَنْ لا فَخْرَ لَهُ يا عِزَّ مَنْ لا عِزَّ لَهُ يا مُعينَ مَنْ لا مُعينَ لَهُ يا اَنيسَ مَنْ لا اَنيسَ لَهُ يا اَمانَ مَنْ لا اَمانَ لَهُ
اللهم صل على محمد وآله وعجل فرج خاتمهم وقائمهم المستور عن عوالمهم ولعن اعدائهم وظالميهم

اللهم صل على محمد وآل محمد وعجل فرجهم
ماهي حقيقة الصلاة على النبي وآله ؟
http://69.57.138.175/forum/showthread.php?s=&threadid=402722518


اسمها ام محمد الخدري واذا اتريد تعرف بس هل هيه طبخه لو لا ؟ من يمي اقلك مو طبخه .
الحمد لله أنها ما طلعت طبخة
اثابكم الله وشكر سعيكم
يكفينا هذا الجواب
و لهذا المقدار نكتفي ونسأل الله لنا ولكم التوفيق وحسن العاقبة والخاتمة

وأقول للأخوة : ما كو داعي أحد يشغل نفسه بـ ام محمد الخدري ما نريد أحد يستغيبها :)


اللهم صل على محمد وآل محمد وعجل فرجهم وترحم على عجزنا وأغثنا بحقهم وصل عليهم أجمعين
اللهم صل على الْمُضْطَرُّ الَّذي يُجابُ اِذا دَعا وعجل فرجه
اَللّـهُمَّ وَ اَقِمْ بِهِ الْحَقَّ وَ اَدْحِضْ بِهِ الْباطِلَ وَ اَدِلْ بِهِ اَوْلِياءَكَ وَ اَذْلِلْ بِهِ اَعْداءَكَ وَ صِلِ اللّهُمَّ بَيْنَنا وَ بَيْنَهُ وُصْلَةً تُؤَدّى اِلى مُرافَقَةِ سَلَفِهِ ، وَ اجْعَلْنا مِمَّنْ يَأخُذُ بِحُجْزَتِهِمْ ، وَ يَمْكُثُ في ظِلِّهِمْ ، وَ اَعِنّا عَلى تَأدِيَةِ حُقُوقِهِ اِلَيْهِ ، وَ الاْجْتِهادِ في طاعَتِهِ ، وَ اجْتِنابِ مَعْصِيَتِهِ ، وَ امْنُنْ عَلَيْنا بِرِضاهُ ، وَهَبْ لَنا رَأَفَتَهُ وَ رَحْمَتَهُ وَ دُعاءَهُ وَ خَيْرَهُ مانَنالُ بِهِ سَعَةً مِنْ رَحْمَتِكَ وَ فَوْزاً عِنْدَكَ ، وَ اجْعَلْ صَلاتَنا بِهِ مَقبُولَةً ، وَ ذُنُوبَنا بِهِ مَغْفُورَةً ، وَ دُعاءَنا بِهِ مُسْتَجاباً وَ اجْعَلْ اَرْزاقَنا بِهِ مَبْسُوطَةً ، وَ هُمُومَنا بِهِ مَكْفِيَّةً ، وَ حَوآئِجَنا بِهِ مَقْضِيَّةً ، وَ اَقْبِلْ اِلَيْنا بِوَجْهِكَ الْكَريمِ وَ اقْبَلْ تَقَرُّبَنا اِلَيْكَ ، وَ انْظُرْ اِلَيْنا نَظْرَةً رَحيمَةً نَسْتَكْمِلُ بِهَا الْكَرامَةَ عِنْدَكَ ، ثُمَّ لا تَصْرِفْها عَنّا بِجُودِكَ ، وَ اسْقِنا مِنْ حَوْضِ جَدِّهِ صَلَّى اللهُ عَلَيْهِ وَ آلِهِ بِكَأسِهِ وَ بِيَدِهِ رَيّاً رَوِيّاً هَنيئاً سائِغاً لا ظَمَاَ بَعْدَهُ يا اَرْحَمَ الرّاحِمينَ .

بنفسج
20-12-2004, 05:48 AM
سماتشه : صيادي السمك

فاله : حربة صيد مشعبه

تشلاب : كلاب

الكلام الج يا جاره : اخاطبك لكن اقصد ان تسمعني وتعي الجاره


قره غولي اعرفها بس ننتظر سندسي حرامات ما مقبوله نتليكف مثل الملاكيف !! بعدين لازم نكون خوش مضيافين بهالموضوع ودمنا خفيف ع الوادم أوووي يا هو يريد ثجيلين الدم !!

يابا آزاد وين جواب المسابقه ؟ انتظرك بس لا طول بالرد

يا بو بشت بيش بلشت :)

بنفسج
20-12-2004, 06:12 AM
خيعون : يا بختك

كلمه من اصول ساميه

تشكاره : سيجاره

الفأل : أي اللجوء الي طرق روحانيه لمعرفة البخت أو حل معضله

خطة العباس : بالاول ننتظر فرد عضو كربلائي يشرحها بعدين نفصل احنا بطريقتنا للوادم شنو يعني :)

راديون : راديو

سندس حبيب
20-12-2004, 08:46 AM
طگ عطية : هذا مثل نطلقه على من يعمل عمل ولايتقنه ايضا نقول (هذا شغله شلالي) او (هذا يشتغل من وره خشمه)

بالنسبة لخطة العباس اني سامعه بيها بس مااعرفها .. انشالله اسال امي واجاوبكم .

يتهجول : ينتقل هو واغراضه من مكان الى مكان ويكون مطرود مثل حال المؤجرين بهالوكت من بيت الى بيت للايجار .

خيعون : اني ماسامعتها بس اني اعرف خي عونك :: يعني اخي اطلب معونتك .

قره غولي : سالت عنها وماكو احد يعرفها بس هي لقب عشيرة عدنه هناك الملحن العراقي (طالب القره غولي) اذا انتو سامعين بيه .

اختي العزيزة بنفسج احيي بيج هذي الروح الطيبة في تعلم اللهجة العراقية .. لان التكلم بها مو سهل ... وتختلف اللهجات من محافظة الى محافظة .. حتى اني احيانا مااعرف بعض الكلمات خصوصا التابعة للمحافظات الجنوبية حتى في بغداد هناك لهجات تختلف مثلا اهالي الكاظمية والاعظمية معروفين بلهجتهم احيانا يمدون الكلام مثلا يقولون : جيبيليالي . احنه نقول جيبيلي او جيبيليا

جيبيلي يعني ااتيني به او اعطيني
انطيني : اعطيني

تحياتي

احمد الباقر
20-12-2004, 10:38 AM
اخي اود ان اضيف معاني بعض الكلمات :
القائد الملهم:الذي الهم الرفاق الحقد على العراقيين.
القائد الضرورة:لانه كان ضرورة لامن اليهود في المنطقة.
بطل التحرير القومي:لانه اباد الاكراد والشيعة والتركمان وبقية الطوائف .
بطل النصر والسلام:لانه انتصر على ابناء الشعب العراقي بعد الانتفاضة الشعبانية .

بنفسج
20-12-2004, 02:34 PM
هلو سندسي

انا اشكرج واشكر كاكه آزاد انه رحب بي وهذي من شيم العراقيين وهو الاخلاق والكرم فالموضوع كان ( فقط ) ان نورد كلمات ولكنه ما خجلني وتقبل كلامي و قلب الموضوع الي تعلم

نقطه مهمه : العراق موزاييك من قوميات عده ..و صدورهم وسيعه وما عدهم عنصريه ..انشالله ما يتغيرون فشين بلال عند الله سينا

اغششج بقاره غولي :) بس أخاف يوصل خبر لآزاد ..يابه الجلمه من جيرانكم بالشمال صوب زاخو

وجماله صوب روسيا همينه

فمالاه

بنفسج
20-12-2004, 02:45 PM
اخي اود ان اضيف معاني بعض الكلمات :
القائد الملهم:الذي الهم الرفاق الحقد على العراقيين.
القائد الضرورة:لانه كان ضرورة لامن اليهود في المنطقة.
بطل التحرير القومي:لانه اباد الاكراد والشيعة والتركمان وبقية الطوائف .
بطل النصر والسلام:لانه انتصر على ابناء الشعب العراقي بعد الانتفاضة الشعبانية .

[B]دكتور عذاري

بمناسبة الحديث عن محروكين الصفحه البعثيه فاخلي يمك هالقصه

صدام المشيوي فد يوم كلم كرسي الحكم لان بيناتهم غرام وحب ( أوي ربي :( ) ذاك اليوم صفن وشعر وقله :

أحبنك ..أريدنك
من قال أعوفنك

شتريد تصير ؟ سمتج بالماي ؟
هم أغطس وأصيدنك

B]

بنفسج
20-12-2004, 02:56 PM
خيعون : اني ماسامعتها بس اني اعرف خي عونك :: يعني اخي اطلب معونتك .


اختي العزيزة بنفسج احيي بيج هذي الروح الطيبة في تعلم اللهجة العراقية .. لان التكلم بها مو سهل ... وتختلف اللهجات من محافظة الى محافظة .. حتى اني احيانا مااعرف بعض الكلمات خصوصا التابعة للمحافظات الجنوبية حتى في بغداد هناك لهجات تختلف مثلا اهالي الكاظمية والاعظمية معروفين بلهجتهم احيانا يمدون الكلام مثلا يقولون : جيبيليالي . احنه نقول جيبيلي او جيبيليا

تحياتي

خيعون الام اللي جابتج سندسي وخيعون جاركم بيكم

عزيزتي خي عونك عربيه وهي من : أخي عونك اي اطلب مساعدتك

اما خيعونك وقد لصقت الكلمتين معا قصدا هي كما اظن ساميه لان من يدرسون لغات قديمه يعرفونها جيدا وهي التفال بالحظ


هناك ايضا يا عونه : وهي اغلب الاوقات تقال من قبل العشائر العربيه ويقصد بها التحيه لمن يقدم للمضيف او يذهب منه

بنفسج
20-12-2004, 05:45 PM
هسه سوالف الجني وازلامه :)

طنطل : يقال أنه نوع من الجن الغير عاقل طويل جدا وأحيانا يري بالليل فوق النخل ( شمصعده ما أعرف ! ) أما قصة ظهوره وكيف تستطيع أن تهرب منه :) يابا ما أقدر اقولها بلكت آزاد يقدر :) نذبها عليه


السعلوه : جنيه لها شعر كثيف وجسم مشوه وأكثر من عين تخوف كلش يقال أنها تأكل الوادم بس ما في طريقه تشرد منها مثل الطنطل المخبل :)

شقاق القلوب : يقال أنه رجل سفاح كان يقتل الناس ويشق صدورهم ويأخذ قلوبهم ..ويقال هو نوع من الجن



أم السعف : الساحره التي تطير ليلا علي سعف النخيل

أم السحوره :المرأه التي تأتي الاعمال الرديئه والطبوب

____________
مخبل : به خبال او خفة بالعقل

تشرد : تهرب

بنفسج
20-12-2004, 07:55 PM
للي مبتلشين باللي ما يستحون وبليا اخلاق :) هاي امثله تضرب

اذا ما تستحي العب علي ما تشتهي

اي افعل كيفما تريد

ادب سز : تركيه تعني قليل الادب

ادب يوك : هاي اصخم من الاولي ..وتعني بليا ادب بالمره

ايا جليل الحيا : اي قليل الحياء

آزاد اسكندر
20-12-2004, 09:18 PM
الاخت الكريمة نيزك

مشكورة على المشاركة :)

بالنسبة للأخت بنفسج زين منها تجارينا بلهجتنا و اللي هي صعبة مثل ما تقولين
طبعا احنا العراقيين معروفين بسعة الصدر و احنا اولا و أخيرا دا نتشاقة و الموضوع مطروح لتذاكر الكلمات العراقية بس قبل كل شئ التعرف بهل الوجوه الطيبة :)
بانتظر المزيد منكم أختي الكريمة :)

آزاد اسكندر
20-12-2004, 09:26 PM
بنفسج يا بنفسج حزورتج حلوة ؛)

الرمان رمز للأتراك و النارنج للإنكليز، و ما أدري شنو المنشأ بس سامعها من ناس .

ها هسه شلوني وياكم، جاوبت لو لا؟ :)

جوابج لكلمة "يتهجول" صحيح وجواب الاخوة همين بس انتي أول من جاوب يعني الجائزة من نصيبج ،بس لا تسأليني هسه شنو هيه لأن آني بصراحة تورطت :)

آزاد اسكندر
20-12-2004, 09:34 PM
الاخت الكريمة المرضية

سألينا عن أي كلمة ما فهمتيها و احنا نشرحلج ،تدللين يمعودة
_____________________________________
الاخ الفاضل عصر الظهور

لك الشكر الجزيل عزيزي على التواجد و المشاركة

مشكور على التعقيب و المشاركة :)

آزاد اسكندر
20-12-2004, 09:38 PM
الاخ الدكتور منذر العذاري

أكاد استشعر المرارة في كلماتك و إني أشاركك هذه المرارة و لكن نسأل الله تعالى أن يفرج عن شعبناالمظلوم و يعاقب كل من تسبب في ما نحن فيه اليوم.

مشكور أخي الكريم على المشاركة و بانتظارك دائماً

آزاد اسكندر
20-12-2004, 09:44 PM
بالنسبة للطنطل ،من جنت صغير كان جد أمي يسولفلنا عن الطنطل، و هو حسب ما اعرف كائن اسطوري شعبي توارد اسمه في الحكايات الشعبية و هو نصفه حيوان و نصفه انسان، مخيف و يظهر بالليل يمممههه يمعودين الدنيا ليل لا يطلعنا طنطل عل الطاري :)

آزاد اسكندر
20-12-2004, 09:47 PM
دللوي يا الولد يبني دللوي ،عدوك عليل و ساكن الجول

بهذه الكلمات عادة تنوم الامهات العراقيات أطفالهن (جهالهن بالعراقي) ، و أنا لحد الان اتذكر شلون امي جانت امي تنومني على هاي الكلمات فد لحن بعده لحد الان بإذني.

آزاد اسكندر
20-12-2004, 09:50 PM
اكو مثل عراقي يقول :

"لا تكول سمسم إلا تلهم"

و هو مثل يضرب لضرورة عدم الاطمئنان الى الوعود

تلهم :يعني تاكل

آزاد اسكندر
20-12-2004, 09:51 PM
مشكورة عيني بنفسج على كل هاي الكلمات الجميلة، :)

على ضفاف دجله
20-12-2004, 10:30 PM
اللهم صلي على محمد وآل محمد

على سيرة الطنطل..
يكولون انو جدي ابو امي بأيام قبل شايف الطنطل ههههههه
والمشكلة احنه مصدقين هاي السالفة..
الله على أيام قبل كل شغلهم بالطنطل..ماجنه انام اذا مو بقصة من هذا النوع..

أخلاصوو يعني هسه عرفناج انتي مو عراقيه ها:D:D

تشكر أخ آزاد على جهودك ممنونين يابه..
عزيزتي بنفسج ومنكم نستفيد سلمت يداكِ..
بالعرضه اذا اسمي عاجبج تستاهلينه مع انو دجله غالي علينه بس ما يغله عليج حبي..

تحياتي..

أختكم:على ضفاف دجله

آزاد اسكندر
20-12-2004, 11:17 PM
الاخت العزيزة على ضفاف دجلة

انا شخصيا مغرم باسم دجلة و إذا الله سبحانه رزقني بنية بالمستقبل (لا عبالكم يا جماعة انو اني شايب :) )
المهم اذا نرزقنا بنية اسميها دجلة، يعني صيحولي ابو دجلة :)
مشكورة عزيزتي و ديري بالج لا يطلعلج طنطل :)

آزاد اسكندر
20-12-2004, 11:49 PM
أحبتي لكم هذي الكلمات:

تشريب: هي أكلة الثريد العربية الشهيرة

المكوار: سلاح بدائي عبارة عن قضيب و في رأسه جير، استخدم بكثرة في ثورة العشرين ،و لهذا تردد الهوسة الشهيرة "الطوب أحسن لو مكواري"

هوسة: ضجيج أو ازعاج

خربطة : يعني فوضة و الشخص مخربط، و المتخربط هو الشخص اللي فقد الوعي بالاغماء

قندرة: حشى قدركم اخواني الاحبة، هي الحذاء

بنفسج
21-12-2004, 06:54 AM
عيني آزادي : جوابك صح ..اوفيييييييه ما وعدتك بشي حتي لااتورط قدام الوادم بس جايزتك اريدها :)

العراقيين شلون اذكيا جانو ما يقدرون يحجون عن المحتلين الا بالرموز فالرمان هم العثمانييون الذين صار مجانهم الانجليز

فكان العراقي يتغني ويقول : جلجل علي الرمان

ثم سموا الانجليز نارنك

اما الان فهم يسمون الامريكان : جوني

وبريمر الحاكم السابق : قيمر :)

بالمناسبه قيمر تجان متعلمله تشم كلمه عراقيه . محروك الصفحه همين استفاد بقعدتكه باللعراق مو قلتلكم هذول واويه

___________


عزيزتنا المشرفه علي ضفاف دجله

اشكرتش وأنا ابدا لا استغرب اذا قابلت عراقيين اهل جود وانتي ذكرتيني بقصه الانتفاضه الشعبانيه سنة 1990

فلما حرروا العراقيين السجون ومنهم الاسري الكويتيين اخذوهم من كان ببغداد للمرجع الخوئي تدقست نفسه اينما كانت وضيفهم بتلك الظروف والمحنه القاسيه للغايه والتي كانت اشبه بالجحيم واعطاهم مال بيته وتسامح منهم ونقلوا ان العراقيين وكلوهم الاكل الطيب بينما المجاهدين كانوا حفاة يتناولون الزهدي ..وهو اردا نوع من التمر وعادة لا ياكله الانسان

شئ آخر معروف قصة ثورة العشرين حينما كانوا يطعمون اسري الانجليز لبن وتمر ضيافة العشائر

اشكركم كثيرا

سندس حبيب
21-12-2004, 08:48 AM
السلام عليكم
بالنسبة لخطة العباس سالت عنها وللان لم احصل على اي جواب

بالنسبة للقره غولي
سالت زميلة لي في العمل تركمانية وقد جزأت الكلمة
قره : اسود
اغولي : ابن

وهي كلمات تركية

بصراحة اني هواية كلمات تعلمتها هنا ومعناها على الرغم من انو نستعلمها هواية .

طبعا اني كلما احضر كلمات حته اجي اكتبها اشوف كاكه ازاد كاتبها ..

اني ايضا اضيف اعجابي باسم الاخت العزيزة على ضفاف دجلة .. اسمج اختي كلش حلو.


من الكلمات الاخرى
خاولي : المنشفة الصغيرة وفي التركي تسمى (بشكير) واحيانا اجدادنا الكبار السن ايضا يسموه بشكير.


تحياتي للجميع

آزاد اسكندر
21-12-2004, 11:20 AM
عيني بنفسج بما انو اني جاوبت على حزورتج، صار دوري هسه :)

شنو يعني: جقلمبة؟ :)

يابة تره اني وعدت و وعد الآزاد دين (يعني وعد الحر دين :) )

آزاد اسكندر
21-12-2004, 11:28 AM
الاخت العزيزة سندس

مشكورة عيوني على المجهود الطيب، اني همين والله تعلمت كم كلمة جديدات عليه :)
و بالنسبة لكلمة قره غلي، هذا أول تفسير أسمعه و الكلمة ما مار تفسيرها عليه قبل، كنت محتار بيها مشكورة ياب :)

كوثر النجف
21-12-2004, 01:17 PM
السلام عليكم
طبعا كلش لطيفه هذه الكلمات العراقيه اريد ازيد عليها شويه
( ضايج ) يعني شخص يشعر بالملل
( كتلي ) وهو ابريق الذي يوضع فيه الشاي
( بانزين خانه ) تعني محطه الوقود
( شلنفص )معناه كثير الحركه
(كومه) تعني كثير
( سوده عليه ) وهو مثل مواساه للشخص الذي اصابه سوء
(تشتلني ) بمعنى الشخص الذي ينتظر بدون جدوى
(كلشي وكلاشي ) تعني كثير

والشكر للكل

الشمس المهدوية
21-12-2004, 03:11 PM
شكرا لتشجيعك اخ ازاد وشكرا الج بنفسج لردج الطيب واشكر بدوري

عزيزتي براثا والمنتدى منور بوجودك والله انا عندي مشكلة كتابة لهذا

لا اشارك بالمنتدى ولهذا الموضوع بالذات ولانه اعجبني اقوم بالكوبي

بيست على صفحة المسنجر حتى اشارك لانه حتى بالنوت باد مايكتب

عربي واكولج خوش علمتينا اكلة او خبزة وعلمينا عل القيمر اني

اسوي بس هناك طرق عديدة خل اشوف طريقتج يمكن مالتج اضبط اصلا انى

اهنانة علموني شلون اسوي قيمر
والشكر مرة ثانية لصاحب الموضوع

خلاص بعد گالت لچ رباه متى الفرج على طريقة الكتابة بالعربي بسهولة بعد ما عندچ حجة ....

اما عن الگيمر فراح ادزه الچ على الخاص لان تعرفين ما نريد تنباگ براءة الاختراع هههههههههههههه .

في احد المشاركات ذكرتي كلمة

استكان = و هو يصنع من الزجاج و يستخدم لشرب الشاي فقط و يذ ّهب بعد الاحيان او يشّجر ببعض الرسوم و لفظ استكان هو لفظ روسي يعني اصل الكلمة روسي .

و كذلك لفظ كلمة سماور = و هو يسخن عليه الشاي بطريقة هادئة و عادة ما يكون لونه مذهب و شكله جميل و يستخدمه اهل المناطق الشمالية و لفظه ايضا لفظ روسي اي اصل الكلمة روسية .

و السماور ذكرني = بالچولة = و تعني طباخ صغير بفتيل و يصنع من الالمنيوم يسخن عليه الماء او يطبخ عليه الطعام و يعمل على النفط و حجمه صغير و سهل الاستعمال .

الچولة = ذكرتني بالصوبة ( مع التشديد على لفظ الواو ) و اهل الشام يلفظونها صوبيا و هي المدفئة النفطية .
و ما اجمل جلساتنا العراقية حول الصوبة ,,, و خاصة لمن يكون اكو خبز حار و صحن دبس و راشي و الچاي مهدر على النار و اذا ماكو ف فد صحن كليلچه بعد احسن ....


بريمز = يعمل بالنفط صغير الحجم ممكن مسكه براحة اليد و فيه فتيل صغير و ممكن تسخين الماء عليه او الشاي ... ( و يسمى وبور گاز عند اهل الشام و اهل مصر ) .


معاني بعض الكلمات ::::



راح ادزه الچ = سوف ابعثه لكِ

تنباگ = اي تنسرق

دبس و راشي = دبس هو دبس التمر المعروف اما الراشي فهو ما يسمى بالطحينية ( المصنوعة من السمسم ) تخلط معا و تؤكل مع الخبز .

كليچه = و هي ما يعرف بأسم المعمول في الخليج .


الچاي مهدر او مخدر = و هي وضع ابريق الشاي على نار هادئة لكي ينضج بتركيز . و تهدير الشيء مثل الطعام اي وضعه على نار هادئة لينضج .



السلام عليكم مولاتي الفاضلة رباه متى الفرج ,,,,



اللهم صل على محمد وآله وعجل فرج خاتمهم وقائمهم المستور عن عوالمهم ولعن اعدائهم وظالميهم

هاي الطبخه ( لمحمر) هم يسونها بالسكر بس الأول يحمرونه تالي يحطون عليه التمن .. ولازم وياها سمچ خاص ماعرفه لاسمه بس هم لونه يجي مثل احمر على وردي ويكون مقلي .
بس اول مره اسمع انهم يسونها يوم سابع من ولادة الطفل .. احنه العاده عدنا يسونها بالاعراس .. وتكون أبيت المعرس عالغذا نفس اليوم اللي اتكون بيه بلليل دخلته اممممممم ماادري افتهمتو علي لو لا .هسه ماادري لويش ماينجاب طاريها خبري بيها من چنت أزغيره كلش.
بس الحمد الله الحمد الله على النعمه ماافكر ابد اضوقها

~~

اللي اعرفه هيچ معناها مثل كذا. او هيك ( بالبناني )
ذب = ارمي
وعوف = اترك

~~
في حفظ الله ورعايته



مولاتي ....

انا من البصرة ابا عند جد و لايوجد شيء من هذا القبيل ( يعني مثل هذه الاكلة ) و حتى سألت الاهل حتى اتأكد و گالولي ماكو هيچي شي صحيح و لادتنا و حياتنا في بغداد بس اكيد اجدادنا و اهلنا معظمهم في البصرة .....

التمن ( و هو الرز ) يطبخ بطريقتين مشهورتين في البصرة و هي اما طريقة :

1- التمن الاحمر مع السمك المقلي :
و تتم بحمس معجون الطماطم او عصر كم طماطية ( يعني عصر حبتي طماطم ) بالزيت ثم اضافة التمن و تركه ليتهدر و ينضج اكثر . و هو مثل ما قلتي يؤكل معه السمك المقلي الصغير او المتوسط .

او

2- التمن مع الماش ( و هي حبوب الماش الصغيرة المكورة ذات اللون الزيتوني الغامض او الاخضر الغامق جدا ) .... يسلق الرز و الماش كلا على حده ثم يحمس بالزيت و يصب في صحن كبير و يجمل بالبصل المحمر و السمك الصغير المقلي ( مثل سمك الزوري - الذي يسمى ببغداد ( ابو خريزة ) لان عينه تكون بارزه و ممكن ان يكون له معنى اخر .

او يؤكل تمن الماش ( بدلا من البصل و السمك ) مع الدبس يعني يرش على سطحه بعض الدبس و يؤكل معه و هو لذيذ جدا ( اكلتي المفضلة ) يعني :rolleyes:


و اخيرا ...

هيچ = يمكن ان تعطي المعنى الذي ذكرتيه وايضا المعنى الذي ذكرته الاخت بنفسج و اصلها فارسي مثل ما ذكر .

ذب و عوف = معناها مثل ما ذكرتي بالضبط .


ملاحظة ::::::

بيرغ = تلفظ ( بالغين ) و هي بمعنى العلم و لكن ليس بالعلم العادي بل هو العلم الخاص بأهل البيت فأما يكون لونه اخضر او اسود .

و البيرغ ذكرني بالعلگ ,,,,

علگ = قطعة صغيرة توخذ من البيرغ عندما ينذر شخص نذرا لأهل البيت و النذر يتحقق فيقوم الاخرون بأخذ قطع صغيرة من البيرغ و هي ما تسمى بالعلگ و هي اما تشد على شباك احد الائمة لطلب الحاجة او يشد على معصم اليد ان كان الشخص مريض او يطلب مراد .

يطلب مراد = لفظها الصحيح ام راد ( يعني قطع خفيف باللفظ لكي لا تكون مثل اسم مراد لفظها ) و معناها طلب الثواب .

عذرا على الاطالة بس شنو رأيكم دا اشرح و انطي اكلات في نفس الوقت !!!!
اعتذر ان كررت كلمات ذكرت من قبل لاني لا اقرأ كل المشاركات ....

و تحياتي لكم مولانا آزاد ....

اختكم
براثا

بنفسج
21-12-2004, 03:17 PM
عيني بنفسج بما انو اني جاوبت على حزورتج، صار دوري هسه :)

شنو يعني: جقلمبة؟ :)

يابة تره اني وعدت و وعد الآزاد دين (يعني وعد الحر دين :) )

ازادي عيني : تعني تشقلبه او شقلبه

وعد الازاد وين :)

الشمس المهدوية
21-12-2004, 03:55 PM
من الكلمات العراقية :


هوسة : بمعنى ضجيج و ازدحام

او

الهوسة :
فن شعري معروف في العراق وبادية الشام,وهي احد انواع الشعر العراقي مثل الابوذية والدرامي والزهيري ...الخ.
ويسمى شاعر الهوسة: (المهوال), والهوسة تبدأ شعراً ثم تأتي الهوسة في الشطر الأخير, وقد ينسى الناس الشعر وتبقى الهوسة في الجملة الأخيرة.


مثل :

(كل جابت خابت بس انا):
قالتها امرأة استشهد ولدها في ثورة العشرين ....جابت اي من ولدت .

( رد مالك ملعب ويانا) :
اي ارجع لمكانك لانه لايوجد مكان للامثالك للعب معنا .

( الطوب افخر لو مگواري ) ... او ( الطوب احسن لو مگواري ) :
و هي من هوسات ثورة العشرين التي بقيت عالقة في الذهن الى يومنا هذا و معناها من الافضل او الاحسن في القتال الطوب ( و هو المدفع ) ام المگوار ( الذي تقدم شرحه من قبل الاخ آزاد ) ,,,, و يقصد بالهوسة الاستهزاء بالقوة العسكرية الانكليزية لانهم بالمگوار انتصورا عليهم .



كلمات اخر :::::::

تلولي : اي المرأة التي تهز مهد الطفل و تغني له .


بقجه :

فهي كلمة تركية، وتكتب بالحروف اللاتينية حالياً حسب الكتابة التركية «Bocha» وهي صرة الهدوم ، اي قطعة قماش يضعون فيها الملابس و يشدوها من الاعلى و تحمل على الكتف او في اليد .

هدوم : تعني ملابس .

بلابوش :

فهي أيضاً كلمة تركية، وهي كلمة مركبة ومؤلفة من «Bela» بمعنى البلاء أو سوء الحظ «Ung Luck» كما جاءت في القاموس الألماني التركي أو «Misfortune» بموجب الكلمة الإنكليزية و«Bu» بمعنى «هذا» فتكون الكلمة (هذا البلاء) أو (هذا الحظ السيئ)، لكن يبدو أن الـ(ش) الزائدة هي الزائدة على كلمة (بلابو) التركية، فأصبحت في لهجتنا الدارجة (بلابوش) «BelaBu».

و الغريب في الامر انو في بعض الاحيان الان عندما نتذكر هذه الكلمة نربطها ببلاء بوش الحالي ....
و تستخدم بمعنى اننا عندما ننضجر من شخص ما فأننا ندعو عليه بالبلاء .

ملاحظة : العهدة على المترجم لان اختصاصي لغات اخرى غير التركية .





تحياتي
براثا

بنفسج
21-12-2004, 06:00 PM
مولاتي ....

انا من البصرة ابا عند جد و لايوجد شيء من هذا القبيل ( يعني مثل هذه الاكلة ) و حتى سألت الاهل حتى اتأكد و گالولي ماكو هيچي شي صحيح و لادتنا و حياتنا في بغداد بس اكيد اجدادنا و اهلنا معظمهم في البصرة .....


و اخيرا ...

هيچ = يمكن ان تعطي المعنى الذي ذكرتيه وايضا المعنى الذي ذكرته الاخت بنفسج و اصلها فارسي مثل ما ذكر .

ذب و عوف = معناها مثل ما ذكرتي بالضبط .


ملاحظة ::::::

بيرغ = تلفظ ( بالغين ) و هي بمعنى العلم و لكن ليس بالعلم العادي بل هو العلم الخاص بأهل البيت فأما يكون لونه اخضر او اسود .


اختكم
براثا


خيه براثا

شلونتش

معلومة سينا عن التمن المحمر ومعلومتي ايضا صح .. وتدرس بكل الكليات وشرحتها النا شاعرة العراق والعرب ورائدة الشعر الحديث : لميعه عباس عماره وهي بالمناسبه مؤسسه كليه اللهجات بسان دييغو وتزور كليتنا وكلامها صحيح لان الجامعات المعتمده لا تدرس معلومه خاطئه ..وحتي سينا شرحها او شرحتها همينه صح السكر ايضا يستخدم .. البصاروه القدامي أهل البيوتات الاصيله يستخدمون الدبس لسبوع المولود .

بيرق ليس خاص بأهل البيت سلام الله عليهم!! ..وهي كلمه ساميه أدخلها العرب العاربه للغه .
وهم من جابوا الكلمه واسسوا البيارق ..البيرق له الوان واحجام مختلفه وحسب الوظيفه المخصصه له يعني الشرح يسودنكم :)

أما الاسم الذي يطلق علي علم أهل البيت الخاص :) لن أقوله هاي سؤال المسابقه نخليه للجميع أزاد يابه يالله شد حيلك:) ..بس أظن لو يشارك دكتور مؤيد سيعرفه

يالله براثا عيني يا عونهم :)


يالله سندي يمتي تجيبين جواب خطة العباس مسموح بمساعدة الماما :)

بنفسج
21-12-2004, 06:33 PM
عيني كوثر النجف
والله انعوج تمي وتسودنت وانا اريد اقول شلنفص :) يا معوده لا يسمعونج لجنة الانتخابات العراقيه وتطيرين الجنسيه علينا

بس دمك شربات والله شلون جاتلج هالكلمه؟

آزاد اسكندر
21-12-2004, 06:53 PM
الاخت العزيزة كوثر النجف

مشكورة عيوني على هل كلمات الجميلة، من زمان ما سامع كلمة كتلي :)

بس شلنفص هاي أول مرة أسمعها بحياتي :)

مشكورة ياب

القلب الحسيني
21-12-2004, 07:00 PM
بصراحة خبلتوني بهاي الكلمات .. حلوة حييييييييييييل لهجتكم

وأني اموت بيها

وشكرا الكم افدتوني هواي

آزاد اسكندر
21-12-2004, 07:03 PM
عيني براثا شنو هل شطارة؟ :) ،يعني طبخات و هم كلمات :)

بس نحن نطالب بنشر سر طريقة القيمر العراقي حتى يكون سبق صحفي :)

و ابد مو قبول تدزيها عل الخاص ميصييير :)، ليش شنو احنا وحد يعني ؟ :)

مشكورة عيوني :)

آزاد اسكندر
21-12-2004, 07:09 PM
هاي شنو..و الله كبستنا بنفسج ،عبالي ما تقدرين تجاوبين هاي الحزورة ، و الله زين ، شطوووورة

ها يابة شتكولون تستاهل بنفسج الجنسية لو لا؟

اني اقول اي تستاهلها :)

عيني بنفسج تره الله سبحانه خلق الكون بسبع أيام :) ،الصبر طيب :)

و بعدين من تريجينا الريوج العراقي ننطيج الهدية :) ،لو نسيتي دعوتج النا آني و مؤيد و سندس على الريوج و اذا عل التوثية مال الوالد مو مشكلة كلشي يهون من اجل الريوح العراقي :)

السيد علي الموسوي
21-12-2004, 07:51 PM
هاي شنو بابا ماظل جلمة الا وقلتووووووووها
هسة اليجون راح يعرفون يحجون عراقي احسن من عدنا ههههههه

واني هم رح اضيف جم جلمة من عندي :


بطانية : لحاف
وحش الطاوة : باذنجان
ناطور : حارس
قجقجية : المهربين
تفك : طلقات
صخلة : غنمة
قندرة : حذاء
ناموس : الاصل او العشيرة
الكرب : الحزن والألم
السندانة : المزهرية
الضيم : الظلم
يمتى : متى
خطار : ضيوف


واحب اضيف بعض الكلمات من كلام اهل الريف بالناصرية ويم الاهوار اللي اني اصلي منهم :

جلم : كلام
يتهوبز : يتكبر
مواجيل : الطعام او الأكل
هودر : نبت وتربى وترعرع
بالطو : جاكيت
شمتة : حقيبة (جنطة)
كيلون : قفل الباب
المطي : الزمال او الحمار
بو خميس : الأسد
سير : حزام
ناوش : اعطي او اوصل
معلانا : سيدنا او مولانا
مجورة : الامراة التي تلف ثيابها على راسها في المشي
الولاية : المدينة
الجدوم : الفأس
المجرشة : الالة لطحن الرز او التمن
الشلب : نبتة الرز او التمن
مشحوف : شبه قارب يستعمل دائما في منطقة الاهوار

بنفسج
21-12-2004, 08:00 PM
هاي شنو..و الله كبستنا بنفسج ،عبالي ما تقدرين تجاوبين هاي الحزورة ، و الله زين ، شطوووورة

ها يابة شتكولون تستاهل بنفسج الجنسية لو لا؟

اني اقول اي تستاهلها :)

عيني بنفسج تره الله سبحانه خلق الكون بسبع أيام :) ،الصبر طيب :)

و بعدين من تريجينا الريوج العراقي ننطيج الهدية :) ،لو نسيتي دعوتج النا آني و مؤيد و سندس على الريوج و اذا عل التوثية مال الوالد مو مشكلة كلشي يهون من اجل الريوح العراقي :)


خلاص توكل علي الله بس متل ما قلت الله خلق الكون بسبع أيام :) يعني الفيزا شوي اطول لا تضوج عيني
يا معود ليش تذكر سندس ومؤيد ...هسه فيزا وحده مشلوعه قلوبنا اليما نطلعها ..هالنوب 3 :) .. بس علمود انتو نسبانا صوب علاوي تستاهلون وشايفين خير

آزاد اسكندر
21-12-2004, 08:02 PM
الاخ الكريم القلب الحسيني

كل الهلا بيك عيوني، حللت بين أهلك

انته الجميل ياب هذا من لطفك :)

بنفسج
21-12-2004, 08:13 PM
هلو قلب حسينينا اي والله موضوع يخبل ويستاهل يتثبت من زمااااااااان :) ..ما عليه ثبتناه بقلوبنا

سيد علي الموسوي : كلماتك قحه صميمه أشكرك هوايا عليها

حيهم أهل الناصريه :)

آزاد اسكندر
21-12-2004, 08:16 PM
يلله عيني بنفسج مو احنه دا نتوسطلكم عل جنسية :) ،بس على الله يغزر و تنطون صوتكم بالانتخابات لجماعتنا الكاكوات :) أو لعمو الياور لأن صرنا أهل :)

آزاد اسكندر
21-12-2004, 08:24 PM
السيد علي الحسيني

هلا بيك مولاي ،عاشت اليمين اللي كتبت هل الكلمات الحلوة، 100 بالعمارة و أهلها :)

بس احنا نريد بعد كلمات عمارتلية :) ،يلله همتك ويانا سيدنا:)

بنفسج
21-12-2004, 08:37 PM
يلله عيني بنفسج مو احنه دا نتوسطلكم عل جنسية :) ،بس على الله يغزر و تنطون صوتكم بالانتخابات لجماعتنا الكاكوات :) أو لعمو الياور لأن صرنا أهل :)

عد عينك :) بس وينها الجنسيه وين بو علي وين مسحاته :) .. التصويت بالبطاقه التموينيه واحنا ما نريد نتهوبز بالحجي بليا اثبات :)
يغزر بعيونا اغاتي وننطي صوتنا للكاكوات والاعمام

حيهم:)

بنفسج
21-12-2004, 08:51 PM
هسه سوالف الجني وازلامه :)

طنطل : يقال أنه نوع من الجن الغير عاقل طويل جدا وأحيانا يري بالليل فوق النخل ( شمصعده ما أعرف ! ) أما قصة ظهوره وكيف تستطيع أن تهرب منه :) يابا ما أقدر اقولها بلكت آزاد يقدر :) نذبها عليه




بالنسبة للطنطل ،من جنت صغير كان جد أمي يسولفلنا عن الطنطل، و هو حسب ما اعرف كائن اسطوري شعبي توارد اسمه في الحكايات الشعبية و هو نصفه حيوان و نصفه انسان، مخيف و يظهر بالليل يمممههه يمعودين الدنيا ليل لا يطلعنا طنطل عل الطاري :)



عيني براثا ويا سيدنا الموسوي
بما انكم من الجنوب ..يا معودين شرحو الطنطل لاهل بغداد ..هاي طنطلهم زين الظاهر ..بس طنطل البصره والناصريه وكيح هوايا وشلنفص :) بعدين طريقة التخلص منه ما يعرفوها بالمنتدي

نذبها عليكم لو لاله :) ؟

آزاد اسكندر
21-12-2004, 08:51 PM
ليش انتي ما سامعه المثل اللي يقول : شيم العربي و اخذ عباته :)

بس احنا تره كدها (مو بالهندي :) ) ،بس لازم تجين تسوين مقابلة بالعراق و اذا عبرتي من الخطف و القنابل و قذائف الهاون و السيارات المفخخة و التسليب و الامريكان تصير الجنسية مضمونة ،ها شتقولين :)

كلش سهلة مو ؟ :)

بنفسج
21-12-2004, 08:57 PM
هههههههه لا أبد .سهله كلش

يخرب زوقك شو مهضوم :)

آزاد اسكندر
21-12-2004, 09:05 PM
و الله بعد اللي يريد الحلو يصبر على مره :) ،بس احنا المر مالنا كتال

مشكورة عيوني على الكلمات الجميلة بخصوص الموضوع ،أهم شي الموضوع عجبكم :)

بس غير تشرحين شنو يعني مسحاة (مسحاة أو كرك: أداة من ادوات الفلاحة تحفر بها الارض).

شلوني قوي كلش بالشرح مو؟ :)

على ضفاف دجله
21-12-2004, 09:09 PM
مساكم الله بالخير والعافية جميعاً



اني ايضا اضيف اعجابي باسم الاخت العزيزة على ضفاف دجلة .. اسمج اختي كلش حلو.



عيونج الحلوة عيني سندس
ذكرتيني مرة جنت بمسنجر يا زينب وجانت هناك بنيه بأسم سندس
عبالي انتي فسألتها انتي اللي بمنتدى يا حسين قالت لا..

العزيزة بنفسج
احنه اهل العراق كلنه اهل الجود و الكرم
على فكرة عشيرتي نسبها يعود الى صاحب الكرم حاتم الطائي
فما بالك بدجلة ههههههه:D:D


الأخ ابو دجلة
الله يوفقك ويرزقك بدجلة و وراها فرات واذا هم تريد شط العرب:D

موفقين جميعاً..

آزاد اسكندر
21-12-2004, 09:15 PM
العزيزة على ضفاف دجلة

لا عيني دجلة كلش كافي ،شنو طالبتني طلابة؟ :) ،منين أوكلهم هل مجاريد
:)
كل الهلا بيج عيوني :)

طلابة: يعني ثأر أو مصيبة
مجاريد: يعني مساكين

بنفسج
22-12-2004, 05:57 AM
أما الاسم الذي يطلق علي علم أهل البيت الخاص :) لن أقوله هاي سؤال المسابقه نخليه للجميع أزاد يابه يالله شد حيلك:) ..بس أظن لو يشارك دكتور مؤيد سيعرفه

[/size][/B][/color]

كاكه أزاد : هاي حرزورتك اليوم . شيتسمي علم أهل البيت ياللي يرفعه المعصوم أو نائبه بالمعارك ويوم الزحف ؟

وبالمره علمود امتحان الفيزا بالمانيا :) نريد نعرف معني دجله والفرات .. دانكا ياب

بنفسج
22-12-2004, 06:04 AM
و الله بعد اللي يريد الحلو يصبر على مره :) ،بس احنا المر مالنا كتال

مشكورة عيوني على الكلمات الجميلة بخصوص الموضوع ،أهم شي الموضوع عجبكم :)

بس غير تشرحين شنو يعني مسحاة (مسحاة أو كرك: أداة من ادوات الفلاحة تحفر بها الارض).

شلوني قوي كلش بالشرح مو؟ :)

عيني حلوكم و مركم يمرد المصارين مرد يا

كتال !! :)

سندس حبيب
22-12-2004, 08:47 AM
صباح الخيرات

عزيزتي ضفافي .. اني ماادخل لامسنجر ولاشات ولاهم يحزنون .. توبة بس هالنوبة.. انجويت مرة وتبت على ايدالله .

انجويت : انكويت يعني مكوي بالنار

اني شوف صعوبة من شرح بعض كلماتنا باللغة الفصيحة .

ملجوم قلبي : ملجوم اتت من كلمة اللكمة .

قريولة : سرير من الحديد لشخص واحد .

للان مازلت اسال عن خطة العباس والكل يقول احنه سامعين بيها بس مانعرف شنو .

بس على العموم هناك سبوتية ( يعني كل يوم سبت) يزورون اما الامام الكاظم عليه السلام او العباس عليه السلام ولمدة 7 اسابيع . لقضاء الحوائج .

ديرو بالكم تجون للعراق ... تره صخام ودهن لية :)... ماتلومون الا نفسكم . ماساة بكل معنى الكلمة

دهن لية : اللية هي شحم الحيوان ( الخروف بالذات)

كنت محضرة كلمات بس ايضا شفتها مكتوبة اليوم

يلله علجايات انشالله .


بالمناسبة بنفسج لهجتج اتحسنت هواية وكلامج صار مفهوم اكثر .. يعني زين ترتبين الكلمات .. سباعية ومكموعة :)... مو هيجي؟

اودعناكم
تحياتي

كوثر النجف
22-12-2004, 11:12 AM
سلام على الجميع
شكراااااااا للاخ بنفسج على روحه المرحه وشكر للاخ ازاد بس تره كلمه شلنفص كلمه كثيره الاستعمال
واليوم راح اكلكم شويه كلمات عراقيه
لان انتوا اخذتونا حاصل فاصل (حاصل فاصل )
(قوري ) همينه تعني كتلي
(طرمه) هي المسافه التي تتقدم المنزل مثل الكراج
(يشور) وهي كلمه تعني يصب الاذى للشخص الذي يتكلم عليه بالسوء
( شاطي باطي) بس مااعرف شنو معناها
( اشكد دهري ) كلمه للشخص اللاابالي
( جفجير ) مثل ملعقه كبيره
واكيد كلكم تعرفون ( شكو ماكو ) احلى كلمه عراقيه مو بله

~*ريحانة*~
22-12-2004, 11:30 AM
السلام عليكم
شاطي باطي ما اعرف احنا نقولها شيطي بيطيhttp://smilies.sofrayt.com/%5E/r/supergrin.gif ونقصد بيها يعني مثلا الشغل اذا مو متقن نقول شغل شيطي بيطي http://smilies.sofrayt.com/%5E/r/supergrin.gif اسمحوا لنا لغتنا ركيكةhttp://smilies.sofrayt.com/%5E/8/superbiggrin.gif

بنت الحسين
22-12-2004, 11:40 AM
تسجيل متابعتي

لهجة العراقيين واجد جميلة ،، ماشاء الله على طيب الكلام

نتعلم منكم أشوي

آزاد اسكندر
22-12-2004, 12:12 PM
عيني سندس ما أدري ليش كل ما أعزم أروح للعراق علمود الزيارة ينلاص الوضع :)
كلش مشتاق أزور الامام الكاظم عليه السلام،آخر زيارة الي كانت بشهر 2 الماضي
الله يكتبها للجميع إن شاء الله

نورالأنوار
22-12-2004, 12:15 PM
السلام عليكم ورحمة الله وبركاته

من متى بدأ التسجيل في مدرسة تعليم اللهجة العراقية؟؟؟؟
أنا أنتظر التسجيل من زمااااااان :(:(:(

الله يلعن الوهابية إلي يتسببون في حجب المنتدى عنا بإستمرار:mad:
يالله نبدء معكم الدروس بعد إنتهاء الإمتحانات ..

ترحبون فيني كاطالبة وإلا مطرووووده :(:(


نسألكم الدعاء
إختكم:
نورالأنوار

آزاد اسكندر
22-12-2004, 12:17 PM
العزيزة كوثر النجف
الفرق بين الكتلي و القوري انو الكتلي حجمه يكون أكبر عادة، و بالنسبة لكلمة "شاطي باطي" يعني ماخذنا حاصل فاصل يعني ما منطينا مجال
و هاي الكلمة ذكرتني بمرادف إلها و هو "فلاحة ملاجة"
و أعتقد أصل هنا هو انو الاراضي الزراعية قبل يملكها عادة إقطاعي و يأجر الفلاحين يزرعوها مقابل شي من المحصول، فإذا كان الشخص ما مخلي لأحد مجال بفد شي معين يقولون عنه ماخذها "فلاحة ملاجة" يعني هم مالته الارض و هم هو يفلحها :)

تحياتي لك و شكرا جزيلا :)

آزاد اسكندر
22-12-2004, 12:20 PM
الاخت العزيزة نور الانوار

كل الهلا بيج عيوني ،نورتي ياب :)

و الله هذول الوهابية مجانين الله يعينكم عليهم، يلله هلا بيج بكل وقت بس تره الدرس اللي يفوتج يتعوض بسيطة :)

تحياتي و أهلا و سهلا :)

آزاد اسكندر
22-12-2004, 12:23 PM
الاخت الكريمة بنت الحسين

أهلا و سهلا بيج أغاتي

تشرفنا بوجودج

يلله ننتظر مشاركاتج ويانا :)

تحياتي أختي العزيزة و مشكورة على المشاركة

آزاد اسكندر
22-12-2004, 12:26 PM
هسه فرغنا لبنفسج :)، الحقيقة آني اللي أعرفها ان لواء أهل البيت اسمه البيرغ أو اللواء و ما واردة عليه غير تسمية.
بس إذا بعض الناس يريدون ياخذوها حجة و ما ينطونا الفيزا نذكرهم بكلمة "لالنكي" :) ، يعني هسه صرنا تعادل :)
بس المشكلة احنا الكول (الكول=الهدف) علينا بكولين لأن دا نلعب على أرضنا :)

آزاد اسكندر
22-12-2004, 12:28 PM
ها ريحانة شتقولين تفسير فلاحة ملاجة صحيح لو لا ؟ :)

~*ريحانة*~
22-12-2004, 01:04 PM
اذا مو مثل شاطي باطي مالها مرادف ثاني عندنا فالحق يقال صحيحة وصح لسانك :p
تلميذتكم ريحانة:p

آزاد اسكندر
22-12-2004, 01:10 PM
العفو ياب انتو الاصل :) ،كلنا تلاميذ الذي قال -روحي فداه- "سلوني قبل أن تفقدوني" ،
مشكورة عيني ريحانة على التواصل و المشاركة.

:)

بنفسج
22-12-2004, 05:45 PM
حيهم ياب بالجدد والعتج :)

طبعا سندسي البيت بيتها والليه هاي انسيها خليج ويانا وما عليج من مشعولي الصفحه

بالنسبه للعضوه ريحانه اقللها : عيني اشكرج ع التوقيع اللي يخبل وتري الثانيين احترقو فاذا في واسطه مع اختج عود تعيد التوقيعين بلا زحمه نكون الها من الشاكرين وبالمقابل اعلمكم خطة العباس وليش محد يعرفها يا وسفه

عيني كاكه ازاد فضحتنها :) خو ما صار لالنكي تري الرمان زاهب :) داد

انتا جاوبت بعدين ما ادري شبيك !! ياب اسمه اللواء وبس وبيرق حتي ينطوه قوه يضيفون هالتسميه ما سمعت ان للرسول الاعظم لواء الحمد ..هاي شبيك سودنوك اهل السعالوه


بس همينه علم مهدينا ما راح اقله بلكت تعرف شراح يسمونه

آزاد اسكندر
22-12-2004, 06:18 PM
دا نتشلقة وياج يابة :) شدعوة دمكم حامي :)

ها هسه استحقينا الفيزا؟

و الان دورج تجاوبين على هل سؤال: ما معنى كلمة "دوندرمة" ؟

هاي اذا جاوبتيها صدك غير، ادزلج الجنسية بل Dhl :)

عيني لا رمان و لا لالنكي خلي الطابك مستور :)

السيد علي الموسوي
22-12-2004, 06:25 PM
ازااد دندرمة مو يعني موطة لو قصدك كلمة لخة؟؟

بنفسج
22-12-2004, 06:26 PM
بسيطه هاي ايس كريم لان بلبنان وتركيا نستخدمها وحتي مصر احيانا

شدعوه يابا نتشاقي وياك :) تستاهل الفيزا بس لا تسال وينها بس تخيلها هيه والطنطل والمخلوقات الخرافيه :)

ياب كل الميوه نهدينا صوبك .. حيهم الكاكوات :)

على ضفاف دجله
22-12-2004, 06:29 PM
صباح الخيرات

عزيزتي ضفافي .. اني ماادخل لامسنجر ولاشات ولاهم يحزنون .. توبة بس هالنوبة.. انجويت مرة وتبت على ايدالله .


اوف شنو هالجويه؟؟وان شاء الله ما تأذيتي منها:D
توبي توبي ما بئى عيدها

أخ آزاد شنو هاي طالبتني طلابه..
أن الله يرزق من يشاء بغير حساب..
شنقصه يا ابو شط العرب:D

شوفي عيوني بنفسج..
موافقة على انو ينطوج الجنسية العراقية..
اني بزماني ردت أخذ الجنسية اللبنانية من العضوه لولو بس من انقطعت عن المنتدى راحت كل آمالي العريقاتِ..
و هسه الدور عليج اذا كنتي لبنانية اريدها منج انتي ها شكلتي؟ :D:D

**********************

هسه عندي جم مثل عراقي شعبي..لكن المعنى صعب
اخلي التفسير لبنفسج و ريحانه ولغير العراقيين

- خية خاوتني أخذت رجلي و خلتني
- يمه اني من ولادج واحد,عفت الجبهة وجيتج شارد
- ضل ابو شعيفه على كيفه
- ساعاتها براحاتها( طبعاً وحده من الأخوات سألتني على معناها معقوله لهالدرجه صعب)
- يو تطخه يو تطلع مخه
ومثلاً نكول فلان مرخيله الحبل

نكمل البقيه بعدين

تحياتي..
أختكم:على ضفاف دجله

آزاد اسكندر
22-12-2004, 06:34 PM
:) هههه

جوابج صحيح عيني بنفسج بس الظاهر راح نشوف الطنطل و ما نشوف الفيزا :)

بنفسج
22-12-2004, 06:36 PM
خطة العباس : حرز لحفظ الانفس والممتلكات

يشور : اي يظهر عليك باسه وشدته كما اوردتهاعزيزتنا كوثر النجف

وتقول العشائر : المقام اللي ما يتشور ما ينزار

و: مقام ما عبتني ما اسميك من اليوم مقام

وانا بعيني شاهدت احد الساده الذي توفي كيف اظهر التشوير حينما استهزئوا فيه حيث تحدث بنفس صوته علي لسان المرأه التي تعدت عليه !! دخيل بخته :) شموديني صوبه ما اعرف ؟ صدقت سندس مكموعه !!

هاي لو عايش والله ازاد عيني احجي وياه علمود الفيزا يقلب الالمان شاذيه علمودك :)..يا وسفه ياب

آزاد اسكندر
22-12-2004, 06:36 PM
الكريمة على ضفاف دجلة

مشكورة على هل الامثال الحلوة بس تره كلشي ما افتهمت نريد ترجمة :)، صدق العراق لهجاته متنوعة و كثيرة، هاي الامثال اول مرة اسمعها.
بس مشكورة ما قصرتي :)

و بالنسبة للجهال نقول يا بخت من زار و خفف :)

آزاد اسكندر
22-12-2004, 06:39 PM
بنفسج ذكرتيني بمثل عراقي يقول:

"الامام اللي ما يشور يصيحولة ابو الخرق"

و هذا مثل يقال للذي يقول شي و ماينفذه

مشكورة ياب :)، يمعوده المهم كسبنا معرفتكم :)

بنفسج
22-12-2004, 06:46 PM
شوفي عيوني بنفسج..
موافقة على انو ينطوج الجنسية العراقية..
اني بزماني ردت أخذ الجنسية اللبنانية من العضوه لولو بس من انقطعت عن المنتدى راحت كل آمالي العريقاتِ..
و هسه الدور عليج اذا كنتي لبنانية اريدها منج انتي ها شكلتي؟ :D:D



**********************

هسه عندي جم مثل عراقي شعبي..لكن المعنى صعب
اخلي التفسير لبنفسج و ريحانه ولغير العراقيين

- خية خاوتني أخذت رجلي و خلتني


- يمه اني من ولادج واحد,عفت الجبهة وجيتج شارد

- ضل ابو شعيفه على كيفه
- ساعاتها براحاتها( طبعاً وحده من الأخوات سألتني على معناها معقوله لهالدرجه صعب)
- يو تطخه يو تطلع مخه
ومثلاً نكول فلان مرخيله الحبل

نكمل البقيه بعدين

تحياتي..
أختكم:على ضفاف دجله

[color=#009900]


هههههههههههه يا معودين :) صارت كصه بكصه ( شئ مقابل شئ )

صعبه اللبنانيه ما ؟ بس الالماني اسهل لا تعلمين ازاد ..كلش سهله الجنسيتين بس خلوها بصفحة الطنطل وام السعف

العزيزه التي تاخيت معها واخذت زوجي ثم تخلت عني


امي انا من عرفتيني وعرفتك لم اتغير تركت النار واتيت لك انشد السلام

يعني صاحب الطبع لا يتغير ابدا


اما تدخل الامور الصعاب او الامور بكاملها او لا تغامر

فلان ماخد راحتو

color]

بنفسج
22-12-2004, 06:53 PM
بنفسج ذكرتيني بمثل عراقي يقول:

"الامام اللي ما يشور يصيحولة ابو الخرق"

و هذا مثل يقال للذي يقول شي و ماينفذه

مشكورة ياب :)، يمعوده المهم كسبنا معرفتكم :)

ههههههههههههههههههههه

شو هاي ابو الخرق !! :) يخرب زوقك ..عيني دجله لو يرشح ازاد نفسو للانتخابات مش كان احسن ؟ ع الاقل يفرح قلوب العراقيين بهالفكاهه وخفة الظل والذكاء

كاكة الكاكوات يابا احنا تشرفنا كلش بمعرفتكم ..ع الراس

تري الي الحين ما عرفنا لا دجله ولا الفرات
عبالك نسيت :) وانا بتك يا جوبلز

آزاد اسكندر
22-12-2004, 06:53 PM
هاي كم كلمة جديدة: :)

واوي: الواوي هو الضبع

خوش :يعني زين

مو خوش: يعني مو زين، و "مو" اذا تنحط قبل اي كلمة تعطي معنى النفي

و قد تأتي بصيغة الاستفهام أيضا "مو؟"

مكدي: المكدي هو المتسول

دولمة: أكلة عراقية شهيرة

السيد علي الموسوي
22-12-2004, 06:56 PM
السلاام عليكم جميعا

احب اضيف كلمات من لهجة الناصرية :

جرصال : الجرس
زعنوط : زعطوط

"خذ الحجاج والطيب" : مثل بمعنى خذ كل شيء
"ميزان حيدر" : ماعرف شنو قصة هذا المثل بالظبط لكن بمعنى اوزن بالعدل او اعمل بالعدل ولا تظلم احد، يعني من نعاتب احد انكول "صير ميزان حيدر"
"هبز ولبز" : نقوله احيانا من يبتدي واحد يتفلسف انقول له "بلا هبز ولبز"
واظن كلمة "هبز" ماخوذة من كلمة "يتهوبز" بمعنى يتفلسف
"انعيزه مثل عيسى" : بمعنى نريده بشكل ضروري وعاجل
"جابس حابس" : يعني من نضوج من شي انقول جابس حابس يعني مثل كابس على نفسنا او شي من هذا القبيل

آزاد اسكندر
22-12-2004, 06:56 PM
ههههههههههههههه :)

عيني بنفسج الفرات كلمة عربية فصيحة معناها الماء العذب،يقال ماء فرات يعني ماء عذب صافي.

أما عن دجلة فأنا الحقيقة لا أدري ما معناها

اويلي منج متنسين شي صدق سعلوة :) :)

بنفسج
22-12-2004, 06:59 PM
معلانا الموسوي : هاي جرصال نحنا كمان نحكي جرسه ( من جرس ) لنفس المعني !! يعني صدق نحنا نسبه صوب علاوي .

بس عجبني هبز لبز :)

لا عيني ازاد كلو ولا السعلوه العراقيه :)

السيد علي الموسوي
22-12-2004, 07:09 PM
هههههههههههههههه

لعد اكو تقارب بيناتنا
هم زين حتى تتعلمين الحجي العراقي واتلكطيه ابساع

آزاد اسكندر
22-12-2004, 07:09 PM
هلا بيك سيدنا ،مشكور على هل الامثال الجميلة :)

اعتقد هبز لبز ممكن يكون أصلها من همز و لمز ،ها شنو رأيكم؟

آزاد اسكندر
22-12-2004, 07:11 PM
عيوني بنفسج وردة انتي و الله لا سعلوة و لا شي ،

بس ما قلتيلنا شنو يعني دجلة؟

بنفسج
22-12-2004, 07:14 PM
خيجو بيجو
الكلام الغير مفهوم

يقصد به خاجه باشا اي كلام الاجانب الذين يرطنون من الباشوات الاتراك والخاجات الايرانيين

حتي بني لام ما يقدرون عليك

اي لا احد يقدر عليك حتي عشيرة بني لام الشديدة الباس :)

آزاد اسكندر
22-12-2004, 07:16 PM
اكو مثل عراقي يضرب للذي يترك ما في يده للحصول على شئ أفضل فيضيع الاثنين معاً، و المثل هو:
"لا حظت برجيلها و لا سيد علي" بس لا يطلع هذا سيدنا علي الموسوي :)

و مرادف له ايضا المثل القائل: "مضيع المشيتين"

بنفسج
22-12-2004, 07:17 PM
هلا بيك سيدنا ،مشكور على هل الامثال الجميلة :)

اعتقد هبز لبز ممكن يكون أصلها من همز و لمز ،ها شنو رأيكم؟


عفارم :) جبتها

والله ما اعرف دجله بس هي غير عربيه علي ما اعتقد

آزاد اسكندر
22-12-2004, 07:20 PM
راح احوال اجد أصل كلمة دجلة و اذا وصلت لنتيجة أخبركم :)

بنفسج
23-12-2004, 07:10 AM
هسه عندي جم مثل عراقي شعبي..لكن المعنى صعب
اخلي التفسير لبنفسج و ريحانه ولغير العراقيين


- ساعاتها براحاتها( طبعاً وحده من الأخوات سألتني على معناها معقوله لهالدرجه صعب)

أختكم:على ضفاف دجله

عزيزتي دجله : تري ما عرفت هالمثل وما ريد اغش من جوارينا .بس الله عليج ما تفضحيني بالمنتدي تري تطيرين علينا الجنسيه :) مثل ما طارت اللبنانيه منكن .والله وبالله لو نسباي لحود تشان اول من يجنس هالسنه دجله وازاد ..يا وسفه ياللي ما يستاهلون ياخذوها عدنا همينه جوتره

بنفسج
23-12-2004, 07:15 AM
سيدعلي : رحت صوب جوارينا احجي تا يصححون اليا الكلمات لان الكتابه مش متل الحكي ..فسمعت صهرن بالصاله عم يحكي : صبو الغدا

يعني ضعوا الغداء ..وعدنا همين متل باللبناني كمان تحكوه وهو
الكعك من العجين

سندس حبيب
23-12-2004, 08:32 AM
صباح الخير
شلونك ؟ شكو ماكو؟
اشو طايرين بالكلام .. حته مااكدر الحك بيكم .

اكو امثال مااعرفها مثل اللي كالتها ضفافي عمري ماسامعته .. هسة سمعتها ..

على كل حال .. هذي هم جم كلمة ومعناها

ينغبش : يفتش او يبحث ( الجيل الجديد الان لايعرف معناها ولاحتى يستعلمها)
دوشك : مثل المندر او الفراش ويكون غالبا من الاسفنج
جودلية : بساط يصنع من قصاصات الاقمشة او ماتبقى من خيوط الصوف .

والله كنت اتمنه اضيفكم بالعراق .. من فتحت عيني على الدنيا ولحد عام 1991 اي قبل الانتفاضة الشعبانية المباركة كان عدنه بيت بكربلاء والدي الله يرحمه كان مخليه وقف للامام الحسين عليه السلام وكل الجيران والاصدقاء وحتى الغربة نستضيفهم بيه .. حتى خالي عندما تزوج (في السبعينات) قضى شهر العسل هناك في هذا البيت ...
بعد الانتفاضة صارت العيشه بكربلا ماتنراد لاكهرباء لاماي .. ماكو كلشي وكلاشي .. وتعرض البيت للاضرار بسبب القصف فاضطرينه ان نبيعه .. مع الاسف
الله كريم انشالله تتحسن الظروف والاوضاع ونعيد الامجاد والخير .. اذا الله راد

تحياتي

على ضفاف دجله
23-12-2004, 04:27 PM
عزيزتي دجله : تري ما عرفت هالمثل وما ريد اغش من جوارينا .بس الله عليج ما تفضحيني بالمنتدي تري تطيرين علينا الجنسيه :) مثل ما طارت اللبنانيه منكن .والله وبالله لو نسباي لحود تشان اول من يجنس هالسنه دجله وازاد ..يا وسفه ياللي ما يستاهلون ياخذوها عدنا همينه جوتره

خلص ولايهمج ما عاش اللي يفضحك ولووو
بعدين آزاد شدخله اني اللي طلبت الجنسية لو هو؟:D:D
راح تسوينه العين بالعين لانه راح ينطيج الجنسية العراقية راح تكرميه بالجنسية اللبنانيه:eek:
عالعموم سوي اللي يريحج..اني اريدها يعني اريدها حتى لو بيها أمتحان او توصل الشغله الى اميل لحود شخصياً..
خليه يرشح نفسه بلكي على ايده يحل السلام :D




- خية خاوتني أخذت رجلي و خلتني

مثلاً اذا اكو صديقتان الروح بالروح و وحده من عدهن تاخذ زوج صديقتها او تخونها مع زوجها..
فاينكال خيه خاوتني اخذت رجلي و خلتني:D

- يمه اني من ولادج واحد,عفت الجبهة وجيتج شارد
المعنى واضح اني وحيد من ولادج تركت جبهة القتال و اتيت لكِ هارب..
ويمكن اله معنى ثاني ما ادري والله..

- ضل ابو شعيفه على كيفه
تماماً مثل هذا المثل أذا غاب القط ألعب يا فار

- ساعاتها براحاتها( طبعاً وحده من الأخوات سألتني على معناها معقوله لهالدرجه صعب)

فلان ساعاته براحاته يعني متقلب المزاج يوم غيم و يوم شمس..

- يو تطخه يو تطلع مخه

هم هذا يشبه المثل اللي يكول يو تكحلها يو تعميها..
يعني يا تكمل المعروف و تزيد عليه يو ما تساعد نهائياً..

ومثلاً نكول فلان مرخيله الحبل

يعني منطيه كامل الحريه و مخلينه على حل شعره..



يلا و هسه سمعتوا بهاي الأمثال..

زين شنو معنى كلمة جلبة؟؟؟
يلا يا بنفسج ورينا شطارتك;)

تحياتي
أختكم:على ضفاف دجله

بنفسج
23-12-2004, 04:42 PM
اي تكرم عينك ولا يهمك ..بس عبو الطلب ونحنا حاضرين اصلا لحود والحريري والسوليتير بالجيب !! بالمخباة عيني :)
والله وبالله عيني دجله يا انكن تستاهلون الواحد يحطكم جوا العين
انتو الروح والريه وكل الناس عاريه

__________________________

لا اعرف كيف تنطق جلبه فهل المقصود انثي الكلب ؟ جلب وجلبه؟

أم gelba اي الشعيره و غلاف الحنطه والرز ؟

_______________________

وعلي طاري الرز فان العراق مشهور بزراعة عيش العنبر او رز عنبر

وهو يشبه الرز الامريكي لكن طريقة طبخه يراد لها انسان يعرف

التعامل معها واشهر منطقه تزرعه هي المشخاب

_________________________

انشالله سندسي الله يعوضكم خير و سنواتكن كلياتا شهور عسل لا تفكرين باللي مضي ولو كان صعب امامك ما هو افضل باذن الله

ayat
23-12-2004, 08:35 PM
زين شنو معنى كلمة جلبة؟؟



السلام عليكم
شلونكم يابه شلون كيفكم إن شاء الله بخير يارب

والله هوايه حلو هالموضوع وآني من زمان فايته عليه ومباوعه مشاركاتكم الحلوه لكن ممسجله حضور ومتابعه

واليوم ردت اجاوب أختي على ضفاف دجله علمود كلمة (جلبه)
وإلي مرادفها لزكه...ومعناهه

والله مادري شلون افسره

إلي اكدر اكوله إنو معناهه الشئ الي ملازمك ولا يرضى يتركك رغم إنو إنتي مللتي منه
سواء كان شخص أو اي شئ ثاني

وإن اردتم مثل لذلك فأنا حاضره


يلا هسه آني رايحه
بامان الله وداعته عيني



آيات

على ضفاف دجله
23-12-2004, 09:14 PM
اللهم صلي على محمد وآل محمد

يلا خالتي بنفسج اعبيلك الطلب و الباقي عليكِ..

الأسم:على ضفاف دجله
العمر:18
البلد:العراق
مكان الأقامة:خارج أرض الوطن
العمل:طالبة
الهوايه:جمع الجنسيات من مختلف البلدان
اتقدم لحضرتكم و اقدم طلب الجنسية اللبنانيه..
أرجوا منكم تلبية طلبي مع أخذه بعين الأعتبار..
وشكراً سيادة العميد بنفسج:D

هلو بيج حبي آيات منوره المدرسه عيوني غلط شرح الكلمة...

كلمة چلبة تختلف عن كلمة كلب أي جلب او جلبة في اختلاف باللفظ
ومعنى الچلبة هي عندما نشتري زبادي نجد فوقه قطعه رقيقه جداً
هي ناتجه عن اختمار الزبادي..

زين كلمة روبه؟؟
طبعاً هاي كلش سهلة ما تحتاج تفكير عميق

تحياتي
أختكم:على ضفاف دجله

الشمس المهدوية
23-12-2004, 09:25 PM
ما شاء الله شنهل الحماس .....

يومين غبنا و الصفحات صارت رگع ,,,,
وحدة ورا اللوخ ,,,,,,,

بالنسبة للطنطل فسالفته سالفه و محاربته او الانتصار عليه خوب هذه حچاية ما تنحچي ههههههههههههه .

تصحيح الاخت بنفسج لمسألة التمن الاحمر بما انه هذه المعلومة صدرت عن استاذة جامعية عراقية فلربما هذه العادة هي قديمة جدا و الكثير من العادات و التقاليد محيت او تطورت او تغيرت و لابأس بمعرفتنا بالمعلومة .

طيب اريد اسأل شنو معنى كل من الكلمات التالية :


گرگمُه ّ

هندس

اسحالة

مطالسة او يطالس




تحياتي
براثا

على ضفاف دجله
23-12-2004, 09:48 PM
ما شاء الله شنهل الحماس .....
طيب اريد اسأل شنو معنى كل من الكلمات التالية :
گرگمُه ّ
هندس
اسحالة
مطالسة او يطالس
تحياتي
براثا


گرگمُه ما عرفتها..
هندس احنه نكولها يعني الدنيا ظلام هندس..
اسحالة بقايا التمن لكن مطحون مو حبة عدله..
يطالس يعني يصافح اي يسالم..

سألنه الوالدة وانطتنه هاي الترجمة..
ان شاء الله تكون صح..

زين شنو معنى الكلمات التالية..

جحيل؟
سبوس؟
حندگوگ؟
چثري؟

طبعاً هاي كلمات قديمة جداً اني بس اريد بنفسج تعرفهن:D:D

الشمس المهدوية
23-12-2004, 09:57 PM
دجلة .......

جاوبتي نص و نص و مراح اگول منو الصح

حتى يجي واحد شاطر يجاوب و بدون مساعدة





تحياتي

على ضفاف دجله
23-12-2004, 10:08 PM
لا لازم تكولين حته نعرف الصح من الخطأ:d

يلا كولي

سيناء الرافدين
24-12-2004, 01:37 AM
الموضوووووووع طول حتى انى مدا الحق اقرأ كل الردود هاي شبيكم على موضوع الكلمات العراقية شوي شوي

بالنسبة للضفاف دجلة كلمة جلبة انى اعرفها مسبة للشخص وعمرى ما سامعتها انها قشوة اللبن او قشطة اللبن بالعربي الفصيح

وبالنسبة لبراثا ترى ما انحلت مشكلتى مع الكتابة بس شسوي اشارك وياكم
بالنسبة لكلماتج ما عرفت كركمة شنو يعنى وما عندي احد اساله شنو يعني
اماالهندس فهو الظلام والهدوء المخيف
اما اسحاله هم ما اعرفها عدل يمكن الشئ المسحووول بالارض اوالاوساخ
والبقية لا اعرفهم بالمرة

آزاد اسكندر
24-12-2004, 03:35 AM
عيني سندس ان شاء الله ترجع كربلاء الحبيبة نزهي مثل فبل بأهلها و زوارها و ما تشوفين الا كل خير :)

ينغبش هاي كلمة جديدة ، صدق يكلك عيش و تعلم ،مشكورة ياب :)

آزاد اسكندر
24-12-2004, 03:41 AM
عيني دجلة ،مو حتى اسمج على اسم بنتي :) ،ليش يابة نقطع على بعض

ذكرتيني بالمثل العراقي اللي يقول : "لا يرحم و لا يخلي رحمة الله تنزل" :)

الروبة هي اللبن الرايب يعني ما ينرادلها روحة للقاضي و آني اسألج شنو هي المدينة الكردية المشهورة باللبن؟

أما عن الطبقة الرقيقة فوق الزبادي فهي القشوة على ما اعرف

:) :)

آزاد اسكندر
24-12-2004, 03:44 AM
كل الهلا بيج احتي الكريمة آيات

مراحب ياب، نورتينا :)

مشكورة على الكلمات الجميلة، نريد مشاركتج ويانا تره ما ظل شي عل قاموس :)

تحياتي :)

آزاد اسكندر
24-12-2004, 03:48 AM
هلا ببراثا :)

عيني ، هندس اني اعرفها بمعنى الصمت و الصنطة (صنطة=صمت)

آزاد اسكندر
24-12-2004, 03:49 AM
لا بس كلهن بصوب و حندكوك هاي بصوب :) ،هاي منين جبتيها فدوة اروحلج :)

آزاد اسكندر
24-12-2004, 03:51 AM
بنفسج ذكرتيني بريحة تمن العنبر من تعط بالبيت كله أفييييييششش ربي

الله ينطيج العافية :)

آزاد اسكندر
24-12-2004, 04:00 AM
طبعا هسه ساعة 3 باليل و بدال ما اروح انخمد و انام دا ادور كلمات عراقية :

فإذا خربطت هل مرة عذروني يا جماعة تره اني غادي فلم هندي و قوة مروة دا اندل دربي، و جمالة اليوم خسران بالدومنه ويه جماعتي :)


أزبري: نفس معنى دوندرمة

موطة: الايس كريم

التنور: التنور هو اللي يخبزون بيه الخبز

الجرار أو الكومدي: هو الدولاب

تعزيل أو تصفيط: بمعنى ترتيب الاغراض او الاماكن

دعابل: كرات زجاجية صغيرة يلعب بها الاطفال

تصنيف: يعني استهزاء

آزاد اسكندر
24-12-2004, 04:04 AM
اكو مثل عراقي بقول :

"الجذب المصفط أحسن من الصدق المخربط"

تحياتي للجميع :)

~*ريحانة*~
24-12-2004, 06:28 AM
اخيتي بنفسج ... تفضلي
http://yarabrohmak.jeeran.com/banafsag1.gif
http://yarabrohmak.jeeran.com/banfsg.gif

يلا عزمينا على سمج بني :p

yaqeen
24-12-2004, 07:31 AM
السلام عليكم ورحمه الله وبركاته ..
اللهم صل على محمد وآآل محمد ,,


يعطيكم الله العافيه على الموضوع ,, بس اغلبية الكلمات والامثال صعبه ,,

بس حلوة ,,

:)




بالتوفيق ,,

بنفسج
24-12-2004, 09:05 AM
اللهم صلي على محمد وآل محمد

يلا خالتي بنفسج اعبيلك الطلب و الباقي عليكِ..

الأسم:على ضفاف دجله
العمر:18
البلد:العراق
مكان الأقامة:خارج أرض الوطن
العمل:طالبة
الهوايه:جمع الجنسيات من مختلف البلدان
اتقدم لحضرتكم و اقدم طلب الجنسية اللبنانيه..
أرجوا منكم تلبية طلبي مع أخذه بعين الأعتبار..
وشكراً سيادة العميد بنفسج:D

هلو بيج حبي آيات منوره المدرسه عيوني غلط شرح الكلمة...

كلمة چلبة تختلف عن كلمة كلب أي جلب او جلبة في اختلاف باللفظ
ومعنى الچلبة هي عندما نشتري زبادي نجد فوقه قطعه رقيقه جداً
هي ناتجه عن اختمار الزبادي..

زين كلمة روبه؟؟
طبعاً هاي كلش سهلة ما تحتاج تفكير عميق

تحياتي
أختكم:على ضفاف دجله


ههههههههه آيابا شلون بنيه مظبطه شغلها ..يابا احنا ما شفنا شي :) لا طلب ولا ابو علي :) ..لا صدق اخلي البابا يحجي صوب نائب عكار ..عاد اذا بيج تصبرين تري كلها 100 سنه ويردون الخبر ما تطول أبد :)

جاوبوا علي الروبه ..بس صدق انا قرات بنهج البلاغه الامام علي يقول جلب الشعير وهي من العربيه

دجله يا أم البساتين : ياب خففي الجلمات صوبنا تري عوجتو تمي من يوم هالموضوع الرحمه كلش زينه هههههههه
سلامي لج عيني

بنفسج
24-12-2004, 09:08 AM
اخيتي بنفسج ... تفضلي
http://yarabrohmak.jeeran.com/banafsag1.gif
http://yarabrohmak.jeeran.com/banfsg.gif

يلا عزمينا على سمج بني :p


ع الراس ريحانتي ..بس صدق عزيمة البني ينراد الها فلوس الفديه

للسلابه والخاطفين واحنا ولا فد قمري بجيبنا:) ..

شوفي هاي انتي نبعة الريحان ..ايابا عليج

http://www.acclaimimages.com/_gallery/_SM/0027-0405-1909-0755_SM.jpg

بنفسج
24-12-2004, 09:16 AM
بالنسبة للطنطل فسالفته سالفه و محاربته او الانتصار عليه خوب هذه حچاية ما تنحچي ههههههههههههه .

تصحيح الاخت بنفسج لمسألة التمن الاحمر بما انه هذه المعلومة صدرت عن استاذة جامعية عراقية فلربما هذه العادة هي قديمة جدا و الكثير من العادات و التقاليد محيت او تطورت او تغيرت و لابأس بمعرفتنا بالمعلومة .

تحياتي
براثا


مو قلتلكم طنطل بغداد شلون أدمي موش متل طنطل الجنوب شلنفص ووكيح هوايا :) بس الاعضاء هنانه ما يعرفون شدنحجي عنه

تمن المحمر وهذا اسم الطبخه عيني موجود ولا زال بس متل ما قلنا البيوتات القديمه هوايا بالبصره هي التي تحييها وصدرتها الي الكويت بحكم المصاهره لكن الفرق انهم لا زالوا يعملوها بالدبس المستخرج من التمر بينما الخليجيين يعملوه بالسكر .
.

على ضفاف دجله
24-12-2004, 12:17 PM
گرگمُه ما عرفتها..
هندس احنه نكولها يعني الدنيا ظلام هندس..
اسحالة بقايا التمن لكن مطحون مو حبة عدله..
يطالس يعني يصافح اي يسالم..

سألنه الوالدة وانطتنه هاي الترجمة..
ان شاء الله تكون صح..

زين شنو معنى الكلمات التالية..

جحيل؟
سبوس؟
حندگوگ؟
چثري؟

طبعاً هاي كلمات قديمة جداً اني بس اريد بنفسج تعرفهن:D:D

يلا ترجموالكلمات منتظرين جوابكم

بنفسج
24-12-2004, 03:42 PM
اسفه عزيزتي لم انتبه للكلمات ..

جحيل : البرد القارس

سبوس : البقايا المسوسه من الحبوب والاكل الكامل تاكله احيانا

الماشيه

حندكوك : لا اعرف :)

جثري : أكثري chathry ? الكلمه غير واضحه لدينا

فمالاه

على ضفاف دجله
24-12-2004, 04:50 PM
اسفه عزيزتي لم انتبه للكلمات ..
جحيل : البرد القارس
سبوس : البقايا المسوسه من الحبوب والاكل الكامل تاكله احيانا
الماشيه
حندكوك : لا اعرف :)
جثري : أكثري chathry ? الكلمه غير واضحه لدينا
فمالاه


ولايهمك عيوني عادي مو مشكلة

جحيل؟جوابك صحيح

سبوس؟بقايا قشور الرز و الحبوب

حندگوگ؟نوع من النبات وطعمه مر (على فكرة هذول اهل الناصريه اللي يسمونه حندگوگ لان اني ما اعرف شيسمونه عنده)

چثري؟الروبه أو الزباد الجاف


عمو ابو الفريخات..
لا اني اخلي رحمة الله تنزل بس انت هم لازم تقدم طلب
بالنسبة لسؤالك اكثر منطقة تشتهر بصناعة الروبه أو اللبن هي أربيل..

من يعرف شنو معنى محروق أصبعه

تحياتي..
أختكم:على ضفاف دجله

بنفسج
24-12-2004, 07:12 PM
هاي اكله من الخبز والمرق او الصلصه فيها اللحم والخضر او البقول ونسميها بلبنان حراق صابيعو

السبوس كلمه عربيه والانسان لا ياكله بل يلقيه للدواجن والماشيه
سلامي لك عزيزتي

بنفسج
24-12-2004, 07:20 PM
ما معني التالي :)

يرطخ

عرار

فرزن

دقل او دكل

عبري

الداد الك

كلاو

سندس حبيب
25-12-2004, 08:37 AM
السلام عليكم
شلونكم؟
بالنسبة لجثري اذاتقصدون الروبة احنة نكول (خثري) مو جثري .ونكولها للبن وهي اتت من كلمة الخثرة ( بقايا اللبن التي نصنع بها لبن ثاني جديد) .

فرزن : يعني اميز بوضوح بين حاجتين او عدة حاجات
بالنسبة لبقية الكلمات مااعرفها لان مانستعملها .

كلاو :اما تكون بمعنى الخداع (كلاوجي) او نقصد بها كبوس الراس مثل (عرقجين)


تحياتي

آزاد اسكندر
25-12-2004, 10:57 AM
الاخت الكريمة يقين

أهلا و سهلا بك أختاً غالية و صديقة عزيزة ،طبعا الكلمات بيها شوي صعوبة لأن نحن نحاول اختيار الكلمات التي تتفرد بها اللهجة العراقية و نبتعد نوعاً ما عن الكلمات المشتركة و التي تكون عادة معانيها معروفة.

تحياتي لك و تقبلي محبتي و احترامي :)

آزاد اسكندر
25-12-2004, 11:05 AM
اختي الغالية على ضفاف دجلة

دا اتشاقة وياج ياب اشو متنكة علينا :) ، بعدين اذا نقدم طلبات شنو فايدة الواسطة بلله :)، يابة نريدها الفيزا من خية بنفسج و هم شنجن :)

محروق اصبعة أكلة مثل ما قالوا الجماعة

تحياتي :)

آزاد اسكندر
25-12-2004, 11:13 AM
خية بنفسج

فرزن و كلاو مثل ما فسرتهن حجية سندس ، و عبري يعني عابر سبيل

و الباقيات ما عندي خبرهن

يابه اليوم شلون ريوج عراقي راح اتريج :)، جابولنا جماعة خبز عروق و قيمر و جبن عرب و اليوم راح اعلقها للصبح :)

اذا تريدين تلحقين تره فد ساعة ننصب :) ،ها اضملج جم وصلة خبز عروق؟

آزاد اسكندر
25-12-2004, 11:33 AM
بمناسبة عيد ميلاد سيدنا المسيح نقول للأخوة المسيحيين أعياد مجيدة و طبعا نهنئ غير المسيحيين أيضا لأنه ميلا السيد المسيح عليه السلام.
و ان شاء الله تعالى يعود علينا بالسلام و السعادة للجميع

مع حبي :)

سندس حبيب
25-12-2004, 12:17 PM
حجية شنو عيني كاكه ازاد:mad: ... قابل اني هازه كاروكك خو موهازه كاروكك

عدنه بالعراق العجايز نصيحلهم حجية .. اني بعدني موعجوزة:(

اني زعلت :(:(

بنفسج
25-12-2004, 02:24 PM
سندسي عم يمزح معك آزاد نحنا ابد ما نستغني عنك

http://www.acclaimimages.com/_gallery/_SM/0027-0405-1909-4333_SM.jpg

وكلمتج عن خثره صح الخثره هي ما تخثر من الروب والالبان واظن دجله

قصدتها

يرطخ : يرفرف

عرار : نوع من الزينه تضعها النساء بين فتحتي الانف غير الخزامه

دقل : مسامير السفينه وايضا لباس للرجل

فرزن : يفهم الكلام

عبري : هو الريفي الذي يقطع الانهر او شطري المدينتين

وهناك معني اخر وهو اليهودي

الداد الك : فارسيه وتعني طلب الصبر والمعونه لك

كلاو : هو غطاء الراس للرجل

آزاد اسكندر
25-12-2004, 04:02 PM
هههه :)

لا يابة عليش الزعل يمعودة، ليش هو بس الكبير بالعمر يصيحولة حجي ؟! :)

اصلا اني عندي صديق عمره 22 سنة و حاج بيت الله فآني دايم اصيحله حجي فلان

و على كل تره احنا ما نقدر نزعل خية سندس ،عمي امسحيها بلحيتي :)

ها هسه بعدكم زعلانين ؟ :)

آزاد اسكندر
25-12-2004, 04:07 PM
هاي جم كلمة جديدات:

سكملي: يعني كرسي

حايط: هو الحائط

طبلة: هي الطاولة الصغيرة

تيبلام: هي الانارة المنضدية ز الكلمة مأخوذة من table lamp

جنطة: هي الحقيبة

الزاغور: هو الجحر

آزاد اسكندر
26-12-2004, 12:30 AM
كاروك: هو سرير الطفل

الشناشيل: هي شبابيك البيوت البغدادية القديمة

دورات أو مرات: يعني أحياناً

مكدي: هو المتسول و الكدي هي التسول

و الى اللقاء في الحلقة القادمة :)

سندس حبيب
26-12-2004, 08:45 AM
ليش اني اكدر ازعل منك كاكه ازادي .. انت اخ عزيز

بالمناسبة انت اكيد من ولادة بغداد وسكنتها لان لهجتك العربية كلش قوية .. لان بعد سقوط النظام سافرت للشمال والشباب الاكراد هناك بعمر 15 -20 سنة مايعرفون يحجون عربي حته نحجي وياهم انكليزي .. اتصور ... بس اذا يحجون عربي يحجون اما مصري او لبناني بسبب المسلسلات العربية اللي يشوفوها .

من الكلمات اللي مازلنه نستعملها ليهسه
جحنتي : تطلق على الرجل الضخم والقوي .
لشة( بتشديد الشين) : تطلق على الجسم كله .
جرخلة(بتشديد اللام) او فرة: يعني مثلا نزور عدة مناطق في يوم واحد نطلق هذه الكلمات وتكون الجملة هيجي : ( خلي اليوم نسوي جرخلة على الصديقات مثلا)

تحياتي

آزاد اسكندر
26-12-2004, 12:48 PM
اختي العزيزة سندس

مو بس اني مواليد بغداد ابوية و جدي همين من مواليد بغداد :)

صحيح الشباب في كردستان اليوم قلما يتحدثون عربي و اني شفت بنفسي هذا الشي لكن احنا نريدكم انتو همين تتعلمون كردي :) شنو رأيج ؟

ذكرتيني بكلمة "جرخلة" صارلي هواية ما مستخدمها :) مشكورة عيوني :)

آزاد اسكندر
26-12-2004, 12:54 PM
و هاي جم كلمة حصاد اليوم :)

حيل بيك: عبارة تقال للتشفي من شخص ما إذا اصابته مصيبة فكأننا نقول له الله يزيد بلاك ،بس الله لا يزيد بلاء أحد ان شاء الله

يتلفس:يعني يبذر

فلوس: يعني أموال

فإذا ردنا نقول على شخص انه يبذر أمواله نقول: هذا بس يتلفس فلوسه :)

جوعان:يعني جائع

داطلي: نوع من الحلويات يسمى أيضا "جيمات"

بوتين: هو الحذاء الرياضي

قاط: القاط هو البدلة الرسمية للرجل و قد تكون للمرأة أيضا

فلكة: يعني الدوار في الشارع بالانكليزي cyrcle

و ترقبوا المزيد :)

المخلصه للعترة
26-12-2004, 01:57 PM
كلام روعة يعيييييييييييييييييييييني

هسا آنا اقول لامي

آزاد اسكندر
26-12-2004, 02:00 PM
الاخت الكريمة المخلصة للعترة

مشكووووورة على المرور و المشاركة

انتم و الله الروعة أخوتي الاحبة

تحياتي :)

سندس حبيب
27-12-2004, 08:43 AM
اني اعرف شوية احجي كردي اخ ازاد .. لان درسناه بالخامس علمي وهناك شعر احفظه وهو
باييز باييز
من بوكي برج
من مات تو زيز
من هناسم تو حسرات

هذا ماتذكر منه باييز يعني خريف .. بوكي اعتقد عروس ... برج (بتشديد ج) يعني شعر ... من يعني انا .... تو يعني انت..مات (نسيتها مااعرفها انت ترجمهااخ ازاد) .. زيز (ايضا انت ترجمهانسيت معناها )

بهار : يعني ربيع
ئيستا : اعتقد معناها غدا..او اليوم
كه رمه : يعني حارة
كنت هواية حافظة كلمات بس نسيتها ...بالمناسبة اني حصلت وقتها على درجة 90 من 100 وحصلت على اعفاء من الامتحان .

بالنسبة لكلمة قاط : ايضا تعني طابق ونستعملها كثيرا كأن نقول هذه العمارة من 4 قوط يعني من 4 طوابق .

جرخلة اتت من جرخ يعني الاطار كاطار السيارة والذي نسميه بالعامية تاير

آزاد اسكندر
29-12-2004, 01:14 PM
مشكورة أختي العزيزة سندس

:)

تحياتي لك :)

سيناء الرافدين
26-09-2005, 07:34 AM
للرفع

خادم ال الرسول
29-09-2005, 05:06 PM
الحمد لله رب العالمين والصلاة والسلام على محمد وال محمد الطيبين الطاهرين
السلام عليكم اخي العزيز ازاد اسكندر وكل من شارك في هذا الموضوع
لدي بعض الكلمات اتمنى ان اكون اول من يكتبها لان لم اقراء كل المشاركات
خنياب تعني(المياه الفائضة عن حاجة النهر) وغالباً ما تستعمل في الشعر الشعبي العراقي
خابط تعني(مشوب) اوردت هذه الكلمة لارتباطها الوثيق في الكلمة التالية
دهلة تعني(المياه الخابطة)يعني المشوبة يعني(ماء+اتربة= طين) وغالبا ما تستعمل في الشعر الشعبي
لفة يعني(سندويش)
وكاد يعني(اكيد)مأخوذة من التأكيد
سكن يعني(مساعد السائق في الباص) مأخوذة من الكلمة الانكليزية(second)
ورشن يعني (الطاسة) يعني ( اناء صغير للماء) اهل العمارة يستعملونها
كوز يعني (الحِب) يعني شيئ اشبه بشكل مخروطي رأسه الى الاسفل وقاعدته الى الاعلى يوضع فيه الماء(اهل الناصرية يستعملونها)
جندل يعني(عمود من الخشب) اهل البصرة يستعملونها(ليس حرف الجيم انما تحته ثلاث نقاط)
درام يعني (برميل) اهل البصرة يستعملونها
طرنمبة يعني( كاك ) والكاك يعني( مكينة الماء ) وهي نفسها ( حنفية الماء)يحصل ادغام فيها فتلفظ (طرمبة)
عكَد او عجد يعني( الشارع ) اهل الناصرية يستعملونها
صيهود يعني ( البرد الشديد )
دبة يعني (قنينة)
زنبيل يعني (علاكة) اهل البصرة يستعملونها
طاكَ يعني (ضرب)شخص يضرب شخص اخر يقولون طكاه
طاكة الهبري يعني (لا يملك شيئ من المال )يعني ضربه الاستفلاس
كنديرة يعني ( الخيط الملفوف على شيئ مستطيل او مربع)
خطار يعني (ضيف)
حول يعني (انزل) من مرتفع او من سيارة ولا اعرف في اي حالة تستخدم ايضاً
اشبيك يعني ( ايش فيك ) (ما بك )
صريفة يعني (غرفة مصنوعة من القصب)
وهدة يعني (بلكونة) اهل الناصرية يستعملونها....

لكنها جميلة جداً وصعبة جداً لمن لايعرف معانيها
احب ان انقل لك هذه القصة اللطيفة حول صعوبتها
احد الاصدقاء لدي كان دائما يقول انا اكثر شخص مُلم بالهجة الدارجة ولا احد منكم يعرف بقدر ما انا اعرف منها وكان الكلام موجه للاصدقاء الشعراء الشعبيين وهو شاعر ايضاً وفي احد الايام عاد الى بيتهم فستقبلته جدته الكبيرة في السن التي عاشت في الجنوب وهي تقول له رحيم شو انت صاير طوزلي اخذته الدهشة والحيرة ماذا تعني كلمة (طوزلي) فبادر بالسؤال جدة بروح والديج شنو معنة (طوزلي) فاجابته يعني ( لاحوة ولا كعوة) فقال جدة خليها على طوزلي احسن يعني (افضل)..
ولا اعرف هل صحيح لهاتين الكلمتين من معاني ام ماذا؟؟

الى جميع المشتركين ماذا تعني الجملة التالية
جاانيوز ما انييب افروخ (معناها) منكم اريده؟؟؟ ليست جيم وانما ثلاث نقاط تحت الحرف(ح)

ممكن اذا عرفتو الجواب اتردون علينا...
وشكراً لك اخ ازاد اسكندر

سيناء الرافدين
30-09-2005, 05:40 AM
احسنت اخي الكريم لهذه الكلمات الجديدة والتى بعضها لاول مرة اسمعها

ولم افهم ماذا تعني كلمة طوزلي!!!1

اما جملتك (جاانيوز ما انييب افروخ)

اعتقد المقصود بها( نبطل نخلف جهال يعني) ان شاء الله المعنى يكون صحيح :D

ابن العامري
22-03-2007, 03:50 AM
اشو هذا الموضوع صار له من زمان مسدود شرايكم نفتحه لأن هو كلش حلو نجمع النا كم كلمة ونسويها كتاب!!!!! ههههه

سيد حمد
15-07-2007, 02:34 PM
جميل جدا بل رائع